Eftirtaldir aðilar fengu styrk frá Menningarsjóði Sparisjóðs Siglufjarðar þann 11. mars 2004.

Gallerí Sigló

Hönnun á merki til að setja á minjagripi fyrir Þjóðlagahátíð

Styrkur kr. 20.000

Arnfinna Björnsdóttir

Er að vinna að uppsetningu á sýningu á myndum sem tengjast síldarsöltun.  Sýningin verður opnuð á 100 ára afmæli síldarsöltunar á Siglufirði um Verslunarmannahelgina.

Styrkur kr. 20.000

Þórarinn Hannesson

Er að vinna að útgáfu geisladisks í samvinnu við aðra siglfirska tónlistamenn, Þórarinn gaf áður út geisladisk árið 2001, um er að ræða frumsamin lög og textasmíðar

Styrkur kr. 20.000

Sigurður Ægisson

Er að vinna að útgáfu geisladisks með nýjum kirkjuskólalögum, þar sem mikil þörf er fyrir hjálpartæki í barnastarfið, en engin endurnýjun hefur verið lengi.

Styrkur kr. 20.000

Siglfirðingafélagið

Hefur verið mikilvægur hlekkur milli Siglufjarðar og brottfluttra Siglfirðinga, en félagið var stofnað árið 1961.  Félagið stendur fyrir hinum ýmsu uppákomum í Reykjavík auk þess að koma að ýmsum menningarviðburðum tengdum Siglufirði.  Félagið gefur út fréttablað tvisvar á ári. 

Styrkur kr. 50.000

Sögufélagið

Var stofnað árið 1943, en hefur ekki starfað formlega síðan 1977.  Í nóvember sl. ákvað hópur einstaklinga að endurreisa félagið.  Félagið mun gefa út rit í sumar sem tileinkað yrði síldinni og stefnt er að árvissum ritum frá félaginu.

Styrkur kr. 75.000

Vorboðarnir

Kór félags eldri borgara stendur fyrir kóramóti eldri borgara á norðurlandi.  Má vænta þess að 220-240 gestir mæti til Siglufjarðar vegna þessa.  Óskað er eftir styrk til að mæta kostnaði vegna þessa

Styrkur kr. 75.000

Steingrímur Kristinsson

Stendur fyrir öflugri siglfirskri fréttasíðu, þar geta Siglfirðingar og aðrir hvar sem þeir eru staddir í heiminum vitað um allt sem er að gerast í mannlífinu á Siglufirði.  Óskað er eftir styrk vegna endurnýjunar á tölvu,- og hugbúnað og kostnaðar vegna nettengingar og vefsvæðis “Ljósmyndasafns Steingríms”

Styrkur kr. 100.000

Leikfélag Siglufjarðar

Hefur látið skrifa fyrir sig leikverkið “Silfur hafsins”, sem áætlað er að frumsýna 27. mars nk..  Höfundur verksins er Ragnar Arnalds og Elías Þorvaldsson hefur samið tónlistina.

Styrkur 150.000

Síldarminjasafnið

Hefur staðið fyrir stöðugri uppbyggingu undanfarin ár og er það framtak lofsvert.  Safnið stendur frammi fyrir stórframkvæmdum og síðan hefur það verið valið til að keppa fyrir Íslands hönd til Evrópsku safnaverðlaunanna sem fer fram í Aþenu í Grikklandi í maí nk.  Síldarminjasafnið hefur ákveðið að taka þátt í þessari keppni fáist til þess stuðningur.  Styrkurinn kr. 170.000 er því tileinkaður þátttöku í  keppninni.

Hlöðver Sigurðsson

Hefur undanfarin ár dvalið erlendis í námi.  Þarna er á ferð ein af okkar helstu vonum í óperusöng.  Með umsókn Hlöðvers fylgdu ótal meðmælabréf frá núverandi og fyrrverandi kennurum, hérlendis og erlendis.  Ljóst er að námið er mjög dýrt.  Eitt námskeiðanna sem Hlöðver stefnir að því að sækja er “Il Bel Canto, opera singers course” næsta sumar, um er að ræða 4-vikna námskeið í Verona á Ítalíu.  Beinn kostnaður vegna námskeiðsins er kr. 250.000.  Ákveðið var að styrkja Hlöðver vegna þessa námskeiðs með því að greiða það að fullu.

Styrkur kr. 250.000

Þjóðlagahátíðin á Siglufirði

Verður haldin í fimmta sinn í júlí nk., ljóst er að framtakið er glæsileg í alla staði og fjöldi innlendra og erlendra listamanna koma við sögu.  Kostnaður við hátíðin er gríðarlegur, enda er í boði mjög vönduð dagskrá, sem einkennist af metnaðarfullum áhuga þeirra er stýra henni.

Styrkur kr. 250.000

Herhúsfélagið

Var stofnað með það að markmiði að koma á gestavinnustofu fyrir listamenn.  Kostnaðaráætlun við heildarverkið er um 9mkr. og hefur þegar tekist að afla 8mkr..  Áætlað er að uppbyggingu verði lokið í sumar og starfsemi geti hafist.  Ákveðið var að veita styrk til uppbyggingar að fjárhæð kr. 300.000.