>>>>>>>>>>>

Að gefnu tilefni – og til áréttingar.

Vefurinn “Lífið á Sigló” varð til vegna áralangrar hugdettu og af persónulegum áhuga á því að miðla öðrum því sem ég verð vitni af um lífið á Siglufirði, því jákvæða augnayndi, fegurð og fróðleik sem Siglfirðingar geta miðlað. Þetta á ekki hvað síst um ljósmyndir, sem oft segja meira en mörg orð.

En eins og allir vita, það er ættu að vita; er að þetta sem ég hefi verið að gera er ekki á eins manns færi, þó svo að ég hafi ekki gert mér fulla grein fyrir því í upphafi þegar ég lagði upp með þetta verkefni, sem varð allt í einu af veruleika, er ég samkvæmt hinni “almennu reglu”, varð “of gamall” til að vera á hinum almenna vinnumarkaði.

En það sáu fleiri hið jákvæða við svona miðil eins og “Lífið á Sigló” og stuðningur kom úr ýmsum áttum, raunar öllum áttum, bæði fjárhagslegur stuðningur (ekki veitir af því þetta kostar mikla peninga, styrktaraðilar koma fram á forsíðunni) og ekki hvað síst hinn andlegi stuðningur sem kom héðan heima á Siglufirði, frá Siglfirðingum annarsstaðar á landinu, víða um heim, og raunar einnig frá fólki sem aldrei hefur til Siglufjarðar komið, þar með taldir nokkrir útlendingar.

Og ekki vil ég gleyma hinum mörgu góðu en ónefndum “fréttariturum” sem  hafa sent mér upplýsingar og sumir ljósmyndir til að bæta upp á frískleikann og fjölbreytnina á vefnum.

Þá hefi ég eins og lesendur hafa tekið eftir, verið með á mínum snærum góða vini sem hafa sent mér ljósmyndir bæði umbeðið og ó umbeðið, frá atvikum þar sem ég annað hvort ekki vissi af eða átti ekki kost á að vera viðstaddur.

Þessi aðstoð er ómetanleg, því oft kemur fyrir að ég finn ekkert til að birta, en svo kemur á daginn að einhver lumaði á ljósmynd og stuttri frásögn og sendir mér.

Yfirleitt fer ég að og koma fyrir efni á síðuna vegna “næsta dags,” upp úr klukkan 17:00 á daginn, afmælisfréttum og tengdum sem sem mér hafa borist, og gera klárt vegna hugsanlegra fleiri slíkra, finna “Eina gamla” mynd til uppfyllingar, og eða setja inn frásögn og myndir tengt efni sem ef til vill hefur átt sér stað seinnipart dags eða gera klárt vegna annars efnis sem ég veit um að verði síðar um kvöldið og að ég verði þar viðstaddur. Ég reyni að koma slíku efni (myndaseríum) inn fyrir miðnættið, en oftast uppfæri ég síðu mína út á netið vegna komandi dags,  öðru hvoru megin við miðnættið.

En til áréttingar. Siglfirðingar, hvar sem þið eruð í heiminum. Það er alltaf einhver annar Siglfirðingur sem vill heyra frá ykkur og eða forvitnast um hagi okkar. Sendið “Lífinu á Sigló” fréttir, eina, tvær myndir eða jafnvel syrpu mynda, úr afmælum, eða öðrum fagnaði þar sem Siglfirðingar eru í aðalhlutverki – og eða eru að gera eitthvað markvert, eða jafnvel bara að vera til.

Siglfirðingar, hjálpið mér að gera “Lífið á Sigló” enn fjölbreyttara. Nú þegar eru um og yfir 1000 heimsóknir daglega á forsíuna á vef mínum. Gerum vefinn forvitnilegri einnig fyrir hina sem ekki þekkja Siglufjörð ennþá, þá dásemd sem staðurinn okkar; Siglufjörður hefur upp á að bjóða, fólkið, fjöllin okkar, fuglalífið og mannlífið allt og tilveruna.

Gerum vefinn “Lífið á Sigló”  vef okkar allra, bæði okkar sem heima sitjum og hinna sem fjarri eru.

Munið að innfæddir Siglfirðingar líta á ALLA sem búið hafa hér á Siglufirði, skemmri eða lengri tíma sem Siglfirðinga, án tillits til þess hvort viðkomandi er fæddur hér eða ekki, - og ekki megum við gleyma öllu Siglfirska blóðinu sem rennur í æðum unga fólksins, þið eruð einnig álitin Siglfirðingar.

Nú hefi ég samkvæmt óskum frá mörgum lesendum síðu minnar, ákveðið að bjóða hverskonar hópum Siglfirðinga upp á að taka þátt í að lífga enn meira upp á síðuna Lífið á Sigló.

Þessu er beint til vinnuhópa innan fyrirtækja, hluta af vinnuhópnum svo sem deildum og vinnustöðum. Hópum svo sem félagasamtökum, ákveðinna starfshópa innan félagasamtaka, til dæmis stjórnum þeirra, raunar hvaða hópa sem er, á hvaða aldri sem er.

Tilgangurinn er HÓPMYNDATÖKUR, til birtingar á síðum “Lífið á Sigló” þetta væri viðkomandi algjörlega að kostnaðarlausu, það eina er tími viðkomandi sem í sjálfa myndatökuna færi. Myndirnar verða birtar í það góðri upplausn að allir gætu prentað frá síðunni í amk. stærðinni A5. Og ef ósk um stærri upplausn kemur til einkanota verður auðvelt að semja um slíkt, en allar mínar myndir eru teknar í mjög hárri upplausn

Það er eindregin ósk mín; að ofannefndir hópar hafi samband og taki þátt í átakinu. Svona myndir vekja ávalt upp minningar og ekki hvað síst; þær eru góð heimild, en um hver áramót fær Bókasafnið eintak af síðu minni á DVD disk til varðveislu, auk þess sem það er og verður á netinu og afrit hjá mér.

Og til viðbótar, til að kynnast hvort öðru betur, vita um upprunnann, þá er gott að taka þátt í og skrá sig og sína.
 

Steingrímur Kristinsson