>>>>>>>>>>>

Eini kvenhöfundurinn í Eurovisionkeppninni í ár!!

Bryndís Sunna Valdimarsdóttir keppir við karlmennina á úrslitakvöldinu í Söngvakeppni sjónvarpsins  2006. Lag hennar Hjartaþrá sem Sigurjón Brink flytur þann 18. febrúar er eina lagið í úrslitum sem samið er af konu.

Hin 35 ára gamla Bryndís er ekki óþekkt í tónlistarheiminum. Hún á fjölbreyttan feril að baki bæði sem lagahöfundur, flytjandi og útgáfustjóri.

Bryndís lærði söng og nam píanóleik hjá Tónlistarskóla Rangæinga, á árunum 1981-1985. . Þá  var  hún í  námi í tónvinnslu hjá Þorvaldi Bjarna árið 2005. Hún tók þátt í fyrstu söngvakeppni Sjónvarpsins í þættinum Á tali hjá Hemma Gunn.

Hún vann í dægurlagakeppni á Sauðárkróki árið 2004 með lagi sínu “Sumar í hjarta” í flutningi Heiðu í Idol.

Sama ár komust tvö af lögum hennar í keppni um þjóðhátíðarlag Vestamannaeyja. Annað þeirra “Með þér” lenti í öðru sæti í flutningi Cecilíu Magnúsdóttur söngkonunnar í Saga Klass.

´Sumarnætur” heitir lagið sem komst í úrslit í keppni um ljósanæturlagið í Reykjanesbæ 2004. Rakel María Axeldóttir flutti það fyrir hana.

Hún á skemmtilegt lag á disknum “Uppáhaldsljóðin okkar”, sem kom út fyrir síðustu jól. Þar eru lög ýmissa höfunda við ljóð Þórarins Eldjárns. Lagið hennar var valið við ljóðið “Grannmeti og átvextir”. Regína Ósk flutti lagið á disknum.

Hún sá um útgáfu á geisladisknum Ástartöfrar árið 1996 þar sem lög föður hennar voru flutt af fjölda listamanna. Titillagið söng hún sjálf.

Bryndís tók þátt í sýningunni Bítlaárin sem gekk í tvö ár á Hótel Íslandi. Þá var hún í hljómsveitinni 8villt, sem fór vítt og breitt um landið í fimm ár.