Lífið 1.- 6. ágúst 2003 | Lífið 7.-12. ágúst 2003 | Lífið 13.-17. ágúst 2003 | Lífið 18.-25 ágúst 2003 | Lífið 26.-31 ágúst 2003

>>>>>>>>>>> Lífið 7.-12. ágúst 2003

12. ágúst 12:58  Landgræðsluvélin Páll Sveinsson kom inn fjörðinn í lágflugi,  og út hann til baka í hádeginu. Ég náði þessari mynd við það tækifæri.

11. ágúst Stórkostleg tilviljun. Þessar 2 myndir voru teknar á sama sekúndubrotinu, af tveimur ljósmyndurum, sem hvorugur vissi af hinum. Annar, Steingrímur var við dyrnar á Ráðhúsinu, en hinn Almar Möller (sem benti mér á og sendi mér sína)  stóð uppi á svölunum á Íslandsbanka. Myndirnar eru frá flugeldasýningu Pæjumótsins þann 9. ágúst sl. kl. 22:49:06 samkvæmt klukku minnar myndarvélar.  S.K.

12. ágúst  GRÁNA. Nú er lokið við að mála framhlið hússins.

Gamla Grána

Litadýrðin, er ekki svona af tilviljun, svona lituð var framhlið á gömlu Gránu / Goos verksmiðjunni. Hinsvegar voru hin táknin. SR30 - INGO og KVELDÚLFUR Ltd. ekki á gamla húsinu, því þessi merki; SR-30 tilheyrði fyrstu síldarverksmiðju Ríkisins, sem gekk undir þessu nafni, og mun merkið eins og þarna sést þarna, vera fyrsta "Lógó" verksmiðjunnar. INGO, var vörumerki verksmiðjunnar á Ingólfsfirði og Kveldúlfur Ltd. tilheyrði síldarverksmiðju fyrirtækjanna. En Þær vélar og búnaður, sem inni í nýju Gránu, var sótt í leifar þessara verksmiðja, sem fyrir löngu höfðu verið aflagðar, og ekki  viðhaldið, eftir að síldin hvarf á þeirra svæði.

12. ágúst. Þessi mynd er tekin af síðu K.S / Pæjumót, en þar er kominn mikill fjöldi mynda frá Pæjumótinu..

12 ágúst.  "Hann setti svip á bæinn" Egill Steingrímsson matsveinn / bakari fæddur 31. september 1906, dáinn 11 febrúar 1962

11. ágúst 14:00 S.R.Vélaverkstæði. Eins og flestum er kunnugt, hér á Siglufirði, þá keyptu starfsmenn verkstæðisins ofl. Vélaverkstæði það sem SR-MJÖL HF átti og rak, fyrr á þessu ári. Nú hafa þeir bætt um betur og tekið á leigu meirihluta húsnæðisins, þar sem Lager SR var til húsa og keypt mikinn hluta þess, sem inni á lagernum var. Verið er að gera skilrúm á efra lagerplássinu, sem undandregur um þ.b. 30%  af plássinu, og á neðri hæð um þ.b. 15 %   ---- Á "stærri" myndinni eru Ólafur Sigurðsson framkvæmdastjóri og Óskar Berg Elefsen verkstæðisformaður, inni á Lagernum. "Minni" myndin sýnir Elmar Árnason og aðstoðarmann hans að vinna við skilrúm á efri hluta lagerplássins.

11. ágúst 09:00  Múlaberg  landaði um 20 tonnum og Stálvík landaði 37 tonnum af rækju í morgun. Skipin voru á sitt hvoru veiðisvæðinu.

Góðir gestir síðu minnar. Allir sem áhuga hafa á, geta sótt að vild myndir frá síðum mínum, án endurgjalds.- Það er til persónulegra einkanota, ekki til birtingar eða annarrar dreifingar.-

10. ágúst  Sigurvegararnir.....  voru krýndir í lok Pæjumótsins, upp úr klukkan 15:00 í dag. Glæsilegir verðlaunagripir að vanda.  Veður hefur verið einstaklega gott um þessa helgi, og allir ánægðir.

Eins og ég nefndi á fyrsta degi mótsins, þá gerði ég ekki ráð fyrir að blanda mér í myndatökur tengdar mótinu, þar sem ég hélt að, mótstjórnin, gerði slíku aftur skil, jafnmyndarlega og á síðasta ári. En ekkert varð úr því hjá þeim að þessu sinni, svo ég ákvað að slá til - og tók slatta af myndum og setti á netið rúmlega 400 ljósmyndir á síðu mína Lífið á Sigló Þær eru á tenglunum Pæjumót ( )

10. ágúst.  Flugeldasýning, hófst í gærkveldi, um það bil sem skemmtihaldi Pæjumótsins var að ljúka á Torginu. 8Villtar skemmtu og héldu uppi fjörinu að vanda.  Hellingur af myndum frá kvöldinu á tenglunum 7 og 8.      Allar upplýsingar um Pæjumótið er á tenglinum: http://www.simnet.is/ks/paejumot/

9. ágúst 16:00 Útvarpið okkar, "allra" landsmanna, sagði frá rúmlega 21 gráðu hiti á Dalvík á Fiskidögum, en að aðeins væri 15 stiga hiti á Pæjumóti á Siglufirði (neikvæð frétt í huga RUV ?- var það þess vegna sem Siglufjörður nefndur?) Mælirinn á Sparisjóðnum sýndi á sama tíma 25 °C

Athugið, - margar myndir á tenglunum Pæjumót

9. ágúst 11:00 Gott afdrep, en þarna þyrfti að vera borð og bekkir við það, eins og raunar eru víða.  Þetta er uppi á enda "Stóra bola", snjóvarnargarðs í suðurbænum. Þegar é sótti staðinn um kl. 11 í morgun, þá þarna nær logn, sól og 20 stiga hiti.

9. ágúst  Hólm Dýrfjörð, 89 ára skörungur, var mættur á torginu í gærkveldi og skemmti sér greinilega konunglega, ekki síður við það að hitta kunningjana. Þarna er meistarinn og með honum Helgi Magnússon píulagningameistari.

9. ágúst  Hljómsveitin 8Villt lék á Torginu, í gærkveldi við mikinn fögnuð allra Pæjanna og annarra sem mættir voru. Rigningin, sem rann í stríðum straumum um andlit krakkanna, virtist ekkert draga úr ánægju þeirra.

8. ágúst 14:20  Pæjumótið stendur yfir. Svona til að sýnast, þá eru nokkrar myndir frá einum leikjanna í dag, á tenglinum Pæjumót.

Það skal tekið fram að íþrótta myndir tilheyra ekki minni "deild" - ég er ekki mikill íþróttaáhugamaður, og ekki stundað slíkar myndatökur.

8. ágúst  09:15  Hið árlega  Pæjumót Þormóðs Ramma -Sæbergs er haldið nú um helgina. Mótið er fjölmennt að vanda, talsvert fleira fólk virðist mætt nú, en t.d. um síðustu helgi, en þá mættu að talið var um 4000 manns. Fullorðnir koma nú til að fylgja börnum sínum eftir, slappa af og njóta góða veðursins. Ekki veit ég um endalegan fjölda, en tjaldstæðin í bænum eru að varða fullsetin, en næg tjaldstæði eru frammi á Hóli, þó þar sé kominn all nokkur fjöldi.

Ef að líkum lætur, miðað við síðasta mót, þá birtir mótsstjórnin fjölda mynda á vef sínum, svo ég geri ekki ráð fyrir að blanda mér í þá vinnu. Tengill til síðu Pæjumótsins  þar sem allar upplýsingar er að fá um mótið.

8. ágúst  "Hann setti svip á bæinn" Þorsteinn Sveinsson frá Lónkoti, var búsettur á Siglufirði í áratugi, eftir að hann hætti búskap. Hann vann öll algeng störf, á síldarplönunum, en lengst af sem starfsmaður SR, þar sem hann vann ýmis störf. Ég þekkti Steina vel og var gaman að spjalla við hann, þó svo að oft hnýtti hann í okkur yngri vinnufélagana, honum þótti við oft vera ærslafullir. Þorsteinn var fæddur 6.febrúar1906 

7. ágúst. Aldrei er góð vísa, of oft kveðin, segir máltækið. En ég var að frétta fyrst í dag, af alveg frábæri ljósmyndasýningu í Alþýðuhúsinu, sem mér er sagt að hafi verið auglýst í "Tunnunni" og búin að vera opin í allt sumar, en það greinilega farið fram hjá mér. Ég leit þarna inn í dag, og gleymdi mér yfir myndunum, þrátt fyrir skvaldrið í kerlingunum, en þarna stóð yfir á sama  tíma og ég var inni, einhver kvenfatamarkaður. En myndirnar eru alveg frábærar, og ætti fólk að gera sér ferð til "Gumma" og skoða þær. Ég fór á netið og hélt áfram að skoða, er ég kom heim.

Þetta eru ljósmyndir frá síldarárunum um  1957. Ljósmyndarinn heitir   Haukur Helgason. Heimasíða hans er:   http://www.myndverk.is/index.html          

7. ágúst  09:30  Þessi mynd sýnir óvenjulega fjallasýn, ekki óvenjulega vegna sólskyns, blíðu og fegurðar fjallahrings okkar umhverfis Siglufjörð, heldur hvað lítill sem enginn snjór er í dölum og skorningum. En elstu menn muna ekki jafn lítinn snjó í fjöllunum okkar og nú. Snjór, jafnvel jöklar sem verið hafa allan ársins hring undanfarna áratugi, sjást ekki lengur.

7. ágúst.   Enn eru rollu tu....  að ónáða íbúana í norðurbænum, sumir sváfu lítið fyrir stöðugu jarmi þeirra í nótt. Þessar rollur var einn af starfsmönnum bæjarins að reka, aðeins norðar í morgun, en þær voru komnar aftur á svipaðar slóðir nokkru seinna.  VIÐBÓT: kl. 14:00 - 14:45  Hraðferð um bæjarlandið, og talning með sjónauka úr og við bílinn á akvegi: 36 rollur og lömb voru ofan og neðan Strandarvegar, utan byggðar, 4 í Hvanneyrarhlíð, norðan árinnar, 6 fyrir sunnan ána. 3 fyrir ofan Steinaflatir, 4 á veginum framan við hlið Skóræktarinnar, sem var opið, ég fór ekki inn til að leita, en ég lokaði hliðinu, og 8 stykki sá ég ofar í Skarðsdalnum. Þetta eru 61 rollur og lömb, sem ég sá frá veginum, eins og áður segir, sennilega eru þær fleiri. Er ekki orðið tímabært að gera eitthvað í málinu, smala og láta Fljótabændur að leysa gripina út?

7. ágúst.  Að gefnu tilefni. Ég hefi fengið nokkrar ábendingar um "Hann setti svip á bæinn", um hvaða persónur ég ætti að velja osfv.  En aðferð mín er einföld, hvað valið viðkemur. Ég fletti skránni yfir elstu filmurnar í safni mínu (Kristfinns), það er yfir glerplöturnar, og þegar kemur að einhverri persónu sem ég man eftir, er mér er minnisstæð, og ég veit að vakti athygli. Ekki endilega að viðkomandi hafi skilið eitthvað eftir sig ,annað en minninguna. S.K.

7. ágúst. "Hann setti svip á bæinn"  Guðjón H Magnússon vélstjóri. Átti lengi heima í Ásgeirsbragganum (nálagt þeim stað sem norðurendi Túngötu er nú). Guðjón var lengst af á sjónum en vann þó að jafnaði, öll venjuleg störf er til féllu í landi. Þetta var dugnaðarforkur, og nokkuð áberandi í góðra vina hópi. Guðjón var fæddur 22. mars 1901 Mig minnir að hann hafi flutt héðan frá Siglufirði þegar síldin hvarf ásamt atvinnu, suður til Vestmannaeyja.