|
Unglingabúðir Lions 2005.
Lionshreyfingin heldur árlega unglingabúðir um
allan heim í anda fyrsta markmiðs hreyfingarinnar “Að vekja og efla anda
skilnings og trausts meðal þjóða.” Föstudaginn 8. júlí komu til landsins
fjórtán unglingar frá 12 löndum í Evrópu og munu þeir dvelja hér á landi
í þrjár vikur.
Á þessum tíma gefst þeim einstakt tækifæri
til að kynnast jafnöldrum sínum frá öðrum þjóðlöndum, viðhorfum þeirra
og menningu. Með dvöl í ókunnu landi gefst einnig ómetanlegt tækifæri
til að kynnast þeirri þjóð sem sótt er heim.
Eftir komuna til landsins dvelja
unglingarnir í viku hjá fjölskyldum á Akranesi og í Borgarnesi. Þá tekur
við tólf daga dvöl í Íslensku unglingabúðunum sem í ár eru að Hólum í
Hjaltadal. Dvöl þeirra hér á landi lýkur síðan í Reykjavík.
Lionsklúbbarnir á Ströndum og Norðurlandi
vestra sjá að þessu sinni um unglingabúðirnar, og er nafn þeirra “North
power”. Unglingarnir koma að Hólum föstudaginn 15. júlí og þá um kvöldið
verður haldin opnunarhátíð. Næstu daga á eftir munu þeir síðan ferðast
um svæðið eftir fjölbreyttri dagskrá sem klúbbarnir hafa sett saman hver
á sínu starfssvæði. Meðal annars verður skoðuð náttúra og dýralíf og
farið gönguferðir, siglingar, jeppaferð, og veiði auk þess sem
byggðarlögin á svæðinu verða skoðuð, söfn og fyrirtæki heimsótt.
Á kvöldvökum kynna unglingarnir sig og sína
heimalönd fyrir hópnum en einnig munu þeir m.a. hitta íslenska jafnaldra
sína og heimsækja aldraða.
Í tengslum við unglingabúðirnar verður
haldin fjölskylduhátíð Lionsklúbbanna á svæðinu, með leik, skemmtum og
grillveislu laugardaginn 23. júlí.
Allar upplýsingar um unglingaskipti Lions
er að finna á heimasíðu Lions (
http://www.lions.is
) og tengil fyrir heimasíðu unglingabúðanna er að finna á
heimasíðu Lionsklúbbs Siglufjarðar (
http://frontpage.simnet.is/siglolions/ ).
Á Ströndum og Norðurlandi vestra eru
starfandi níu Lionsklúbbar. Lkl. Hólmavíkur, Lkl. Bjarma á Hvammstanga,
Lkl. Blönduóss, Lkl. Skagastrandar, Lkl. Skagafjarðar, Lkl. Björk á
Sauðárkróki, Lkl. Sauðárkróks, Lkl. Höfða á Hofsósi og Lkl.
Siglufjarðar.
|
