Lífið í Júlí 1-9 2005 | Lífið í júlí 10-16 2005 | Lífið í júlí 17-23 2005 | Lífið í júlí 24-31 2005

>>>>>>>>>>> Lífið í júlí 10-16 2005

Laugardagur 16. júlí 2005 Vegna uppfærslu á ADSL kerfi Símans hafa verið nokkrar truflanir á ýmsum svæðum Internetsins, meðal annars bitnaði þetta á svæði því sem Lífið á Sigló er á, þannig að sambandsstreymi var nánast ekkert og stundum alls ekkert á tímabili í gær. --
Beðist er velvirðingar vegna þessa

Laugardagur 16. júlí 2005  Tónleikar í kvöld kl 22-01 á Hressó í Reykjavík, þar koma fram þeir Víðir (Venna Hafliða) og Gotti (Stjána Elíasar) --  Liðin eru 10 ár síðan þeir leiddu saman hesta sína og ætla þeir að spila lög sem þeir hafa samið í sameiningu og með öðrum í bland við þeirra uppáhaldslög. Það má því heyra lög sem þekkt eru vegna flutnings, meðal annars PLUNGE, Daysleeper, Spektra, Dire Straits, Pearl Jam, Alice in chains, U2 ofl. ofl..

Laugardagur 16. júlí 2005  Fjör var  í gær, þar sem Stúlli og Kaupmannafélagið buðu upp á lifandi tónlist á sviðinu á Torginu. Hann fékk reyndar óvænta aðstoð þar sem fyrst kom Hallvarður Óskarsson og tók nokkur lög með Stúlla, en Halli er hér á ættarmóti í heimsókn, og síðar tók Kristján Dúi Benediktsson nokkur lög með Stúlla.

Laugardagur 16. júlí 2005  Einmanna fugl, sem var á lóðinni við Síldarminjasafnið og fylgdist með umferðinni, akandi og gangandi og virtist ekkert óttast.
Ef til vill var fuglinn eitthvað dasaður, um það veit ég ekki, frekar en ég sé viss um hvort þetta sé æðarfugl.

Föstudagur 15. júlí 2005 Miðað á rækju, sem verið var að taka úr frystigám í sekkjum til flutnings í verksmiðju Þormóðs Ramma Sæbergs í morgun

Föstudagur 15. júlí 2005 Óvenjulega staðsetning lögreglunnar í fjörunni í Hvanneyrarkrók um klukkan 23:06 í gærkveldi er ég var að búa mig undir að fara að sofa, en þarna er lögreglan að hafa afskipti af veiðimönnum sýndist mér.(?)
Mér var sagt frá annarri óvenjulegri staðsetningu lögreglu í gær (óstaðfest) um að lögreglubifreiðin hafi verið að koma ofan úr Hvanneyrarskál. Ekki reyndi ég í morgun að ná sambandi við lögreglu til að afla upplýsinga, þar sem ekki er ástæða til að ónáða Neyðarlínuna vegna forvitnilegra spurninga.

Föstudagur 15. júlí 2005  SKARÐSNEFND AÐ STÖRFUM.  Á fundi bæjarráðs þ. 23 mars s.l. var samþykkt eftirfarandi tillaga frá Ólafi Kárasyni:   “Bæjarráð Siglufjarðar skipi 3ja manna nefnd til þess að yfirfara og gera tillögur til framtíðar um rekstur skíðasvæðisins í Skarðsdal og framkvæmdir.”
     Síðar skipaði bæjarráð eftirtalda fjóra menn í nefndina:
Kristján L Möller sem er formaður hennar, svo og Hjört Hjartarson, Hauk Ómarsson og Ólaf Jónsson.
     Nefndin hefur haldið nokkra fundi og viðað að sér gögnum frá ýmsum aðilum innan bæjar og utan. Verið er að vinna fyrstu tillögur / áfangaskýrslu vegna nauðsynlegra framkvæmda sem nefndin telur að vinna þurfi í sumar til að tryggja rekstraröryggi svæðisins.
      Á síðasta fundi var ákveðið að auglýsa starf nefndarinnar á " Lífinu á Sigló " og gefa bæjarbúum svo og öðrum áhugasömum skíðaiðkendum kost á að koma skoðunum sínum og tillögum á framfæri við nefndina, og er það hér með gert.
       Áhugasamir aðilar geta sent formanni nefndarinnar tillögur sínar eða vangaveltur í tölvupósti á netfangið klm@althingi.is
       Eins og áður sagði verður áfangaskýrslu skilað í næstu viku og því nauðsynlegt að bregðast hratt við vegna framkvæmda sumarsins, en framtíðarstefnan og tillögur um rekstur svæðisins mega koma síðar.
       Sendendum er bent á að þeir geta óskað nafnleyndar á tillögum sínum ef þeir óska þess þ.e. þá verða þær ekki lagðar fram undir nafni viðkomandi, þó svo að formaður nefndarinnar viti nafn sendanda.
       Með von um jákvæðar undirtektir   --    Kristján L Möller formaður Skarðsnefndar.

Föstudagur 15. júlí 2005 Starfsmenn Áhaldahúss Siglufjarðar hafa undanfarnar vikur verið að vinna undirvinnu undir fyrirhugaðan gervigrasvöll sem mun verða á skólabalanum. Búið er að steypa niður staura og Helgi Magg pípari og co eru í óða önn að leggja hitalagnir, því að völlurinn verður hitaður upp. Fljótlega verður svo byrjað á að leggja hellur og kantsteina meðfram vellinum.

Föstudagur 15. júlí 2005  Starfsmanna inngangur í neðra skólahús hefur verið lagfærður og búið er að girða utan um ruslatunnurnar. Grunnskólinn tekur þátt í grænfánaverkefninu og hluti af því er að flokka þann úrgangs sem frá þeim kemur. Gert er ráð fyrir að í ruslatunnu portinu verði sér tunnur fyrir lífrænan úrgang og pappír og svo þann úrgang sem ekki er hægt að flokka. Vinnuskólinn sá um verkið.

Föstudagur 15. júlí 2005 Inngangur að búningsklefum og sturtuaðstöðunni á Hóli hefur verið lagfærður. Starfsmenn vinnuskólans voru í óða önn að leggja lokahönd á verkið í gær. Stóra tréð á myndinni var flutt fyrir nokkrum dögum í nýja trjábeðið og á að veita KS lukku í næstu leikjum og hefur vakið stormandi lukku að sögn Arnar garðyrkjufræðings.
ES. Eftir fá ár verður lítið útsýni hjá þeim sem venjulega eru í hornherberginu yfir trénu ? 

Föstudagur 15. júlí 2005 Snjóbráð er ör þessa dagana og snjórinn í fjöllunum  óðum að hverfa, þessa mynd tók ég í gær af austurfjöllunum, sem sýnir prófíl annarra "fjalla" sem snjóbráðið hefur myndað

Fimmtudagur 14. júlí 2005  Maður mánaðarins að mati Kaupmannafélags Siglufjarðar ver að þessu sinni Íris Gunnarsdóttir, meðal annars fyrir sína þrautseigu og elju, fyrir geisladisk sinn sem hún hefur nýlega gefið út, svo og fyrir félagsstörf.

Fimmtudagur 14. júlí 2005  Kaupmannafélagið: Fyrirtæki mánaðarins,  var að þessu sinni hið glæsilega gistihús Gistihúsið Hvanneyri sem Álfhildur Stefánsdóttir hefur rekið undanfarin ár. En gistihúsið, aðstaða og þægindi eru örugglega með því albesta sem þekkist á gistiheimilum landsins. --  Sem dæmi; þá átti Franskur blaðamaður sem hér var fyrir nokkru í sumar, vart orð yfir ánægju sína eftir gistingu þar..
Á myndinni eru formaður Kaupmannafélagsins Freyr Sigurðsson og Álfhildur, við afhendingu viðurkenningarinnar.

Fimmtudagur 14. júlí 2005 Nú á dögunum voru hér á ferð þrír breskir fuglamerkingamenn sem eru að rannsaka atferli jaðrakana. --- Ungar og fullorðnir fuglar eru merktir víða um lönd og ferðir þeirra skoðaðar og skráðar. Lesendur fréttasíðu Steingríms muna eflaust eftir fuglinum sem náðist á mynd í apríllok hér í vor og hafði hann verið merktur á Englandi 1998 og sést síðan hér í firðinum árið 2000. Á myndinni hér til hliðar er Peter Potts með ófleygan jaðrakagunga sem hann merkti þriðjudaginn 12. júlí 2005 á Siglufirði.   ÖK

Fimmtudagur 14. júlí 2005 Íslenskar hænur. Mér var send þessi mynd í gærkveldi, en hún var tekin á Lambanesi nú fyrir stuttu. Það er orðið langt síðan ég hefi barið slíka fugla augum, bæði á mynd og í raunveruleikanum.
Þetta minnir mig á unglingsárin þegar hænsnabú með 2-3 hænum og hönum upp í fjölmargar, var við annað hvort hús á eyrinni, meðal annars í næsta húsi, (fyrir ofan Mjóstræti 1 þar sem ég fæddist og ólst upp) hjá Sæunni og Jóhannes, og gott ef ekki einnig hjá Páli og Ingibjörgu Mjóstræti 2 - sem nú heitir Pálshús. -- Ljósmynd: Óskar Berg Elefsen.

Miðvikudagur 13. júlí 2005 "Óvissuferð" -- Þetta er fleytan hans Örlygs Kristfinnssonar, sem loksins er kominn í langþrátt frí.  Varla er hann að fara í langt frí á þessum farskjótta sínum með hluta af fjölskyldu sinni, en Örlygur er mikill fugla og náttúru unnandi, og ætlar eflaust að miðla .þekkingu sinni á meðal þeirra yngstu um borð, en margt er að sjá hér innanfjarðar, mun meira en ókunna grunar.

Miðvikudagur 13. júlí 2005  Aðsent:   Ágæti viðtakandi.  Fyrir hönd Lionsklúbba á Ströndum og Norðurlandi vestra sendi ég fréttatilkynningu um alþjóðlegar unglingabúðir Lions á Íslandi 2005 sem haldnar verða á Hólum í Hjaltadal næstu vikur. Með tilkynningunni sendi ég einnig mynd frá Hólum í Hjaltadal frá Ásgrími Sigurbjörnssyni á Sauðárkróki. Með bestu kveðju, Eiríkur Loftsson félagi í Lionsklúbbi Sauðárkróks bein@simnet.is  s. 453 6422 gsm 899 6422
Ath. Nefnda tilkynningu er að finna HÉR  -- en ég vil geta þess að hún flýtur hér inn þar sem hún er tengt Siglfirðingum, Lion á Siglufirði, -  Ásgrími og fleirum. -- (Lífið á Sigló)
En ég vil í leiðinni leiðrétta landlægan misskilning: Siglufjörður tilheyrir Norðurlandi eystra, sögulega og landfræðilega (Eyjafjarðarsýsla) 

Miðvikudagur 13. júlí 2005 Enginn friður er fyrir þessum ljósmyndurum, þeir skjóta á allt sem fyrir augun ber, jafnt á áhugasama húseigendur sem vinna við að dytta að húsi sínu, eða annað sem þeim dettur í hug
Þarna var unnið á fullu í gær  við að einangra norðurhliðina á Hvanneyrarbraut 66b.
Myndin er tekin frá svölunum heima. SK

Miðvikudagur 13. júlí 2005 Línunnar vitjað. Í gær um klukkan 14:45 var þessi bátur Ásdís Ólöf SI 23 2069 að draga línu sem hann lagði í fyrrakvöld. Ekki veit ég um aflann, en þær 10 mínútur sem ég fylgdist með honum fá svölunum mínum heima, var nánast fiskur á krók. Sennilega var þarna um ýsu að ræða, en greinilegt var þó að einn og einn steinbítur kom á krókinn.

Þriðjudagur 12. júlí 2005 Það Óhapp varð í fjöruborði Innri hafnarinnar þegar verið var að koma fyrir olíuvagni í flutningapramma, að fjörusandurinn lét undan annarsvegar með þeim afleiðingum að vagninn fór á hliðina. Nokkuð magn af dísilolíu rann úr tanknum í fjöruna og síðan í sjóinn, en vegna snarræðis verktakans sem sótti nálæga gröfu, tókst honum að koma í veg fyrir að tankurinn tæmdist. Allt til þess ætlað lið var hvatt út, það er starfsmenn slökkviliðsins hafnarvörður, lögregla ofl. sem hafa þann starfa að koma veg fyrir að olía dreifist við slík óhöpp. Björgunarsveitarmenn frá Strákum, sögðu þó að þetta væri varla svo mikið magn sem í sjóinn hefði farið að tæki því að reyna að ná einhverju af olíunni upp, en þetta væri ágæt æfing sem gæfi mönnum vísbendingu um hvað betur mætti fara. Olían átti að fara með prammanum til Héðinsfjarðar sem eldsneyti á vinnuvélar þær sem þar eru til að hefja vinnu við að undirbúning Héðinsfjarðarganga. -- Vinstri myndin sýnir aðstæður í fjörunni eftir að vagninn var réttur við, en hin sýnir er slökkviliðsmenn eru að koma búnaði út úr Slökkvistöðinni. sem leiðir svo huga að því hvort sá staður sé sá rétti fyrir þennan búnað ? --- "Strákar" hafa ákveðna skoðun á því.

Mánudagur 11. júlí 2005  Þjóðlagahátíðinni lauk í gær, en  fyrir hádegið var flutt verkið Leyndir sálmar í Gránu. Flytjendur voru: Eva Zöllener og Kristján Orri Sigurleifsson. Og í kirkjunni eftir hádegið kom fram Sinfóníuhljómsveit unga fólksins.     

Mánudagur 11. júlí 2005
Þórarinn Vilbergsson
er 86 ára í dag