Vísir 40 ára | Kaupfélagið

>>>>>>>>>>> Vísir 40 ára

KARLAKÓRINN VÍSIR

40 ára

Þann 22. janúar síðastliðinn voru liðin 40 ár frá því að Karlakórinn Vísir var  formlega stofnaður Í þessi 40 ár hefur kórinn starfað næstum óslitið, en með  misjöfnum krafti svo sem eðlilegt er. En mörg eru þau skipti, sem kórinn hefur  skemmt bæjarbúum með söng sínum.•og margir eru þeir orðnir kórfélagarnir,  sem yndi og ánægju hafa sótt í söngstarfið í Vísi þessi 40 ár.

Aðalhvatamaður að stofnun Vísis og fyrsti stjórnandi var Halldór Hávarðarson. Söngstjórar eftir hann hafa verið Tryggvi  Kristinsson, Þormóður Eyjólfsson, sem var stjórnandi í samfellt 24 ár,  Haukur Guðlaugsson. Síðan 1955 hefur kórinn ekki haft fastan  söngstjóra fyrr en sl. haust, að Gerhard Schmidt réðst til kórsins sem  söngstjóri, en Gerhard kom, sem kunnugt er, hingað til Siglufjarðar  haustið 1961 og hefur starfað sem kennari við Tónskóla Siglufjarðar  og stjórnandi Lúðrasveitar Siglufjarðar. Í haust var hann ráðinn  skólastjóri Tónlistarskólans, sem nú starfar á vegum hinna beggja  skólanna, sem nokkur undanfarin ár störfuðu sitt í hvoru lagi.

Gerhard Schmidt núverandi söngstjóri Vísis

Á tímabilinu f rá 1955 hefur Vísir þó komið fram við ýmis tækifæri og þá notið  stjórnar Páls Erlendssonar, Sigursveins D. Kristinssonar og dr. Róberts A. Ottóssonar.  Hve góður kjarni Vísis er, sést best á því, að við þetta tækifæri hefur hann getað sungið  sómasamlega án mikilla æfinga.

Í vetur hefur kórinn æft af miklu kappi undir stjórn Gerhards Schmidt, og síðustu  vikurnar hefur hinn ágæti söngkennari Vicendo M Demetz raddþjálfað kórmenn  Sl.laugardag var svo afmæliskonsertinn haldinn í Nýja Bíó fyrir troðfullu húsi og við ágætar undirtektir áheyrenda. Áður en konsertinn hófst flutti  Jóhann Jóhannsson, skólastjóri, hátíðarávarp og kórinn söng: Ég vil elska mitt land.

Á söngskrá voru íslensk og erlend lög, þar á meðal eitt eftir söngstjórann, Gerhard  Schmidt, og hafði hann einnig raddsett um helming laganna á söngskránni. Einsöngvarar voru þeir Sigurjón Sæmundsson og Guðmundur Þorláksson.

Við flutning, seinni hluta söngskrárinnar naut kórinn aðstoðar kvennakórs og  hljómsveitar, sem skipuð var Lúðrasveit Siglufjarðar og tónlistarnemendum á  fiðlur, flautu og saxófóna. Einnig léku þeir Ragnar Páll Einarsson og Þórhallur Þorláks-son með í tveim lögum, á gítar og  harmonikku.

Flutningur kórverka með hljómsveitarundirleik er alger nýjung, í tónlistarlífi bæjarins,  tilraun, sem margir höfðu vantrú á að tækist.

Ekki skal hér lagður dómur á söng né leik kórs og hljómsveitar. En fullyrða má, að  söngur Vísis snerti á ný strengi í brjóstum Siglfirðinga og minnti á gamla daga, þegar hann  söng af hvað mestum þrótti til yndis og ánægju. Samleikur kórs og hljómsveitar er vísir að  enn fullkomnari flutningi og túlkun tónlistar en hér hefur áður

þekkst. Og víst er, að áheyrendur tóku þessari nýbreytni með þökk og fögnuði, og varð  kórinn að endurtaka óperukórana tvo, sem Demetz stjórnaði, svo og fleiri lög á söngskrá  kórsins. Að sjálfsögðu hafði G. Schmidt útsett fyrir hljómsveitina og æft hana.

Er það von allra, sem tónlist unna, að þessi vísir, sem sprottinn er upp af  tónlistarkennslu næstu undanfarinna ára, megi þroskast og dafna á komandi árum, og er  þá víst, að í söng- og tónlistarmálum landsins mun Siglufjörður skipa háan sess. Í öllum  góðum afmælisóskum til Karlakórsins Vísis 40 ára felast því óskir um, að áfram verði haldið á þeirri braut, sem þegar er mörkuð í tónlistaruppeldi barnanna í Siglufirði.

Fjölmennt afmælishóf var haldið á laugardagskvöldið. Var þar mikill söngur og ágæt  skemmtun. Þar flutti Egill Stefánsson afmælisræðu, en Egill er einn af stofnendum Vísis  og hefur starfað óslitið með kórnum frá byrjun. Fjöldi heillaskeyta hafði borist og voru  þau lesin upp.

Formaður Vísis er Sigurjón Sæmundsson. Aðrir í stjórn eru Daníel Þórhallsson,  Guðmundur Jónasson, Egill Stefánsson og Sigurður Gunnlaugsson.