Glæsilegir keppendur, glæsileg hross!

Vegur hestamennskunnar hefur vaxið mikið hér á Siglufirði undanfarin misseri.  Nú er svo komið að Glæsismenn eru farnir að láta að sér kveða á keppnisvöllunum.  Þau feðgin Haraldur Marteinsson og Katrín Dröfn Haraldsdóttir hafa undanfarið gert innrás í vöggu hestamennskunnar á Sauðárkróki og tekið þar þátt í 2 mótum.  Í fyrra skiptið, 8 febrúar, var sterkt töltmót í Svaðastaðahöllinni þar sem Haraldur og (g)Óður náðu 3 sæti og Katrín og Skorri hennar náðu 4 sæti.  Þessi árangur er sérlega glæsilegur í ljósi þess að þarna var um nokkuð sterkt og fjölmennt mót að ræða.  Árangur Katrínar verður að teljast sérstaklega glæsilegur þar sem hún keppti í opnum flokki við fullorðna og atvinnumenn,! lofar sannarlega góðu á landsmótsári.  Nokkuð mjótt var á mununum milli þeirra feðgina og slapp Halli með skrekkinn, en spakir menn telja að Katrín slái honum við þegar líður á sumarið!

Seinna mótið var svo um nýliðna helgi (27. feb) og var liður í “Skagfirsku mótaröðinni”  Þar kepptu þau bæði í fjórgangi og tölti.  Á þessu móti voru á fjórða tug keppenda, mest atvinnumenn.  Halli gerði sér lítið fyrir og náði í 3ja sætið á Óði í tölti og fjórða sætið í fjórgangi.  Katrín hafnaði í 14. sæti í fjórgangi og 27. sæti í tölti og skaut þar mörgum atvinnumönnum afturfyrir sig.  Þetta mót var liður í fjögurra móta mótaröð sem líkur í apríl með mikilli hátíð, hestamenn á Siglufirði eru stoltir og spenntir að sjá hvernig þeim feðginum gengur í framhaldinu.

Það er að frétta af mótahaldi í Siglufirði að í mars verður að líkindum innanfélagsmót þar sem við hinir ætlum að gera harða atlögu að þeim feðginum, fréttsit hefur að Sölvi Sölvason og sonur ævi seint á kvöldin og einnig er Símon Helgi Símonarson að bauka eitthvað eftir að myrkra tekur.  Fleiri munu renna augum til Halla og Katrínar og hugsa sér gott til glóðarinnar.  Síðar í sumar verða svo fleiri mót, Stefánstölt þar sem keppt er um veglegan bikar, hestadagar á Hofsósi, firmakeppni, auk fleiri móta.  Stefnt er að að halda síðan kappreiðar um leið og ný hlaupabraut sem Stefán Einarsson verktaki er að leggja fyrir Glæsi verður tilbúin, vonast er til að sprækustu skeiðhestar okkar Glæsismanna verði ekki orðnir of gamlir þegar sá sprettur hefst! 

Með bestu kveðju

Sævaldur Jens Gunnarsson