Lífið í maí 1-9 2004 | Lífið í maí 10-16 2004 | Lífið í maí 17-22 2004 | Lífið í maí 24-31 2004

>>>>>>>>>>> Lífið í maí 10-16 2004

16. maí 2004 "Árgangur ´40" er hér um helgina. Og í morgun klukkan 11, nákvæmlega upp á dag,- fyrir 50 árum var þessi hópur fermdur í Siglufjarðarkirkju. Hópurinn hlýddi á orð sóknarprestsins inni í kirkjunni um stund, síðan fékk ég hópinn til að stilla sér upp á kirkjutröppunum, og tók þessa mynd af þeim. Hópurinn kemur víða að frá landinu, og einnig alla leið frá Bandaríkjunum og Svíþjóð, svo eitthvað sé nefnt. Kirkjunni var færð peningagjöf í tilefni dagsins. 

16. maí 2004 Flutningaskipið ICE LOUISE losaði hér í morgun rækjufarm (frosna) til Þormóðs Ramma.

16. maí 2004  Siglufjarðarmót í svigi og stórsvigi, fór fram í blíðskaparveðri á skíðasvæðinu í "Siglufjarðarskarði" í gær. Eftir mótið var slegin upp pylsu-grillveislu.  Alli vinur minn sendi mér frábærar myndir frá mótinu, sem þú sérð ef þú smellir á myndina

14. maí 2004  Kiwanis klúbburinn Skjöldur á Siglufirði, afhenti í hádeginu 7 ára krökkum, í samvinnu með Eimskip og Flytjanda, öryggishjálma til varnar krökkunum er þau stíga á reiðhjól, hjólabretti ofl. Afhendingin fór fram í Barnaskólanum. Ég mætti og tók nokkrar myndir sem koma í ljós ef smellt er á myndina.

14. maí 2004  Nú standa yfir framkvæmdir á golfvellinum eins og nokkur undanfarin ár.  Golfklúbburinn hefur í samvinnu við Siglufjarðarbæ og Bás unnið að endurbótum á golfvellinum í 4 ár og hefur völlurinn tekið stakkaskiptum undanfarin ár.    Öll tækjavinna hefur verið unnin af Bás en félagar í G.K.S. hafa unnið annað í sjálfboðavinnu. Nú er verið að fylla í skurði, gera ræsi og bæta aðgengi.

14. maí 2004  Ein gömul: Fisksalarnir Björn Þórðarson og Jósafat Sigurðsson, með stórlúðu á milli sín, framan við Fiskbúðina.

13. maí 2004  Fyrirtækið Bæjarkort Selfossi, sem yfirtók nýlega, fyrirtækið Vegakort. Starfsmenn þess eru nú á yfirferð um landið, til viðhalds hinum ýmsu vega og kynningarkortum sem þeir sjá um- og eru úti um allt land. Þeir voru að störfum í dag við kort Siglufjarðarkaupstaðar vegna viðhalds á uppistöðunum, en skipt verður um kortið sjálft ásamt upplýsingum á næstunni. Þetta eru Jón Kristjánsson og Ingimar Pálsson sem er aðal eigandi fyrirtækisins Bæjarkort.

13. maí 2004 Togarinn Lómur 2 er sloppinn úr farbanninu, - og fór út fjörðinn klukkan 13:00 í dag.

13. maí 2004  Framkvæmdir hafnar í miðbænum. Eins og fólk á Siglufirði, hefur líklega orðið vart við þá eru hafnar framkvæmdir í miðbænum, á torgi og á svæðinu neðan kirkjunnar.  Páll Samúelsson, sem er Siglfirðingum að góðu kunnur,  hefur fengið framkvæmdaleyfi til þess að byggja tröppur og hanna svæðið neðan kirkju og hefur hann fengið BÁS ehf. til þess að framkvæma verkið fyrir sig.  Páll ákvað að ráðast í framkvæmdina til minningar um foreldra sína er bjuggu hér á Siglufirði.  Framkvæmdin er því samvinnuverkefni bæjarins og Páls en hann mun bera kostnað af þessu verki.  Leyfi til framkvæmda var gefið af tækni – og umhverfisnefnd.   Teikningar af hönnuninni má sjá á bæjarskrifstofu en um mjög athyglisvert verkefni er að ræða.  Jafnframt eru að hefjast framkvæmdir við torgið en ákveðið hefur verið að taka upp þær hellur sem fyrir eru og breyta hönnun lítillega þannig að lagðar verða hellur í kross yfir torgið ásamt því að umhverfið verður snyrt til.  Arnar H. Jónsson mun stýra þessu verkefni en áætlað er að því ljúki í júní.

13. maí 2004  Það eru ekki allir sem átta sig á því hvar þessi mynd er tekin. Sveinn Þorsteinsson sendi mér nokkrar myndir sem þið sjáið ef þið smellið fyrst á myndina. og síðan hér. Þá komist þið að því hvar myndin er tekin,- og hvers vegna. 

13. maí 2004  Ein gömul. Þetta var þegar "ekki tók því" að moka göturnar, því það snjóaði jafnóðum, betra var að þjappa snjóinn !  Þarna er Gunnar Þórðarson símvirki ásamt símajeppanum á Grundargötunni, sennilega er myndin tekin 1962 (bygging Pósthússins stendur yfir)

12. maí 2004 Þetta eru þeir Höskuldur Ástmundsson og Aðalsteinn Oddsson, en þeir voru að taka upp og ganga frá grásleppunetum sínum, en flestir "grásleppukarlarnir" munu hafa tekið upp net sín. Báturinn Anna SI 6 sést hér í Innri höfninni, og þeir uppi á kantinum.

12. maí 2004  Ég mætti þessum heiðurshjónum á Langeyrarveg ("frammi á firði") í morgun, en þau höfðu fengið sér göngutúr í góða veðrinu. Þetta eru Ingimar Þorláksson og Elsa Björnsdóttir

12. maí 2004 Togarinn Lómur 2 sem losaði hér í gær tæp 300 tonn af rækju, er hér ennþá en sagt er, samkvæmt óstaðfréttri frétt kyrrsettur hér vegna kröfu frá KB-Banka.

12. maí 2004 Ein gömul: Þær settu Siglufjörð í efsta sæti, á sínum tíma. Árdís Þórðardóttir og Sigríður Júlíusdóttir.

11. maí 2004  Svona fara þeir að hjá SR-Vélaverkstæði á Siglufirði. Þegar þarf að gera við eða breyta botni á skipi. Aðsent Ó.B.E.
Smelltu á myndina

11. maí 2004 Örlygur er kominn heim með hin eftirsóknalegu verðlaun frá Aþenu, sem Síldarminjasafnið fékk frá Safnaráði Evrópu (European Museum Forum). Á gripnum stendur: EUROPIAN MUSEUM OF THE YEAR AWARD  og  LUGI MICHETTI AWARD 2004. Þetta eru önnur aðalverðlaunin, sem veitt eru í þeim tilgangi að veita bestu söfnunum í Evrópu viðurkenningu. Við Siglfirðingar getum verið stoltir af þeim mönnum sem barist hafa  fyrir þeim árangri sem nú þegar hefur áunnist, en mikið verk er þó framundan. Myndin er tekin í Síldarminjasafninu, Gránu í morgun.

11. maí 2004 Þrír rækjutogarar voru að landa rækju til Þormóðs Ramma. í morgun. Togararnir Mánaberg og Sólberg, sem öllu jöfnu losa hér einu sinni í viku, og  Íslensk / Litháenskur togari Lómur 2, sem er í eigu Guðmundar Hólm Svavarssona (barna barn Hólm Dýrfjörð) með um 300 tonn af rækju. Skipstjórinn er Þórður Björnsson og vélstjórinn Jón Engilbert Sigurðsson, báðir Siglfirðingar. Togarinn tekur hér 500 tonn af olíu

11. maí 2004  Aðsent:  Sæll Steingrímur.- Ég er ein af þeim sem finnst gaman að skoða síðuna þína. - Mér datt í hug að senda þér myndir sem teknar voru á heimili mínu í mars s.l.- Við hittumst hér um hádegi á sunnudegi, nokkrir afkomendur Þórhallar og Jónasar Björnssona, svona rétt til að tapa ekki hvort öðru. -Á myndunum eru frá vinstri talið: Aftari röð: Bettý Gunnarsdóttir (dóttir Halldóru Jónasdóttur), ég, Jóna Hrefna Bergsteins, (dóttir Guðrúnar Jónasdóttur) Aðalsteinn Valdimarsson (sambýlismaður Hönnu Þóru), Hanna Þóra Lúðvíksdóttir (dóttir mín), Margrét Halla Lúðvíksdóttir (dóttir mín) með mánaðargamlan son sinn Kristján Snæ Friðriksson í fanginu, Fríða Sjöfn Lúðvíksdóttir (dóttir mín), Rakel Björnsdóttir (Jónassonar), Halldóra Jónasdóttir (Björnssonar) og maður hennar Gunnar Trausti Guðbjörnsson Fremri röð:
Edda Rósa Gunnarsdóttir (dóttir Dóru), Adam Jarron (sonur Eddu Rósu), Arna Mjöll Óðinsdóttir (dóttir Bettýjar), Andri Jarron (sonur Eddu Rósu), Gerður Dóra Aðalsteinsdóttir (dóttir sambýlismanns Hönnu Þóru), Arnór Heiðar Benónýsson (sonur Fríðu Sjafnar), Lúðvík Ragnar Friðriksson (sonur Margrétar Höllu), María Lísa Thomasdóttir (dóttir Rakelar) og Björn Thomasson (sonur Rakelar).   Með kveðju, Anna Laufey Þórhallsdóttir

10. maí 2004  Í dag voru formlega afhentir styrkir úr Menningar og viðurkenningarsjóði KEA, á Akureyri. Ég var þar mættur ásamt fulltrúa frá Lion og Kór aldraðra á Siglufirði, Vorboðanum - til að taka þar á móti styrk / viðurkenningu frá sjóðnum. Þessi mynd er af þeim hluta hópsins er hlutu styrk vegna menningarmála. Nánari upplýsingar á vefnum www.kea.is   En Siglfirðingarnir á þessari mynd eru Hörður Hjálmarsson Lion, Steingrímur Kristinsson Ljósmyndasafn og Sveinn Björnsson Vorboðinn.  Ljósmynd: Óskar Þór Halldórsson. http://athygli.disill.is/Index/Forsida/view.aspx? .