Lífið í maí 1-9 2004 | Lífið í maí 10-16 2004 | Lífið í maí 17-22 2004 | Lífið í maí 24-31 2004

>>>>>>>>>>> Lífið í maí 1-9 2004

9. maí 2004 Nýtt fréttaskeyti frá Evrópu - Safnið okkar hlýtur verðlaun !    Síldarminjasafnið hlaut önnur aðalverðlaun Safnaráðs Evrópu (European Museum Forum) sem eru Micheletti verðlaunin sem veitt eru fyrir framúrskarandi safnstarf á sviði vísinda, iðnaðar eða tækni. Aðalverðlaunin, "Safn Evrópu ársins 2004" hlaut hið mikla og glæsilega fornminjasafn í Alicante a Spáni. Þriðju verðlaunin voru á vegum Evrópuráðsins komu í hlut Heilsugæslusafnsins i Edirne i Tyrklandi. Þess má geta að allt að 40 Þúsund söfnum víðsvegar i Evrópu stendur til boða þátttaka i þessari virtu keppni. 45 söfn, sum afar stór og öll mjög glæsileg voru í þessari úrslitakeppni í Aþenu G.P.

9. maí 2004 Athygliverð grein, sem ég fékk senda í gærkveldi, grein sem varðar ferðamál á Siglufirði. Greinin hefst með þessum orðum:

       Ég hef um nokkurt skeið haft í hyggju að skjóta ýmsum hugmyndum að heimamönnum hvernig festa má Siglufjörð betur í huga manna sem verðugan áfangastaða ferðamanna. Þetta geri ég að sjálfsögðu til að ég og mínir geti haft það ennþá betra þegar við dveljum á Siglufirði, en líklegt er að þetta geti dregið miklu fleiri ferðamenn til Siglufjarðar, sem margfaldar áhrifin.  meira

9. maí 2004 Kóramót eldri borgara á Norðurlandi, var haldið á Siglufirði í gær Laugardag í siglufjarðarkirkju. Þar voru mættir kórar eldriborgara frá Húsavík, Akureyri, Skagafirði, Dalvíkurbyggð og Hrísey auk frá Siglufirði.
Meðfylgjandi mynd er af Kór félags eldriborgara á Akureyri.
Einnig nokkra myndir sem Guðný Friðriksdóttir tók. Smelltu á myndina

9. maí 2004 Allinn, er nafn það sem Guðmundur Davíðsson forðum gaf Alþýðuhúsinu formlega nýtt nafn með því að skrifa á stafn þess stórum stöfum nafnið;  "Allinn". -  Annan desember á síðastliðnu ári seldi Guðmundur eign sína "Allann" og afhenti nýjum eigendum staðinn, sem eru hjónin Ólafía Ingibjörg Sigríður Guðmundsdóttir, sem allir þekkja sem "Lóu" - og maður hennar Haraldur Björnsson. Reksturinn hefur gengið vonum framar og ljóma þau af ánægju, en bæði hafa starfað lengi sem launþegar í veitingageiranum, og töldu sig fær um að sinna slíku á eigin spýtur. Þjónusta þeirra er fjölbreytt; auk almenns veitingarekstur, dansleikja, fjölbreyttan mat í hádeginu og á kvöldin, bjóða þau upp á veislur, bingó, spilavist, billjard (en nýr biljard klúbbur hefur verið stofnaður) Þá er staðurinn tilbúinn til að taka við og þjóna hinum árlegu "árgangsmótum" brottfluttra Siglfirðinga.. Og þá má nefna samstarf "Stöðvarinnar" og Allans, ef einhver hefur áhuga á Pizzuveislu. Og nefndu það, þau eru til í allt, sem lífgað getur upp á lífið á Sigló. Myndin er af þeim hjónum, ásamt lukkugrísnum.

9. maí 2004  Píluklúbbur Siglufjarðar hélt stigamót í Allanum í gærdag. Þetta er liður í stigakeppni á landsvísu, en Siglufjarðarklúbburinn er í "landssambandinu" Ég kom þar við, er mótið stóð sem hæst og tók nokkrar myndir sem þú sérð ef þú smellir á myndina

9. maí 2004  Ein gömul: Þeir höfðu í ýmsu að snúast lögregluþjónarnir í "gamla daga" en þó alls óskyldum verkefnum en nú í dag, af sumu leiti að minnsta kosti. Þessi mynd sýnir lögregluþjóninn Braga Magnússon dorga einn af mörgum kajökum, sem sökkt hafði verið frekar en að láta hann lenda í "höndum óvinarins",  sem var löggan í þessu tilefni. Mynd þessi er tekin árið 1965 er stórir ísjakar lónuðu hér innanfjarðar og strákarnir í Bakka og á Eyrinni smíðuðu sér kajaka í tugatali og sigldu stoltir á milli ísjakanna. Þetta var ekki vel liðið af foreldrum og eða "kjaftakerlingunum" sem hringdu gjarnan í lögguna þegar, til drengjanna sást. Þessi siður drengjanna var þekkt fyrirbæri áratugi aftur í tímann, þó lögreglan hefði haft minni afskipti þá, áður en sími kom í hvert hús.

8. maí 2004 Fréttaskeyti frá Grikklandi. Síldarminjasafnið tekur þátt í Ólympíuleikum safna sem fram fer í Aþenu þessa dagana. Eins og hæfir tilefninu var hinn forni leikvangur Grikkja opnaður fyrir keppnina. Fulltrúi safnsins, Örlygur Kristfinnsson, hefur lokið keppni en þar var aðalkeppnisgreinin "alhliða þrek- og fegurðarsýning með hjálpargagni" sem 45 söfn kepptu. Siglfirðingurinn sveiflaði díxli sínum ákaft og var talinn hafa staðið sig þokkalega. Í gær var farið í hof Poseidons, þar sem heitið var á sjávarguðinn að senda okkur aftur síldina á Norðurlandsmið. G.P.

8. maí 2004  Það eru að líkindum, liðin meir en 40 ár, síðan ég fór í heimsókn í fjárhús, þar til í morgun að ég heimsótti Hafstein Hólm. Hafsteinn er með þau sérréttindi að vera eini fjárbóndinn á Siglufirði sem fær að hafa kindurnar sínar innan bæjarmarkanna, en samkvæmt lögreglusamþykkt bæjarins, er slíkt óheimilt. En undanfarnar bæjarstjórnir,- og núverandi hafa leyft þetta, (skriflegt) En Hafsteinn hefur alist upp við svona búskap frá barnæsku. - Er mig að garði, voru þeir feðgar að rýja eina kindina af þeim 7 sem þarna eru, en burður hefur staðið yfir hjá þeim., - og allt gengið að óskum. Á annarri myndinni er Jón Hólm Hafsteinsson og faðir hans  Hafsteinn Hólm Þorleifsson sem heldur á þrílembingum., hin er af einmanna nýrúinni kind,  en lömbin skruppu undir "garðann"  og yfir í hlöðu.

8. maí 2004 Ein gömul: Björn Þór Ingimarsson, Jón Bergsveinsson (Sigurðssonar) og Kristinn Steingrímsson

7. maí 2004  Ein gömul:  Um borð í Haferninum,  Gunnar Tómasson háseti, Sigurjón Kjartansson dælumaður og Steingrímur Kristinsson timburmaður.

6. maí 2004  "Það er margt skrítið í kýrhausnum" Í fréttum og auglýsingum kemur margt furðulegt fram. Á síðastliðnu ári (held ég) komu fram í auglýsingum frá Mjólkursamsölunni, að búið væri að uppgötva það að drekka megi mjólkina sem við höfum drukkið frá fæðingu, ef marka má nafn á umbúðum nefndrar vöru "Drykkjar mjólk" og nú í hádeginu var sagt frá nefnd á vegum forætisráðuneytisins, sem hafði uppgötvað eftir 17 funda setu, "að þeir að lægst launuðu byggju við lökustu kjörin" Þeir eru gáfaðir þessir menn sem eru valdir í nefndir ráðuneytanna !

6. maí 2004  Þetta eru: Helgi Rafn bifreiðastjóri hjá Vörumiðlun og Jón Sigurðsson hjá Olís

6. maí 2004  Skondin auglýsing.  Undanfarnar vikur hafa birst í "Tunnunni" auglýsingar, frá sýslumanni og bæjartæknifræðingi, þar sem áréttað er að skipta frá nagladekkjum bifreiða yfir á sumardekkin fyrir 15. apríl sl. að viðlagðri hættu á sektum. Í gær er Tunnan kom  út var að finna svohljóðandi auglýsingu: "Nagladekkin undir strax, Sýsli og bæjarapparatið. Gleðilegt sumar."

6. maí 2004  Ein gömul:  Á myndinni eru ma. Þorleifur Sigurðsson, Einar Björnsson, Halldór Pétursson, Jörgen Hólm og Eggert Theódórsson. Snorri Dalmar er við stýrið, en svona var fólkinu hjá SR & frystihúsi SR keyrt heim í matartímum (það er suðurbæingum)

 

5. maí 2004  það snjóaði !  Myndin til vinstri sýnir snjóinn sem blasti við mér á stétt minni og tröppum, þegar ég fór út rétt fyrir klukkan 9 í morgun. Hin sýnir upp Gránugötuna stuttu síðar. Það er ekki óvanalegt að snjór komi á þessum tíma árs, en hann er sko ekki velkominn á þessum tíma þrátt fyrir allt. Kannski við pöntum lög fráríkisstjórninni til að banna snjókomu í maí, það væri ekki það vitlausasta.

5. maí 2004 Aðsent: Farið var á hængsmót í boccia 30 apríl - 2 maí. Með í för voru Hulla, Anna, Hrafnhildur, Jóhanna, Anna Lára , Hrefna, Vilborg, Björg, Pálína S., Elsa B., Nanna, og Erna, auk farastjóranna Helgu, Rósu, og Jósteins. Gist var á Leifstöðum sem er frábær staður og öll aðstaða til fyrirmyndar. Keppni gekk vel 5 lið voru skráð í opinn flokk og sigurvegarar voru Snerpa B - Anna Lára, Vilborg, Helga, Í öðru sæti voru lið Snerpu A - Hrefna, Erna,Nanna og í Þriðja sæti Urðu Akur A. Spilað var brigde, vist og Kana fram á nótt og hinn fjölhæfi farastjóri okkar hann Jósteinn Snorrason tók að sér að naglalakka konurnar og varð Kanakóngur. Kveðja Helga Hermannsdóttir

5. maí 2004 Ég kom við á Blönduós á leiðinni heim,- (í gær) og kom þar við í fyrirtækinu  Ísgel. Þar ræður húsum Siglfirðingurinn Guðfinna Ingimarsdóttir, en hún er einn aðal eigandinn ásamt Fríðu Pálmadóttur, en þær stofnuðu fyrirtækið 5. júní árið 1999. Þetta er hlutafélag í blómlegum rekstri. Það eru ekki margir starfsmenn hjá félaginu, enda búnaðurinn nær alsjálfvirkur og það skemmtilega við þann búnað, vélasamstæðuna, en þær stöllur létu framleiða vélina úti í Frakklandi samkvæmt teikningu og hugmynd Guðfinnu. Framleiðslan er kælipokar, fyrir fiskiðnað, íþróttafólk og allt mögulegt. Greinagóð vörulýsing er á heimasíðu þeirra www.isgel.is  Smelltu á myndina og skoðaðu myndir í viðbót.

5. maí 2004  Frá Stjórn Skógræktarfélags Siglufjarðar. Í byrjun apríl var úthlutað styrkjum úr Landgræðslusjóði til verkefna á sviði umhverfismála. Skógræktarfélag Siglufjarðar fékk 250.000 króna styrk sem nota á til kortagerðar á skógræktarsvæðinu og til göngustígagerðar.

5. maí 2004    Sparisjóður Siglufjarðar hefur gert samning við Sigurð Ægisson um ritun sögu Sparisjóðsins frá upphafi til okkar daga. Stefnt er að útgáfu bókarinnar fyrir jólin 2005. Þeir sem kunna að eiga í fórum sínum einhverjar myndir eða áhugavert efni tengt Sparisjóðnum eru beðnir um að hafa samband við Sigurð Ægisson.

1. maí 2004 Myndir frá Sveini Þorsteinssyni frá hátíðarfundi og kaffisamsæti Verkalýðsfélagsins Vöku í "Alþýðuhúsinu" -    Hafþór Rósmundsson bauð bæjarbúa velkomna, boðið var upp á kaffi og meðlæti með svipuðu sniði og og var fyrir 70 árum, þegar Alþýðuhúsið var tekið í notkun.Einnig voru tónlistaratriði, ofl.
Smelltu á myndina.

5. maí 2004  Ein gömul:  Björn Þór Haraldsson og Símon Márusson

5. maí 2004 Ég kom seinnipartinn í gær.  -  Eins og landsmönnum er kunnugt, en ef til vill ekki Siglfirðingum erlendis, þá gekk yfir landið kuldakast, Siglfirðingar fengu ma. að kenna á því, en það snjóaði nokkuð fyrir norðan og austan, sunnlendingar sluppu við snjókomuna, en þar var þó bölvuð nepja. Ég var varaður við á mánudag, og ráðlegt að halda ekki norður í gær (þriðjudag) eins og ég hafði áætlað, en síðan uppgötvaðist að lýsing fjölmiðla og "gangandi" átti ekki við daginn í gær og ég lagði af stað eins og áætlað var, gerði þó ráðstafanir  með hjálp góðra manna ef á þyrfti að halda að fá send snjódekkin mín á móti mér, en bíllinn minn var fyrir löngu kominn á sumardekkin. En þrátt fyrir snjóföl á Siglufjarðarveg og slyddu, þá gekk allt vel á sumardekkjunum, svo vetrardekkin voru látin hvíla sig áfram.

1. maí 2004 Ath. Vegna fjarveru, mun uppfærslu síðunnar ekki sinnt næstu daga, eða þar til 5. maí nk.-  Sveinn Þorsteinsson (s. 848-4143) mun vera með myndavél sína í viðbragðsstöðu og taka myndir fyrir mig, "veðurmyndir" og ef eitthvað markvert á sér stað, - og ég síðan birta sem "seríu síðustu daga" ásamt viðeigandi texta þegar ég kem til baka.  

1. maí 2004  Aðsend frétt: Silja Arnarsdóttir, Herbalife ráðgjafi óskar að koma á framfæri við Siglfirðinga, að hún hefur hafið sölu á vörum frá Herbalife. Hún veiti persónulega þjónustu og ráðgjöf á því sem hentar fyrir hvern og einn. Einnig bíður hún upp á vigtun og mælingar fyrir þá sem óska eftir því. Hún segist sjálf hafa persónulega reynslu af vörunum, og býð alla hjartanlega velkomna sem vilja kynna sér kosti vörunnar.  S:467-2005, 863-8807 - siljaa@simnet.is

1. maí 2004 Ein gömul:  Benedikt Sigurðsson, Bjarni Jóhannsson og Kristján Sigtryggsson, viðstaddir vígslu Sjúkrahússins 15. desember 1966