Annálar 1954 | Verðlaunaafhending | Um hestamót | Skógardagur | Stoðveggir | Aðalverktakar | 3:1 fyrir KS | Þormóður Rammi

>>>>>>>>>>> Um hestamót

Í gær laugardag hélt hestamannafélagið Glæsir hátíð.  Þá var haldið árlegt töltmót – Stefánstölt – sem haldið er til minningar um fyrsta formann Glæsis Stefán frá Móskógum.  Börn hans gáfu veglegan bikar sem farandbikar á mótið.  Strax á eftir var haldin árleg firmakeppni Glæsis.

Dómari var Skjöldur Orri Skjaldarson barnabarn Stefáns formanns frá Móskógum og honum til aðstoðar og þulur var Sverrir Jónsson.

Til leiks voru skráði 17 knapar með gæðinga sína í Stefánstöltið.  Eftir æsilega keppni hafði Símon Gestsson frá Barði nauman sigur á Hélu sinni, þar næst kom Haraldur Marteinsson á Ofsa og í þriðja sæti var Finnur Ingi Sölvason á Jarli.  Finnur Ingi er enn í barnaflokki, en keppti hér við fullorðna og hafði í fullu tré við þá því aðeins var keppt í einum flokki.  Árangur hans er sérstaklega glæsilegur.  Í 4. sæti var svo Ólafur Marteinsson á Korgi, í 5. sæti var Símon Helgi Símonarson á Höfðingja og í 6, sæti var Unnar Már Pétursson á Prestley. 

Þar á eftir var svo haldin firmakeppnin, þar sem 19 keppendur reyndu með hestum sínum.  Í unglingaflokki sigraði Finnur Ingi Sölvason á Jarli, í öðru sæti Hilmar Símonarson á Bassa og í 3ja sæti varð Brynhildur Ólafsdóttir á Lofti.

Í fullorðinsflokki komust í úrslit Símon Gestsson á Hélu, Katrín Haraldsdóttir á Ofsa, Haraldur Marteinsson á Korgi, Unnar Már Pétursson á Bersa, Símon Helgi Símonarson á Höfðingja og Símon Helgason á Skjónu.  Eftir æsileg úrslit varð hlutskörpust Katrín á Ofsa en hún keppti fyrir Bjarna Þorgeirsson málarameistara, í 2. sæti Símon Gestsson á Hélu en hann keppti fyrir sundhöll Siglufjarðar og í 3ja sæti varð Símon Helgi Símonarson en hann keppti fyrir Sölva ehf.

Að lokinni keppni var svo hafist handa við að grilla í félagsheimili Glæsis og varð úr hin besta samkoma.

Þegar á leið kvöldið fóru menn að ræða dómana og úrslitin og fannst sumum dómarinn hafa verið strangur við sig en örlátur við aðra.  Var það helst að Stefáni Birgissyni fannst hann fá lítið fyrir hraðabreytingar á tölti, en hann hafði einmitt lagt mikið á sig við að bíða eftir keppinaut sínum....margir þóttu sýna áhugaverð tilþrif og unglingarnir sýndu miklar framfarir frá fyrra ári, en almennt voru menn sammála um að hestakostur Glæsismanna færi batnandi ár frá ári.