Lífið 1.-6. nóv 2004 | Lífið 7.-13. nóv. 2004 | Lífið nóv. 14.-20. 2004 | Lífið 21.-30. nóv 2004

>>>>>>>>>>> Lífið 21.-30. nóv 2004

   Siglfirski fréttavefurinn  Lífið á Sigló-

Jólakveðjur til vina og vandamanna.  Nú fyrir jólin gefst ÖLLUM sem það vilja, tækifæri til að koma jólakveðju með mynd og stuttum texta hér á Lífið á Sigló. Viðkomandi sendir mér á Netfangið mitt einfaldan texta og mynd, og ég birti það síðan á sérstakri síðu. Allt án endurgjalds. Ljósmynd gæti verið fjölskyldumynd eða einhver falleg sem einhver úr fjölskyldunni hefur tekið. ****    **Komnar jólakveðjur**

Kaupmenn og þjónustuaðilar á Siglufirði: Munið ókeypis kynningu á vörum ykkar og þjónustu; skoðið hér -- Og aðrir sem vilja vita hvað fyrirtækin hafa upp á að bjóða smelli þar einnig.

Þriðjudagur 30. nóvember 2004 Tjörnin fyrir sunnan Stórabola.
(Bolatjörn?) Það hefur verið hleypt úr henni, en áður hafði náð að myndast 10-15 sentímetra þykkur ís á henni sem brotnað hefur niður við tæminguna. Þessi mynd var tekin í gær, laust eftir hádegið.

Mánudagur 29. nóvember 2004 Síðasta ferðin. Mánafoss kom hingað í nótt eða í morgun snemma og lestaði hér mikið af vörum og marga tugi tonna af  þungavarningi, ma brotajárni.  Vanalega hefur Mánafoss verið hér á Sunnudagsmorgnum og farinn um hádegið, en vegna mikilla flutninga hefur ferð hans tafist.  Það verður líklega langt þangað til ef nokkru sinni, sem stóreignamönnunum (Eimskip) þóknast að senda skip hingað aftur, þó ekki muni skorta varninginn frekar en hingað til. (myndin er frá apríl 2004)

Mánudagur 29. nóvember 2004 Tunnan prentþjónusta og Dalnet tölvuþjónusta bjóða uppá.......    Vörukynning 

Mánudagur 29. nóvember 2004  Ein gömul: Þeir voru að koma frá skíðamóti; 19. apríl 1964.  Eggert Theódórsson, Jónas Jónsson og Steingrímur Magnússon

Sunnudagur 28. nóvember 2004  Kveðja frá Canada  
Sorry I can't understand this page......                                           click here

Sunnudagur 28. nóvember 2004 Aðsend tillaga, um að einhverjir taki sig saman, um að koma fyrir ljósaskreytingu  á Stóra bola, eitthvað svipað því sem á myndinni sést. K.B.

Svo er hér ávísun á komandi jólastemmingu: Nokkrar fallegar myndir á Lion vefnum  smelltu 

Sunnudagur 28. nóvember 2004 Ein gömul: Svona var áhuginn 19. apríl 1964. Myndin er tekin eftir að skíðamóti lauk- og áhorfendur lögðu af stað gangandi heim. Það voru fáir bílar til í einkaeigu á þessum tíma.

Laugardagur 27. nóvember 2004 Engin veðurmynd var er á síðunni fyrir daginn í dag vegna fjarveru minnar, en mér var sagt að veðrið hefði verið milt og gott í dag og um + 4 °C um hádegið. Hinsvegar var leiðindar rigning og vindur um 8 leitið í morgun er ég yfirgaf bæinn, auk þess sem fljúgandi hálka var á veginum alveg að þjóðvegi 1 (lengri leið til Akureyrar)

Laugardagur 27. nóvember 2004 Í rökkurbyrjun, í gærdag klukkan 16:00 Tunglskin yfir Siglunesi

Laugardagur 27. nóvember 2004 Ein gömul:
Spilakvöld og Bingó hjá Þrótti og Brynju 6. maí 1964
Á myndinni eru María Jóhannsdóttir og Hildur Eiríksdóttir.
Enn lengra í bak, eru Gísli Elíasson og Rósmundur Guðnason

Föstudagur 26. nóvember 2004 Selurinn góði mætir enn daglega á  sama stað laust eftir hádegið, og fer hvergi þú umferðin, bílar og gangandi séu aðeins í nokkurra metra fjarlægð, á leið sinni um Langeyrarveg.
Þessi mynd var tekin í gærdag.

Föstudagur 26. nóvember 2004 Ein gömul: Þessa kappa þarf ekki að kynna fyrir neinum af eldri kynslóðinni, en fyrir þá yngri:
Þá eru þetta þeir Jóhann G Möller og Eggert Theódórsson.
Myndin er tekin á tröppum "Lagers SR" 14. maí 1964

Fimmtudagur 25. nóvember 2004 OPIÐ HÚS í Iðju - dagvist fatlaðra.
Þau verða með opið hús á  annarri hæð í Kaupfélagshúsinu, föstudaginn 26. nóvember klukkan 15-19 og á laugardag 27. nóvember klukkan 11-15.
SJÓN ER SÖGU RÍKARI  -  Ég heimsótti þau eftir hádegið í dag og smellti þessari mynd af hópnum ásamt leiðbeinendum. á borðinu og að baki eru ýmsir munir sem þau hafa verið að dunda við.

Fimmtudagur 25. nóvember 2004 Formannaráðstefna Farmanna- og fiskimannasambands Íslands er haldin í dag og á morgun í Síldarminjasafninu á Siglufirði.
Ég leit þar inn í dag, en þá stóð yfir fyrirlestur Þórs Jakobssonar veðurfræðings um loftslagsbreytingar á norðurhveli og siglingar um norðurleiðina.
Dagskrá fundarins er hér

Fimmtudagur 25. nóvember 2004 Gamalt verksmiðjudót, sem upphaflega kom úr bræðslunni á Ólafsfirði, en verið hefur hér á Siglufirði í geymslu og í eigu Björns Kristinssonar, er nú á "faraldsfæti" - en nú er víst hver síðastur með að flytja slíkan varning sjóleiðina þar sem Eimskip er að hætta strandflutningum. Þessir verksmiðjuhlutir eru meðal annars ketill sem sést á myndinni, og verið að hífa á vagn til flutnings niður að höfn og stór þurrkari.
Á myndinni eru Björn Kristinsson athafnamanns og Þórður G Andersen verksmiðjustjóri.

Miðvikudagur 24. nóvember 2004. Vörukynning:  Þær riðu á vaðið !
Núna fyrir jólin 2004, gefst öllum þeim sem eru með varning, svo og jólavarning á boðstólnum, kostur á að kynna vörur sýnar hér á sérstakri síðu á vef mínum. Sendið mér tölvupóst, eða komið til mín lista yfir þær vörur sem þið viljið kynna og leggja áherslu á- og ég kem til ykkar, tek mynd hjá ykkur af starfsfólkinu með vöruhillur í bakgrunni.
Þetta er ókeypis kynning á þeim vörum og vöruflokkum sem við Siglfirðingar þurfum ekki að "sækja yfir lækinn" í önnur byggðalög.   Smelltu á myndina.

Miðvikudagur 24. nóvember 2004 Ein gömul: Um borð í Hafliða SI 2 
Á myndinni eru; Bjarni Sigurðsson - Marteinn Kristjánsson - Anton Pálsson - Tryggvi Björnsson - Jón Ægisson og Guðbjörn Haraldsson.

Ljósmyndina tók Már Jóhannsson
 

Þriðjudagur 23. nóvember 2004  "Nú detta af mér dauðar lýs" var máltæki sem algengt var í gamla daga þegar einhver varð mjög undrandi. Mér varð það sama á þegar ég sá eftirfarandi klausu í Morgunblaðinu á netinu í gærkveldi:  Bæjarstjórn Ísafjarðarbæjar samþykkti á fundi í síðustu viku tillögu þar sem kennurum í sveitarfélaginu er þökkuð löghlýðni í kjölfar lagasetningar Alþingis á verkfall kennara á dögunum. Sem kunnugt er mættu kennarar til starfa að lokinni lagasetningu, annað en margir kollegar þeirra annars staðar á landinu. Þeir mótmæltu lagasetningunni þó með því að mæta svartklæddir til vinnu. Meira  -- Mamma gamla kenndi mér í æsku; að virða ætti lög- og það ætti ekki að þakka neinum fyrir það að vera heiðarlegur, það væri dónaskapur.

Þriðjudagur 23. nóvember 2004 Gott fiskirí hefur verið hjá línubátunum síðustu gæftadaga. Bátarnir hafa verið að fá upp í sjö tonn í róðri, af vænum þorski á línu. Þessi mynd sýnir er verið er að landa úr plastbátnum Raggi Gísla SI  seinnipartinn í gær.

Þriðjudagur 23. nóvember 2004 Þessi selkópur hefur haldið sig undanfarna daga á sömu slóðum í fjörunni suðaustur af Síldarminjasafninu. Það má segja að hann mæti stundvíslega upp úr klukkan 13:30 daglega og skríði upp á stein í fjöruborðinu. Hann horfði athugulum augum á mig þegar ég nálgaðist hann  í gær.

Þriðjudagur 23. nóvember 2004  Aðsent:  Frá afmælishátíð Lionsklúbbs Siglufjarðar laugardaginn 20. nóvember síðastliðinn
 

Smelltu á myndina til að skoða fleiri

Þriðjudagur 23. nóvember 2004 Ein gömul:  Þorleifur Hólm - Páll G Jónsson - Gunnar Ásgrímsson og Geir Guðbrandsson, um borð í Skjaldbreið, á austurleið 11. maí 1963

Mánudagur 22. nóvember 2004 Tennis og badminton félag Siglufjarðar færði um hádegisbilið í dag, 10 ára krökkum í Grunnskóla Siglufjarðar að gjöf badmintonspaða ásamt fríum æfingartímum undir leiðsögn, fram að áramótum. Börnin voru að vonum ánægð með gjöfina. Smelltu á myndina til að skoða nokkrar í viðbót.

Mánudagur 22. nóvember 2004 Sigtryggur Kristjánsson, með aðstoð sona sinna ofl. voru í morgun að "slátra" þorski úr eldiskvíunum sem Sigtryggur hefur gert út undanfarin ár. Alls er áætlað að upp úr þeim komi að þessu sinni um 12-13 tonn. Þetta var stór og vel alinn fiskur. Guðrún María fiskverkun, kaupir og verkar fiskinn.

Mánudagur 22. nóvember 2004  Félag eldri borga á Siglufirði og í Fljótum hélt fund í gær kl. 15:30 - og var þar að venju boðið upp á kaffi og meðlæti. Ég var þar mættur (eftir látlausa bón frá konu minni) og tók þar nokkrar myndir, sem sjá má ef smellt er á myndina. Á fundinn komu ma. þrjú pör úr Dansklúbbi Siglufjarðar og sýndu nokkur afbrygði dansa, en dansklúbburinn er fjölmennur hópur fólks sem hefur yndi af dans og kemur reglulega saman. Söngur og fleira var einnig til skemmtunar á fundinum.

Mánudagur 22. nóvember 2004   Gamli kranastjórinn kraumaði í mér og ég sagði upphátt Úfffffff, þegar ég sá myndir þær sem koma í ljós ef þú smellir hér.  Vísað er til myndanna, sérstaklega fyrir vöðubifreiðastjóra sem eru með krana á bílum sínum, svo og auðvitað alvöru kranamanna.
Sennilega segja þeir allir Úffff eins og ég.  Athugið, að morgni 24. var þessi tengill orðinn óvirkur, en þetta er tengill á Hollenska síðu, og sennilega orðið gamalt efni hjá þeim ?

Mánudagur 22. nóvember 2004 Ein gömul: Á Hótel Höfn; Árshátíð Iðnarmannafélagsins 8. febrúar 1964: Agnar Þór Haraldsson - Guðlaug Konráðsdóttir - Þórunn Þorgeirsdóttir - Ágústa Guðmundsdóttir - Kristín Þorgeirsdóttir - Kristinn Konráðsson - Jakobína Þorgeirsdóttir og Reynir Árnason.

Sunnudagur 21. nóvember 2004 Næst síðasta ferðin. Eimskipafélagið, sem einu sinni var óskabarn þjóðarinnar, en virðist í dag vera óskabarn kúrfu og reiknimeistara peningaveldisins. Hvað sem þeim vangaveltum líður; ég hefi verið að velta fyrir mér hverjar afleiðingarnar verða þegar Eimskip hættir að senda skip sín til Siglufjarðar. Ég hefi rætt við nokkra sem eitthvað þekkja til málsins, án þess þó að komast að raunverulegri niðurstöðu. Ljóst er að einhverjir tapa og aðrir græða á þessari ráðstöfun - en mér er ekki ljóst svo óhyggjandi sé, hvort bæjarfélagið okkar hagnast eða tapar á dæminu, og menn eru ekki sammála um það. Því skora ég á einhvern góðan "penna" að afla sér upplýsinga frá hagsmunaaðilum, staðreyndum um málið, þar sem sjónarmið sem flestra koma fram. Og skrifa um málið og "leggja dóm á" og upplýsa okkur um niðurstöðuna hér á vef mínum, viðkomandi fær það pláss sem hann telur sig þurfa hér á vefnum. -- Myndin sýnir Mánafoss fara frá bryggju í morgun, næst síðustu ferð sína héðan.

Sunnudagur 21. nóvember 2004 Eins og risavaxin alda eða veggur eru þessi ský með sólarroða frá austri, sem sáust fram af firðinum klukkan 11:06 í morgun. Ekki veit ég hvað svona, eða hvort þau tákna eitthvað, en náttúran hefur sinn gang ------- ennþá amk.

Sunnudagur 21. nóvember 2004 Þessa drengi hitti ég í gærdag, þar sem þeir voru greinilega að gæða sér á laugardags-namminu sínu í frostinu. Þeir sögðu mér hvað þeir hétu, en því miður gleymdi ég nöfnunum.

Sunnudagur 21. nóvember 2004 Ein gömul: Næsta lag undirbúið, Baldvin Júlíusson - Guðmundur Þorláksson og Ragnar Páll.
Hótel Höfn; Árshátíð Iðnarmannafélagsins 8. febrúar 1964