Lífið í apríl 1-9 2005 | Lífið í apríl 10-16 2005 | Lífið í apríl 17-23 2005 | Lífið í apríl 24-30 2005

>>>>>>>>>>> Lífið í apríl 1-9 2005

Laugardagur 9. apríl 2005 50 ára brúðkaupsafmæli í dag, eiga Ingimar Þorláksson og Elsa Petra Björnsdóttir, en hafa búið saman í 60 ár. -- Þau eignuðust 9 börn og eru 8 þeirra á lífi. Ingimar átti fyrir einn son. Þau eiga 24 barnabörn og 17 barnabarnabörn.
 

Laugardagur 9. apríl 2005 Síldarkvöld Kiwanis 8 Apríl 2005 Þar var ég mættur í boði Kiwanis, ásamt konu minni. Síldarréttir er mitt uppáhald og naut ég þess vel ásamt öðrum uppákomum. Hafið okkar bestu þakkir fyrir.
 
Og til viðbótar nokkrar myndir sem Sveinn Þorsteinsson tók, sem hann taldi eiga erindi, þær eru undir liðnum Aukamyndir í myndaalbúminu

Laugardagur 9. apríl 2005 Ein gömul:
Ekki sést nafn bátsins á myndinni þarna við Löndunarbryggju SR á Siglufirði, sennilega um 1934 en einkennisstafirnir eru EA 396 og báturinn mun heita Dröfn
- Ljósmyndari ókunnur:

Laugardagur 9. apríl 2005
Sverrir Júlíusson
er 40 ára í dag  Kveðja frá félögum.
-Svo ekki fari á milli mála: 
Sverrir er til hægri á myndinni:

Föstudagur 8. apríl 2005 Maður mánaðarins, Jónína Brynja Gísladóttir var tilnefnd eft hádegið í dag af Kaupmannafélagi Siglufjarðar:
Á vinstri myndin er Helga Freysdóttir, Freyr Sigurðsson formaður Kaupmannafélagsins, ásamt Brynju, við afhendingu viðurkenningarinnar. En hægri myndin sýnir lítið brot af því sem Brynja hefur verið að föndra við á heimili sínu.

Föstudagur 8. apríl 2005
Fyrirtæki aprílmánaðar Egilssíld hf, var tilnefnt fyrir hádegið í dag af Kaupmannafélagi Siglufjarðar: Vinstri myndin sýnir Jóhannes Egilsson forstjóra fyrirtækisins með viðurkenninguna, og stjórnarmenn Kaupmannafélagsins Helga Freysdóttir og Freyr Sigurðsson formaður, við afhendinguna. Hin myndin sýnir þrjár af starfsfólkinu við pökkun á reyktum laxi:  Helga Þorvaldsdóttir - María Jóhannsdóttir og Sólveig Þorkelsdóttir

Fimmtudagur 7. apríl 2005 Loksins, eftir að hann fékk "bakteríuna" þá safnaði hann kjarki, Sveinn vinur minn Þorsteinsson og fjárfesti í góðri myndavél. Hann tók þessa fallegu mynd í gær og sendi mér. Þetta er útsprunginn kaktus úr blómasafni konu hans.

Fimmtudagur 7. apríl 2005 Ein gömul: 
Stjórn Slysavarnarfélagagins (Strákar ?) í nóvember 1967
Fremri röð frá vinstri + efri röð: Bragi Magnússon - Skúli Jónasson - Guðlaugur Henriksen - Pétur Þorsteinsson - Þórður Þórðarson - Jón Dýrfjörð og Páll Kristjánsson

Miðvikudagur 6. apríl 2005  Rækjutogararnir Múlaberg og Sólberg komu í gærkveldi með rækjufarma úr fyrstu veiðiferð sinni á árinu, en togararnir hafa verið á karfaveiðum áður. Afli var samtals um 20 tonn sem sjómenn segja ekki nógu gott, en ísröndin mun hafa hamlað veiði á hefðbundnum slóðum, svo og bræla seinnipartinn "í túrnum" Sólbergið er fremst á myndinni en það sést grilla í Mánaberg við næstu bryggju í hríðarmistrinu.

Miðvikudagur 6. apríl 2005 Aðsent: Karlakór Siglufjarðar og Þrestir með sameiginlega tónleika --- Karlakór Siglufjarðar hélt velheppnaða tónleika í Bátahúsi Síldaminjasafnsins á Siglufirði um nýliðna páska. Laugardaginn 9. apríl nk fer karlakórinn suður ásamt hljómsveit og sækir Hafnfirðinga heim.
Karlakór Siglufjarðar heldur tónleika í Hafnarfjarðarkirkju kl. 16.00 og mun Karlakórinn Þrestir taka þátt í þeim tónleikum. Karlakórarnir munu syngja hvor um sig og einnig sameiginlega hefðbundin karlakórasöng auk þess sem gestirnir að norðan munu bjóða upp á léttan söng með með hljómsveit.  -- Stjórnandi Karlakórs Siglufjarðar er Elías Þorvaldsson en stjórnandi Karlakórsins Þrasta er Jón Kristinn Cortez.   (Ljósm SK)

Miðvikudagur 6. apríl 2005 Kökubasar kökubasar - Fimmtudaginn 14. apríl ætlum við í byrjendablaki kvenna (ekki komið nafn á liðið ennþá svo við köllum okkur bara No Name) að halda kökubasar. -- Við erum á leið á öldungamót í blaki á Akureyri 21.-24. apríl, auk þess sem við keyptum okkur keppnisbúninga og allt kostar þetta víst peninga, því leitum við til ykkar. --  Hugmyndin er sú að þið látið okkur vita hvað þið viljið margar tertur og við bökum og komum þeim til ykkar. Svo endilega sendið mér póst á hulda@siglo.is  eða fax á 460-5601 sem fyrst svo baksturinn geti hafist. Með von um góðar viðtökur
f.h. blakkvenna “No name”  Hulda Magnúsdóttir

  Aðsent:  Vorið fraus í norðanbyl og fönn. Svona fór fyrir fyrsta túnfíflinum sem opnaði skærgula krónu sína við Laugarveginn í lok mars. Við héldum líka í einstaklega góðu veðri með sólskini og hita að vorið væri komið.  En þá kíkti veturinn enn í heimsókn sem við vonum bara að verði stutt. -  -- Það er ekki óalgengt að krókusar og aðrar garðajurtir blómstri í góðri tíð á þessum árstíma. En að íslenskur villigróður spretti eins og þessi fífill í mars eða apríl er mjög sjaldgæft.  Fréttaritari Lífið á Sigló

Þriðjudagur 5. apríl 2005
JE-Vélaverkstæði Ég leit þangað inn í gær og hitti á þá í kaffitímanum. Að sögn Guðna Sigtryggssonar, (fyrir miðju úti í horni, á myndinni) er verkefnastaða þeirra all þokkaleg. Meðal þeirra verkefna sem verið er að vinna að er lenging á bátnum Júlía SI. Nokkuð er í verklok sýnist mér, en eftir er að losa um mótaflekana og fínpússa breytinguna. Eigandinn Reynir Karlsson ætlaði að slappa af ásamt konu sinni erlendis á meðan breytingin fer fram. Litlu myndirnar þrjár, eru eiginlega honum ætlaðar. Hin sýnir starfsmenn verkstæðisins í kaffistofunni.

Þriðjudagur 5. apríl 2005 Ein gömul:
Hafliði Guðmundsson kennari (til hægri) ásamt "aðstoðarmanni" sínum Pétri Baldvinssyni, en þeir voru að kvikmynda vinnu, er fram fór í Strákagöngum (steypuvinnu) í september 1967

Mánudagur 4. apríl 2005 Margar glæsilegar myndir frá Siglufirði koma í ljós ef þú smellir á  Þetta eru myndir sem Guðmundur Albertsson tók nú um páskana síðastliðna á Siglufirði, meðal annars í Bátahúsinu þegar Karlakór Siglufjarðar hélt tónleika. Myndin hér til hliðar tók ég af Guðmundi við það tækifæri, en við vorum báðir duglegir með Canon myndavélarnar okkar.

Mánudagur 4. apríl 2005
Telma Rut
er dóttir 5 ára í dag. Hún er dóttir Gunna Stebba og Möggu Fjólu sem er dóttir Guðmundar Skarphéðinssonar.

Laugardagur 2. apríl 2005 Svanir á ferð og flugi. Þessir voru að yfirgefa Langeyrartjörn í morgun  klukkan10:20.-- Þeir koma vonandi aftur, því það er mikið augnayndi að sjá þá á tjörninni.

Laugardagur 2. apríl 2005 Þessa fallegu mynd sendi Óskar Berg mér í gærkveldi, en hann tók myndina frá eldhúsglugga sínum kl. 18:00 á annan dag páska.

Laugardagur 2. apríl 2005  Aðsent: Með þessari mynd frá skógrætinni okkar heim, vil senda öllum þeim sem fermdust 2. april fyrir mörgum árum,  árganginum "1964" bestu kveðjur: Hrönn Einarsdóttir

Laugardagur 2. apríl 2005
Bergþór Morthens er enn með málverkasýningu sína opna í sýningarsal Ráðhússins. Það verður opið frá klukkan 14:00 til 18:00 í dag og á morgun sunnudag, en þá lýkur sýningunni.

Laugardagur 2. apríl 2005 Aprílgabb Ég tel nokkuð víst að flestir hafi áttað sig á (ekki  þó allir) að "fréttin" af þeim félögum Valgeir og Fischer hér fyrir neðan hafi verið aprílgabb. En ég hefi einnig fengið staðfest frá mörgum sem létu glepjast af öðru gabbi, með því að senda mér póst og segja mér frá að þeir hafi aðeins séð þrjá svani á Langeyrartjörn, og enginn þeirra hafi verið svartur, hann hafi verið farinn. Það var einmitt aprílgabb númer tvö: Það var enginn svartur svanur á tjörninni í gær, aðeins þrír hvítir svanir á fullu við að sækja sér æti, sem þarna virðist vera nóg af í tjörninni. Myndin hér er af tveim þeirra sem oft létu vel hvor af öðrum á meðan ég staldraði við í gærmorgun.

Laugardagur 2. apríl 2005 Ein gömul:
Snurpað fyrir ufsa í júnímánuði árið 1967.
Þarna er Palli Páls og synir á bát sínum Guðmundur Jón SI 22 úti á miðjum Siglufirði.

Föstudagur 1. apríl 2005 Það var hringt í mig í morgun og mér var sagt að svanirnir væru komnir. Hann hefði heyrt í þeim í gærkveldi um það leiti sem hann fór til hvílu og sá þrjá svani á Langeyrartjörn fyrir neðan hús sitt. Ég hélt fyrst að þetta væri aprílgabb hjá vini mínum, en hann sárt við lagði að þetta væri sannleikur. Ég lét til leiðast og fór fram að tjörninni og sá strax þrjá hvíta svani. Þeir voru úti á miðri tjörn, svo ég skellti aðdráttarlinsu á vélina og smellti. Þeir voru komnir núna rúmum hálfum mánuði fyrr en venjulega og þrátt fyrir fjarlægð og snjóél náðust þessi þokkalega góð mynd til vinstri. En þegar ég hélt sunnar á Langeyrarveg til að snúa við á bíl mínum, þá rak ég augun í fuglana á myndinni hægri, þar með svartan svan og voru þeir alveg við veginn syðst í tjörninni þar sem nesið skagar inn í tjörnina og myndirnar sem ég tók  þar því bjartari (ég tók margar myndir)

Föstudagur 1. apríl 2005 Flytur Bobby Fischer til Siglufjarðar?
Ég fékk það staðfest í gærkveldi að Bobby Fischer, að undirlagi Valgeirs Sigurðssonar, hafi fest kaup á Fanndalshúsinu við Lindargötu. En Valgeir sem flaggaði fyrir Fischer í tilefni að komu hans til Íslands, sem getið var á siðu minni þann Fimmtudaginn 24. mars 2005, hafði hringt í Fischer, sagt honum frá góðu einbýlishúsi og bent honum á að hvergi væri betra að dvelja en á Siglufirði, þar sem hann gæti verið í friði og ró,  notið einstakrar veðurblíðu og náttúru, auk þess að á Siglufirði fengi hann að öllum líkindum frið fyrir fjölmiðlunum. Bobby Fischer brást fljótt við og greiddi Íslandsbanka sem átti húsið, umsamið verð á borðið. En Fischer mun ekki vera á flæðiskeri fjárhagslega og er sagður eiga góðar fúlgur í Svissneskum banka. Vart er búist við að hann dvelji hér til langframa í senn, en örugglega einhvern tíma á hverju ári. En að sögn Valgeirs, kemur hingað arkitekt eftir helgina til að gera uppkast af staðsetningu og vali á húsgögnum og fleiru varðandi húsið.

Föstudagur 1. apríl 2005  Aðsendur texti:
Tennis og  badmintonfélag Siglufjarðar
11 Verðlaunapeningar
3 Íslandsmeistaratitlar í Bfl

Góður árangur á Íslandsmóti unglinga í badminton, sem var haldið helgina 11.-13. mars.sl  Í TBR húsinu í Reykjavík. 310 keppendur voru skráðir til leiks og voru spilaðir samtals 700 leikir. 27 keppendur voru frá TBS.
Mynd 1 Aftari röð f.v. Elísa Ýr Gylfadóttir - Aðalheiður Friðfinnsdóttir - Karen Birgisdóttir - Álfhildur Haraldsdóttir - Stefanía Jakobsdóttir -- Fremri röð f.v. Sævar Kárason - Jón Kort Ólafsson - Fannar Snær Hall -- Mynd 2 Aftari röð f.v. Elísa Ýr Gylfadóttir-Pálína Guðnadóttir - Sævar Kárason - Rakel Ósk Björnsdóttir - Karen Birgisdóttir - Álfhildur Haraldsdóttir - Stefanía Jakobsdóttir - Grétar Hallgrímsson - Margrét Ágústa Úlfsdóttir - Kolbrún Björk Bjarnadóttir. -- Mið röð f.v. Aðalheiður Friðfinnsdóttir - Sindri Valþórsson - Hafliði Waldorff - Svava Steinarsdóttir - Svava S. Sævarsdóttir - Dagný Harðardóttir - María Jóhannsdóttir- Jón Kort Ólafsson - Steinunn Þóra Aðalsteinsdóttir - Fannar Snær Hall - Radovan Medic Fremsta röð f.v. Þórdís Jakobsdóttir - Hafdís Árnadóttir - Guðrún Kristjánsdóttir - Eygló Guðjónsdóttir 

Föstudagur 1. apríl 2005 Kiwanisfréttir: Fréttabréf Kiwanisklúbbsins Skjaldar, Siglufirði 21. Mars 2005. HÉR

Föstudagur 1. apríl 2005 Útgáfutónleikar á Allanum í kvöld  -  Eins og sagt hefur verið frá hér gaf Þórarinn Hannesson út sinn annan geisladisk á dögunum. Hann heitir Stolnar stundir og inniheldur 12 frumsamin lög og texta.
Í kvöld, föstudagskvöldið 1. apríl, kl. 22.00 ætlar Tóti að vera með útgáfutónleika á Allanum og þangað eru allir hjartanlega velkomnir sem aldur hafa til.
Aðgangur er ókeypis.