Lífið 1-11 Jan 2004 | Lífið 12-18 jan 2004 | Lífið 19-25 jan 2004 | Lífið 26.-31. jan.2004

>>>>>>>>>>> Lífið 26.-31. jan.2004

31. janúar 2004  Ég hafði ákveðið að fara á þorrablót í Allanum, í gærkveldi, en oft fer öðruvísi en ætlað er. Fyrst fékk konan mín einherja pesti, svo að við hættum við. Svo hafði ég ætlað mér að mæta á Þorra mót hjá Snerpu í morgun, þar sem Bæjarstjórnin keppti við Snerpu í Boccia, en ég þurfti endilega, ! að fá sömu pestina og konan og hreinlega gleymdi mótinu. En "Óli Kára" ætlar að láta senda mér myndir sem teknar voru á mótinu, svo og blótinu sem verður í kvöld, á morgun. Mér bauðst tækifæri til að fara þangað í kvöld, en matarlistin er ekki í lagi sem stendur. En ég vona að myndirnar komi í fyrralagi á morgun svo ég geti sett þær á netið.  SK

31. janúar 2004 Allir fullorðnir Siglfirðingar þekktu þessar konur, en fyrir þá sem ekki vita, þá voru þær allar við vinnu á Sjúkrahúsi Siglufjarðar (gamla og "nýja") og heita. Elenóra Þorkelsdóttir hjúkrunarkona, Jónína Sveinsdóttir ljósmóðir og Þorfinna Sigfúsdóttir matráðskona.

30. janúar 2004  Með kveðju frá Nonna, sem sumir eru búnir að gleyma og aðrir ekki. Hann bað mig að kynna nýlega heimasíðu sem hann hefur verið að dunda við: Fullt af nýjum myndum, (frá Sigló) farðu að skoða núna. Ef það er ekki mynd af þér, þá er það ekki af því að mér þyki ekki vænt um þig, bara að "filman var búinn". Smella bara á slóðina hér  http://groups.msn.com/VinirNonnaBjorgvins/pictures      Love Nonni

30. janúar 2004 Eva Karlotta (Regínu og Einars) er að spila á skemmtistaðnum Celtic Cross á Hverfisgötu í Reykjavík um helgina 30-31. janúar.  Allir Siglfirðingar sem eru á svæðinu, eru því hvattir til að mæta þangað

30. janúar 2004  Hafaldan EA 87 -2327, Þennan bát var verið að hífa í morgun, út frá JE-Vélaverkstæði, eftir að hafa verið þar í viðgerð og lagfæringum. Stuttu síðar var báturinn  kominn á flot. Báturinn er frá Grímsey

30. janúar 2004   Þetta eru þeir Jón Andrjes Hinriksson, umboðsmaður Olís, Ragnar Ragnarsson útgerðamaður, og Sigurjón Erlendsson rafvirkjameistari hjá Rarik.

En ég tók þessa mynd í morgun, er ég heimsótti Olís.

29. janúar 2004 Fréttatilkynning.  Bæjarstjóri Siglufjarðarkaupstaðar, Guðmundur Guðlaugsson, hefur óskað eftir því að vera leystur frá störfum af persónulegum ástæðum.  Samkomulag hefur verið gert um starfslok hans og mun Guðmundur láta af störfum þann 1. febrúar n.k.  Skrifstofustjóri Siglufjarðarkaupstaðar, Þórir Hákonarson, mun gegna starfi bæjarstjóra þar til nýr bæjarstjóri hefur verið ráðinn.
Guðmundur til vinstri - Þórir til hægri.

29. janúar 2004  Skipaafgreiðslan ehf. Þangað fór ég í morgun og hitti á máli Friðfinn Hauksson, sem er í forsvari fyrir félagið. Skipaafgreiðslan sér um alla upp og útskipun á fiskafurðum á Siglufirði, og ýmislegt fleira sem þeir hafa á könnunni.
Hjá honum voru staddir Ægir Bergsson og Sturlaugur Kristjánsson.  Aðspurður, sagði Friðfinnur, að þeir væru með hugmyndir á prjónunum til að auka umfangið, en það væri enn á umræðu og athugunarstigi, svo ekki væri tímabært að ræða það að sinni, en ég fengi að fylgjast með ef eitthvað yrði úr því máli. Á myndinni eru: Friðfinnur Hauksson, Ægir og Sturlaugur.

29. janúar 2004   Buldi við brestur, / brotnaði þekjan, / reið niður rjáfur / og rammir ásar. Segir í skemmtilegri langri drápu, um atburðinn, þegar Ákavíti hrundi þann 24. mars 1947 undan snjó sem safnaðist fyrir á "milli þaka" eftir sólahrings snjókomu, og "örlítilli utanaðkomandi hjálp."  Ljósmynd: Kristfinnur . Heimild: Síldarævintýrið á Siglufirði, eftir Björn Dúason.

   Þessi eiga afmæli í dag: 29. janúar 2004
Einnig: Símon Helgason, en ég fékk enga mynd senda með upplýsingunum og á víst enga.

28. janúar 2004   Nemendur í 1.-3. bekk í grunnskólanum, sungu af fullum krafti fyrir gesti og gangandi, uppi á snjóruðningi, fyrir framan kirkjuna, rétt fyrir hádegið í dag og biðu eftir að sólin léti sjá sig. Þau voru að vísu aðeins of snemma á ferðinni, því vart má ætla að sólin hafi breytt hegðun sinni, en hún kemur væntanlega ekki upp fyrir fjallahringinn fyrr en vel eftir "hádegið" ca 13:30

28. janúar 2004   Sólarkaffi, - - og pönnukökur frá Sjálfsbjörg.
Það var mikið um að vera hjá kvennadeild Sjálfsbjargar í morgun, en þær voru í óðaönn við bakstur og frágang á hinum hefðbundnu sólarpönnukökum, sem þær baka árlega til fjáröflunar. Hópur krakka hafði heimsótt þær í morgun, en ég missti af því, hef sennilega verið að sötra kaffi hjá Jóni Andrés hjá Olís, eins og ég geri flesta morgna, og nú eins og á flestum vinnustöðum á þessum degi 28. janúar, er boðið upp á pönnukökur þar, frá Sjálfsbjörg.

28. janúar 2004  Sjálfstæðisflokkurinn hélt almennan kynningar og stjórnmálafund, á Kaffi torg í gærkveldi. Frummælandi var Árni M. Matthiesen  sjávarútvegsráðherra. Margar fyrirspurnir til ráðherra voru bornar fram, fyrir ráðherra er hann lauk sinni framsögu, auk þess sem forseti Alþingis Halldór Blöndal sem einnig var þarna, tók til máls og svaraði spurningum. Hann margítrekaði í sinni framsögu og svörum, að ríkisstjórnin mundi eindregið standa við sín loforð sem síast voru gefin sveitafélögunum og kjósendum, jarðgöngin verða boðin út á kjörtímabilinu. (Því hefur jú áður verið lofað, minnir mig, ! nema þeir ætluðu að klára þau ef þeir kæmust til valda eftir kosningar) Annars varðandi umræðurnar, þá fóru þær vel fram og spurningarnar voru málefnalegar og rökfastar og sjávarútvegsráðherra svaraði þeim vel, nema kannski í aðeins of löngu máli, sumum þeirra. Á fundinn mættu um 60-70 manns.  Smelltu á myndina

27. janúar 2004  Þessi mynd er tekin af hópi vélsmíðanema árið 1982

27. janúar 2004  Nýfæddur Siglfirðingur

27. janúar 2004        Þeir eiga afmæli í dag

26. janúar 2004   Þessi polli fæddist, rétt fyrir áramótin, sl.

26. janúar 2004              Beðið er velvirðingar, á því að síðan mín var í ólagi. ALLT fór úr sambandi í gær eftir hádegi vegna einhverra tæknivandræða, sem ég kann ekki fullkomin skil á. Síðan er í lagi í tölvu minni, svo ekkert er glatað, en eitthvað fór úrskeiðis í tengslum við miðlarann.  Það er mikið verk eftir að lagfæra, en ég verð að laga þetta í áföngum þar sem þetta er mikil og tímafrek vinna. En með þolinmæðinni kemur þetta.

Leikfélagsmyndirnar ætlaði ég að setja á netið í gær, en það var ekki mögulegt á þeim tímapunti. En þær eru þó komnar núna.

26. janúar 2004   Ef þið þurfið að skoða eitthvað gamalt, þá prufið leitarvélina, hún ætti að finna eitthvað. Allar síðurnar eru komnar inn aftur á netið, en þær eru ótengdar, enn þá. 

26. janúar 2004  Leikfélag Siglufjarðar, hefur hafið undirbúning og samlestur vegna væntanlegs flutnings á leikriti eftir Ragnar Arndals, Silfur hafsins. Leikritið verður flutt í tilefni af 100 ára afmælis síldarævintýris Íslendinga. Fjallar verkið eins og nafnið gefur til kynna um sögu síldveiðanna og vinnslunnar en fyrst og fremst um mikilvægan kafla í sögu byggðarinnar okkar hér í Siglufirði. Um létt og skemmtilegt leikrit er að ræða. Ekki er endanlega búið að velja alla leikendur, en áhugasamir hafa mætt á samlestraræfingar, til athuga málið með framhald í huga.  Smelltu á myndina og skoðaðu fleiri myndir, sem teknar voru í gær.