Lífið í júlí 1-10 2004 | Lífið í júlí 11-17 2004 | Lífið í júlí 18-24 2004 | Lífið í júlí 25-31 2004

>>>>>>>>>>> Lífið í júlí 25-31 2004

   Siglfirski fréttavefurinn  Lífið á Sigló

Sunnudagur 1. ágúst - Svona rétt til að láta vita af því; þá eru taugar mínar rétt í þessu að komast í lag eftir annasaman daga, í gær og í dag til kl. 17:00 - við annað en ég ætlaði mér en tölvan mín hrundi á laugardag, eins og sagt er frá hér fyrir neðan, en ég er búinn að vera með tölvu og kerfisfræðing í vinnu, lungað úr deginum í gær og svo aftur í dag (8-9 tíma) Á milli skrapp ég til að taka myndir, þó ekki eins margar og ég ætlaði. Ég stefni að því að birta þær á morgun. En nú er ég að reyna að ná áttum og raða möppum og gögnum til réttra staða á vélinni minni sem er orðinn hálfgerður garmur, og segir mér að ég verð að fara að reyna að skoða möguleika á kaupum á nýrri vél, hvenær sem það verður. En hér með fylgir ein mynd frá hátíðarstund uppi í Hvanneyrarskál upp úr klukkan 10 í morgun. Aðrar myndir koma væntanlega á morgun- ef vélin mín bilar ekki aftur.

Laugardagur 31. júlí 2004 klukkan 21:30, Vinsamlega ! Vegna alvarlegrar bilunar í tölvu minni (vélbúnaður bilaður eða ónýtur ?) hefi ég ekki komist til að vinna á vél minni í dag frá klukkan 7 í morgun og því hefur ekkert bæst við af nýju efni í dag- og verður ekki, - og óvíst í augnablikinu hvert framhaldið verður. En ég skrifa þetta úr annarri tölvu úti í bæ.

Laugardagur 31. júlí 2004 Síldarævintýrið, Eftir klukkan 21:00 í gærkvöld. ---- 1060 bílar höfðu farið um Siglufjarðarveg vestan Strákaganga, síðasta sólarhring.

Smelltu á myndina.

Laugardagur 31. júlí 2004  Síldarævintýrið, Töluglöggir menn giskuðu á 4000 manns komna í bæinn um kl: 16:00 í gær föstudag- og stöðugur straumur bíla var á leið inn í bæinn. Samkvæmt upplýsingum vegakorts Vegagerðarinnar höfðu tæplega 700 bílar farið um Siglufjarðarveginn vestan Strákagana, frá miðnætti fimmtudags/föstudags um kl.17:00. Fólkið sem komið var ásamt heimamönnum spókuðu sig léttklædd um svæðin í veðurblíðunni og eða slappaði af. Veður var hið besta hressandi vindur 5-6 m/s - 18-24 °c hiti, eftir því hvort sólin náði til að verma umhverfið, en ekki var stöðugt sólskin. Þessi mynd er frá Aðalgötunni, sem var lokað á parti fyrir umferð. Fleiri myndir koma í ljós ef smellt er á myndina

Föstudagur 30. júlí 2004 Vel aflaðist, þó aflinn væri bæði misjafn hvað magn og stærð fiskjarins var. En greinilegt var á andlitum stangveiðimanna að þeir voru ánægðir með ævintýrið, sem og aflann sem þeir komu með að landi, á hinu árlega Stangveiðimóti um Verslunarmannahelgina.
Ég tók nokkrar myndir þegar komið var að landi; smelltu á myndina

Föstudagur 30. júlí 2004  Þessi mynd er tekin klukkan 08:30 í morgun. 18 °C hiti, logn og sólskin. Hér er smábátadokkin fyrir miðri mynd og tjaldstæðin við Torgið fullsetin Nægt pláss er þó enn á hinum stæðunum.

Ræst var í morgun klukkan 06:00 til sjóstangaveiðikeppni, og eru bátarnir væntanlegir um kl. 15:00

Föstudagur 30. júlí 2004 Tjaldstæðin. Klukkan 18:00 í gærkveldi voru tjaldstæðin, eða öllu heldur tjaldvagna og húsbílastæðin (því lítið ber á hinum gömlu góðu tjöldum) við Torgið nær fullsetin. Það eru þó næg pláss eftir og verður seint hægt að fylla þau pláss sem bærinn býður uppá. Veðurblíðan í allan gærdaginn var eins og svo oft áður á Sigló, að vísu sólarlaust frá hádegi, en hiti um 22-23 °C og logn eins og hvergi getur orðið "nema á Sigló". Þegar myndin var tekin (18:00) var hitinn 21 °C  og logn.

Föstudagur 30. júlí 2004  Ein gömul:  Ekki er ég viss um hvað hann heitir þessi skíðastökkvari, þó mér finnist svipur hans ver kunnur. Hann er þarna að taka sig á loft af miklum krafti á heimagerðum "stökkpalli" í hlíðinni norðan Hvanneyrarár 1963-1964 ?. Þeir sem þekkja, láta mig vita.

Fimmtudagur 29. júlí 2004  Arnar Heimir Jónsson fór með mig í garðaskoðun í gær og tók ég við það tækifæri, nokkrar myndir af fallegum trjám í bæjarlandinu. Ég er að vísu enginn garðaáhugamaður sjálfur, en til að lesendur síðu minnar sem áhuga hafa á garðrækt og gróðri njóti þekkingar hans, tók ég boði Arnars fegins hendi . S.K.
Ég gef honum hér með orðið: Nokkrar tegundirnar eru sjaldgæfar norðanlands, en aðrar hafðar með til fróðleiks og er þessi listi ekki tæmandi yfir falleg tré í bænum. Ráðgert er að fara aðra ferð við tækifæri og eru allar ábendinga vel þegnar. A.H.J. --   Smelltu á myndina og skoðaðu fleiri myndir og textann sem þeim fylgir.

Fimmtudagur 29. júlí 2004  Ein gömul: Steypuvinna, við þakið á Sigló, - húsinu sem í upphafi bar það nafn, þá Sigló Síld og fleiri nöfn en nú eign Þ.R.S. Á myndinni eru Guðbrandur Sigurbjörnsson, Albert Sigurðsson og Ólafur Bjarnason.

Miðvikudagur 28. júlí 2004  Ó.B. kvartettinn, heldur tónleika á Kaffi Torg, annað kvöld klukkan 21:00 -  Á dagskrá verða ýmis lög úr ýmsum áttum s.s. klassísk kvartettlög, ballmannssöngvar, lög og textar eftir Bjarka Árnason, Írsk lög við texta Jóns Árnasonar o.m.fl.  -
Kvartettinn skipa: 1, tenór; Birgir Ingimarsson, 2.tenór; Óskar Berg Elefsen, 2. bassi; Steinn Elmar Árnason, bassi og undirleikur; Sturlaugur Kristjánsson.- Ball á eftir. með Dansbandi Dúa Ben

Miðvikudagur 28. júlí 2004  Undanfanar vikur hefur borið nokkuð á því að smásteinar upp í hnullungar, hafa hrunið á vegin undan skriðunum við Siglufjarðarveg, raunar hafa vegagerðarmenn vitað af þessu og orðið þeim nokkuð dýrkeypt, þar sem einn vegagerðarbíllinn losnaði úr handbremsu og rann útaf og niður í fjöru á meðan vegagerðarmaður var að hreinsa grjót af veginum. Minnugur þess atviks, þá stöðvaði ég vélina í bíl mínum og gerði viðeigandi ráðstafanir, er ég fór úr bíl mínum síðastliðið sunnudagskvöld (á leið til Varmahlíðar) til að henda um 20 kg. grjóti sem var á nær miðjum veginum ásamt smágrjóti þar í kring. Ég ætlaði að minnast á þetta grjóthrun sl. mánudag en hreinlega gleymdi því þar til í gærkveldi, að ég heyrði sagt frá því að Bás ehf. hefði verið beðinn í dag, að hreinsa rásirnar ofan við veginn sem eru/voru orðnar fullar af grjóti.  Rásirnar sem upphaflega voru gerðar til að taka við grjóthruninu og hindra að það færi á sjálfan veginn. Ég frétti jafnframt að það hefði verið Kristján Möller sem hefði haft samband við Vegagerðina og bent þeim á þetta ástand. - Og Vegagerðin brást skjótt við og samdi við Bás um að hreinsa rásirnar.

Miðvikudagur 28. júlí 2004  Ein gömul: Spilað í kaffitíma í kaffistofu bryggjumanna S.R. (Síberíu) > Sigurður Gíslason, - Jón Gunnar Pálsson, - Jóhann Örn Matthíasson og Eðvald Eiríksson.

Þriðjudagur 27. júlí 2004   Síðasta loðnan á sumarvertíðinni.  Það er nokkuð síðan, menn héldu loðnuvertíðinni lokið, - og Íslensku skipin ákváðu að hætta vegna tregrar veiði. Það fór á annan veg, því Norsku skipin héldu áfram að koma með afla. En í dag telja menn fullvíst að síðasti Norska skipið sem landaði hér í morgun hafi verið það síðasta að sinni. En eins og áður hefur komið fram þá er sá afli sem Norsku skipin hafa komið með meira en drjúgur, hann er mikill eða 36% aflans og Grænlenska skipið Siku eitt með 21% aflans sem hingað hefur komið af loðnu/kolmunna, sem í sumar nemur samtals 27.758.772 kg.       >> Aflaskýrslan

Þriðjudagur 27. júlí 2004 Ungur og efnilegur bóndi- væntanlegur. Óðinn Freyr Rögnvaldsson, sonur Rögnvalds Þórðarsonar póstmeistara, - hefur fest kaup á bóndabænum og jörðinni Lambanesreykir. Óðinn mun taka við jörðinni á haustdögum og hefja búskapinn með 10 kindum til að byrja með, en landbúnaðarreglur og kódi takmarkar þann fjölda, sem þó mun aukast þegar frá líður. En Óðinn hefur fleira til brunns að bera en bóndaeðlið, hann er lærður trésmiður- og hefur í sumar haft nóg að gera við smíðar í Fljótunum og nágrenni- og kvíðir engu með framtíðina, svo er hann víst búinn að krækja sér í kærustu strákurinn, svo honum ætti ekki að leiðast í skammdeginu. Til hamingju Óðinn.  

Þriðjudagur 27. júlí 2004  Aðsent:  -- Afkomendur frumkvöðulsins.

Sá sem var fyrstur Norðmanna til að byggja söltunarstöð og salta fyrstu síldina hér á Siglufirði 8. júlí 1903 hét Hans Söbstad frá Kristiansundi. Hann er sem sagt maðurinn sem stóð á bak við atburðinn sem leikritið Silfur hafsins er byggt á.

Margir afkomendur Söbstads komu hingað frá Noregi og voru á hátíðinni okkar um síðustu helgi. Á myndinni eru Harald Söbstad (sonarsonur Hans Söbstads), Hedvig kona hans, Unne dóttir þeirra og Björn sonur Unne.

Þrír aðrir Söbstaðar voru hér auk Haralds og gistu þau öll á Bjarnagili í góðu yfirlæti hjá Sibbu og Trausta og var þar sannkölluð ættamótsstemning hjá þeim Söbstödum sem hittast annars sjaldan. Og ekki var síðri ánægja þeirra með allt sem þeir sáu og reyndu á hátíðinni sjálfri.

Nafn Hans Söbstads, þessa frumkvöðuls í atvinnusögu Siglufjarðar og raunar alls Íslands, ber okkur að muna. Saga hans er mjög merkileg og raunar dramatísk á margan hátt.

Þeir helstu sem komu á eftir Söbstad í síldarútveginum á Sigló voru þeir Thormod Bakkevig, Hendrik Hendriksen, Edvin Jakobsen, Olav og Elías Roald, Olav og Gustav Evangersbræður og Ole Tynes. ök  

Þriðjudagur 27. júlí 2004  Ein gömul: Slegið á létta strengi- Stefán Árnason, Hafþór Rósmundsson og Salmann Kristjánsson - um borð í Haferninum í Liverpool-höfn 1967

Mánudagur 26. júlí 2004  Enn koma Norðmenn færandi hendi, það má segja að stöðugur straumur Norskra skipa hafi verið hingað með loðnu til Síldarvinnslunnar, í morgun voru þessi tvö skip hér; Rødholmen og Solvar Viking. Alls eru nú komin á land til bræðslu hjá Síldarvinnslunni á Siglufirði á sumarvertíð, rúmlega 27 þúsund tonn. Samtals á árinu rúmlega 32 þusund tonn   >> Aflaskýrslan

Mánudagur 26. júlí 2004   Brúðkaup. Síðastliðinn föstudag 23. júlí voru gefin saman, Siglfirðingarnir Anna Rós Ívarsdóttir og Steindór Örvar Guðmundsson. 
Fleiri myndir: http://eldorado.raggoz.com/

Mánudagur 26. júlí 2004  Ein gömul: Jóna Sigríður Jónsdóttir (móðir Elíasar Ísfjörð) og Guðbrandur Sigurbjörnsson (Akra-Brandur)  En þau voru bæði á Sjúkrahúsi Siglufjarðar 1963 (+/-)

Sunnudagur 25. júlí 2004  Sauðarnesviti við Siglufjörð. Vitavinafélagið, lauk dagskránni vegna 100 ára afmælisins, í minningu Síldarævintýrsins, með að efna til fundar við Sauðarnesvita. Siv Friðleifsdóttir umkverfisráðherra flutti ávarp, formaður Félags Vitavina á íslandi einnig, þá var þar staddur meðal fleiri Norðmanna, formaður Vitavinafélags í Noregi og fleiri. Ómar Hlynsson trúbardór söng- og gestum var boðið upp á kaffi og meðlæti og krökkum svalandi drykki. Auk þess gafst gestum kostur á að skoða vitann. Smelltu á myndina

Sunnudagur 25. júlí 2004  Forsetinn kveður: Um klukkan 11:40 í dag fóru forsetahjónin Ólafur Ragnar Grímsson og kona hans Dorit Moussaieff   eftir sólarhrings dvöl  frá Siglufirði. Smellti af nokkrum myndum þeim tengdum í morgun. Smelltu á myndina.

Sunnudagur 25. júlí 2004 Rosabaugur. Ég beindi myndavélinni minni að sólinni klukkan 11:30 í dag. Heljarmikill rosabaugar var umhverfis sólu, það stór að 38 mm brennivídd linsu minnar náði ekki heildinni, en þetta er árangurinn, eins og auga sem með okkur fylgist utan úr geimnum.. (sjálfvirk stilling)

Sunnudagur 25. júlí 2004  Norsku skipin eru enn að koma með drjúga slatta til bræðslu hjá Síldarvinnslunni á Siglufirði. Þessi komu í gær til löndunar.

Sunnudagur 25. júlí 2004  Heimsókn forseta Íslands til Siglufjarðar í tilefni af 100 ára afmælishátíðar.  Syrpur ljósmynda eru á næstu síðum.

Smelltu á myndina  eða tenglana hér til hliðar- og skoðaðu um 200 myndir frá deginum í gær; 24. júlí