Lífið í feb. 1-5 2005 | Lífið í feb. 6-12 2005 | Lífið í feb. 13-19 2005 | Lífið í feb.20-28 2005

>>>>>>>>>>> Lífið í feb.20-28 2005

Mánudagur 28. febrúar 2005  Aðsent: Myndir frá Goðamótinu á Akureyri sem lauk í gær á Akureyri. En við sendum A,B og C lið í 5. flokki. Stelpurnar í 5. flokki stóðu sig vel og yngsta liðið gerði sér lítið fyrir og náði 2. sæti í mótinu sem er frábær árangur sérstaklega þegar litið er til þess að þær voru að spila gegn mun eldri stelpum. Nöfnin á stelpunum ef við byrjum á efstu röð frá vinstri: Margrét Baldursdóttir (Baldurs Ben.), Kristín Júlía Ásgeirsdóttir (Ásgeirs og Huldu), Rebekka Rut (Rósu Daggar), Katrín Ásgeirsdóttir (Ásgeirs Sölva og Erlu), Daníela (Önnu Hermínu og Jóa), Róbert Haraldsson þjálfari. -- Neðri röð frá vinstri: Jóhanna Jóhannsdóttir (Jóa Mara), Margrét Thelma. (Vals Bjarna), Ástrós Jóhannesdóttir, (Bjarka og Esterar), Helga Eir (Huldu og Sidda) og framan þær er Selma Dóra markvörður liðsins (Óla og Dóru Sallýjar).
Á myndina vantar 3 stelpur sem að voru líka að keppa Það voru þær Kristín Margrét, Sabrína og Hrafnhildur. Með kveðju, Hulda.

Mánudagur 28. febrúar 2005 "Villimannahverfið" - var þetta svæði sem sést á myndinni kallað á unglingsárum mínum 8 -15 ára. Þarna á þessu svæði bjuggu annálaðir prakkarar, sem voru "heimsfrægir" í augum "kjaftakerlinganna og karlana" sem áttu í eilífu stríði við "pörupiltana" sem þarna réðu ríkjum, með þann sem fæddist og átti heima í, nú gulu húsi fyrir miðri myndinni, í forustu um árabil. Flest húsin sem prakkararnir áttu heima í eru horfin, en minningin lifir enn í hugum margra. Þar á meðal mín sem fæddist í húsinu númer 1 við Mjóstræti.   Myndin var tekin klukkan 14:00 í gær.

Mánudagur 28. febrúar 2005  Ein gömul: Sama svæðið, og hér fyrir ofan, tekið frá öðru sjónarhorni árið 1943

Ljósmynd: Hinrik Andrjesson

Sunnudagur 27. febrúar 2005 Pálshús - Mjóstræti 2- Þessa mynd ætlaði ég að nota sem "auka-veður-mynd" eins og hér fyrir neðan. En við nánari athugun, þá ákvað ég að taka aðra til þeirrar nota. En það sem vakir fyrir mér, er að þessi gata Mjóstræti, sem aðeins tvö hús eru kennd við, númer  1 og 2, er að ég held megi fullyrða; eina gatan á Siglufirði sem ekki er hægt að keyra enda á milli, vegna þessa litla snjóruðnings sem þarna er eftir. Þeir sem eiga Pálshús, eru þar fæddir og uppaldir, þó svo þeir starfi á Suðurlandinu, en þeim gæti dottið í hug að skreppa "heim", sem þeir gera mjög oft á ári, þá væri gott að þessi ruðningur væri farinn, ein skóflustunga, með tæki.

Sunnudagur
27. febrúar 2005
Aðsent:
Myndir frá einsöngs- tónleikum nemenda á 6. stigi við Tónlistarskóla Siglufjarðar.
Tónleikarnir sem voru vel heppnaðir, voru haldnir í Siglufjarðarkirkju þann 16. febrúar síðastliðnum.
Þessir nemendur eru tenórarnir Björn S. Sveinsson og Þorsteinn B. Bjarnason. Kennari þeirra og undirleikari er Renáta Ilona Iván. Kv EÞ.

Sunnudagur 27. febrúar 2005  Aðsent:  Hefur lagning vegslóða á Hafnarfjalli farið í umhverfismat? Ef ekki er ekki þörf á því, eða fellur slík veglagning undir framkvæmdir sem þegar eru í gangi í fjallinu? Hér er þó um annað "svæði" að ræða, án þess að ég reyni að skilgreina það. Ég held að Siglfirðingar verði að hugsa svolítið betur um umhverfi sitt því staðurinn hefur í dag helst aðdráttarafl í gegnum upplifun á ýmsum hlutum, og þá tala ég um ferðamennsku (söfn, útilíf, menning). Staðurinn verður ekki ómerkilegri við það að skreyta hann vegi en upplifunin verður skert. Þetta er svæði sem ég heimsæki alltaf er ég kem heim og þekki ég vel til þarna uppi. Það eru fáir orðnir staðirnir á Íslandi sem við mennirnir höfum ekki merkt okkur og nokkrir eru í og við Siglufjörð. Er ekki óþarft að bæta gráu ofan á svart?  
Kveðja, Ásbjörn Thór Á. Blöndal, Noregi. ---------------
Þetta erindi er sýnist mér beint til okkar Siglfirðinga "sem heima" sitjum, og ef einhver vill eitthvað til málanna leggja til viðbótar, þá skal ég koma því hér fyrir á síðu minni.
En ég  vil leggja orð í belg. Mig langar til að lýsa ánægju minni yfir því að einhverjum hefur dottið í hug að gera göngustíga um fjöllin okkar, sem er raunin. Ég var eins og fluga upp um öll fjöll þegar ég var ungur, en er vart til þess fær nú, en ef til vill gæti ég og fleiri sem komnir eru af léttasta skeiði upplifað þá ánægju aftur, þegar göngustígarnir koma, að ganga á fjöll. Og að lokum; mér finnst að þessir svokölluðu náttúrusinnar ættu að gera sér grein fyrir, að þó þeir séu margir hverjir hávaðasamir, þá  hefi ég þá trú að þeir eigi ekki eins marga samherja og þeir láta í veðri vaka. Og svokallað umhverfismat einhverra pólitískt ráðinna manna með misjafnar skoðanir, og oft á tíðum enga þekkingu á viðkomandi tilefni, er ekkert annað bull í mínum huga hvað göngustígana varðar,- að minnsta kosti..

Sunnudagur 27. febrúar 2005  Ein gömul:
Bílvelta á Hvanneyrarbraut, fyrir 40 árum. Engin slys urðu, en bílstjórinn, tók ekki (mundi ekki) eftir vegagerðarframkvæmdunum, er hann kom heim til sín í myrkri um hánótt.

Sunnudagur 27. febrúar 2005 Nýfæddur Siglfirðingur Þann 23. Febrúar síðastliðinn, fæddist á sjúkrahúsi Siglufjarðar þessi ungi herramaður.
Foreldrar hans eru Óli Andrés Agnarsson og Elín Björg Jónsdóttir.

Laugardagur 26. febrúar 2005 Skíðasvæðið í Skarðsdal. Nægur snjór er þar ennþá þrátt fyrir að víða sé snjórinn horfinn úr byggð og hlíðum. Aðeins á einstaka stað á braut lyftanna hefur þurft að flytja snjó aðeins til en allstaðar uppi í dalsbotni er nægur snjór. Fólk kemst með lyftunum óhindrað á dásamlegt skíðasvæði, eins og einn Reykvíkingurinn sem ég mætti á ferð minni þar uppi í dag eftir hádegið, sagði við mig. 

Laugardagur 26. febrúar 2005  Ein gömul: Sunna "brennur" í júní 1963.
Eins og sjá má í dag,-  þá tókst slökkviliðinu, fljótt og vel að ráða niðurlögum eldsins, sem flestir bjuggust við í fyrstu að mundi ekki takast þar sem eldsmaturinn var mikill.

Föstudagur 25. febrúar 2005 Frá Sunnudagaskólanum: Á sunnudaginn fáum við í heimsókn, Þorstein Bjarnarson hjúkrunarfræðing, og ætlar hann að fræða okkur um hollan mat og heilbrigðara líferni. Sunnudagaskólinn kl.11:15 alla sunnudaga á kirkjuloftinu. Kveðja Steini, Þórunn og Elísa.

Föstudagur 25. febrúar 2005 Aðsent:  Hér er Styrbjarnardys sagði Steini verkfræðingur, er hann gekk um Dalaskarð fyrir skemmstu við annan mann.
Styrbjörn stal mat úr hjalli nágranna síns til forna, var eltur uppi á leið yfir Skarðið, drepinn eins og hver annar ótíndur glæpamaður og heygður á staðnum. Misjöfnum sögum fer af því hvort hann bjó á Hóli eða var húskarl á Dalabæ eða í Höfn. -- Þarna er ráðgert að leggja vegarslóða næsta sumar úr Skarðdal og norður að Hafnarhyrnu vegna stoðvirkjanna sem setja á upp ofan Fífladala. Í baksýn er Snókur og enn fjær er Hólsskarð og Almenningshnakki.  ÖK

Föstudagur 25. febrúar 2005 Aðsent:  -- 24. Febrúar 2005 - Fyrirlestur í efra skólahúsi Grunnskóla Siglufjarðar- Ólafur sparisjóðsstjóri og Sigurður skrifstofustjóri skelltu sér í skólann í dag og héldu fyrirlestur fyrir nemendur í 9. og 10. bekk. Fræddu þeir nemendurna meðal annars um starfsemi Sparisjóðsins, styrki sem Sparisjóðurinn veitir, sparnað, lántöku og hvað það þýðir að gerast ábyrgðarmaður. Í lok fyrirlestrar tilkynntu Ólafur og Sigurður að Sparisjóðurinn mun bjóða nemendum fría rútuferð á Samfés dansleik sem farið er á, á vegum Æskulýðsheimilisins. Myndir sem teknar voru við þetta tækifæri geturðu skoðað með því að smella hér á vef Sparisjóðsins. DP

Föstudagur 25. febrúar 2005 Aðsent: Ég  var á göngu niðrá bryggju og varð mjög hissa þegar ég tók eftir þessu, enda svolítið mjög áberandi. Frekar mikill sóðaskapur í fólki, allgjör óðþarfi að henda þessu bara beint í höfnina og akkúrat á svona áberandi stað, þetta var þarna vítt og dreift um þetta svæði þar sem hann er á.   GH  
ES: mér sýnist þetta vera inni í bátadokkinni, en bryggja og stefni báts speglast þarna í annars tærum sjónum. SK

Föstudagur 25. febrúar 2005  Nýfæddur Siglfirðingur. Þessi litli drengur fæddist þann 23.febrúar síðastliðinn. Hann hefur ekki enn hlotið nafn en foreldrar hans eru; Arnar Heimir Jónsson og Auður María Þórhallsdóttir.
 

Föstudagur 25. febrúar 2005 Ein gömul:  Á Hvanneyrarbrautinni 1965. Jarðýta þarna komin til að bjarga vélskóflunni frá veltu, sem tókst með miklum tilþrifum og víraflækju.

Fimmtudagur 24. febrúar 2005 Þessir krakkar, voru bæði að selja, kaupa og forvitnast. Þau stilltu sér upp fyrir mig, en allur ágóðinn af þessari Torgsölu krakkanna rennur til Rauðakrossins, ágóðinn sem raunar er 100% þar sem allur söluvarningurinn eru hlutir sem þau hafa fengið gefins með hús úr húsi söfnun, í tilefni af þessu jákvæða málefni.
Þau eru þarna við anddyri Íslandsbanka og Siglufjarðarapóteks.  Efst á síðu

Fimmtudagur 24. febrúar 2005 Leikskólakarakkarnir, einn aldurshópurinn var í göngutúr um norðurbæinn í morgun ásamt fóstrum sínum. Ég mætti þeim og bað um að fá að taka ljósmynd af hópnum, sem mér var veitt fagnandi.

Efst á síðu

Miðvikudagur 23. febrúar 2005
MENNINGARSJÓÐUR SPARISJÓÐS SIGLUFJARÐAR
Sjóðurinn auglýsir hér með eftir umsóknum um styrki vegna menningar- og líknarmála.  --  Með umsókn þarf að fylgja til hvers styrkurinn er ætlaður. Frestur til að skila inn umsókn er til mánudagsins 7. mars nk Sjóðurinn mun styrkja á árinu 2005 samtals kr 1.850.000. Umsóknir óskast sendar til:  Menningarsjóðs Sparisjóðs Siglufjarðar, Túngötu 3 Siglufirði
Nánari upplýsingar veita stjórnarmenn, Ólafur Jónsson, Guðrún Árnadóttir og Hermann Jónasson

Miðvikudagur   Efst á síðu
23. febrúar 2005
Þessi steinn sem þarna sést á brúninni rétt vestan við munna Strákagangna og Hreinn Júlíusson stendur við, kom ofan úr fjallinu einhvern tíma í nótt. Hann lenti á vegarkantinum fjallmegin, síðan á vegriðinu, yfir það og stöðvaðist á brúninni. Gott að enginn var á ferðinni þarna á þessu augnabliki.

Miðvikudagur 23. febrúar 2005 Kveðja frá Kanada Komdu sæll og blessaður vinnur, Hvernig hefurðu það? Héðan er allt gott að frétta. Veðrið er heitt og dásamlegt og það er alltaf nóg að gera. 
Ég lofaði að senda þér nokkrar ljósmyndir af brúðkaupi okkar Kym og vona að þú getir birt þær á Lífið á Sigló.
Efst á síðu

Miðvikudagur 23. febrúar 2005 Þessi tvö fley, komu inn fjörðinn í gær um klukkan 14:00. Olíuskipið Keilir og netabáturinn Kristinn Friðrik SI 5 102

Efst á síðu

Miðvikudagur 23. febrúar 2005 Ein gömul:
Stödd ásamt Haferninum í Rotterdam: Guðný Ósk Friðriksdóttir, Halla Jóhannsdóttir, Bergsteinn Gíslason og Birna Björnsdóttir. Þau standa við ísbíl og gæða sér á ís, þó svo að hitastigið hafi ekki verið í hærri kantinum á þessum tíma í Rotterdam, að vori.            Efst á síðu

Þriðjudagur 22. febrúar 2005  Aðsent: Þá er talstöðin í Björgunarskýlið í Héðinsfirði komin á sinn stað og þökkum við Beco og Radíóþjónustu Sigga Harðar fyrir gjöfina.  Ég fór kl. 9.30 í morgun til Héðinsfjarðar og setti stöðina upp og prófaði og virkar hún vel.
kv Ómar Geirsson / Björgunarsveitin.Strákar   Efst á síðu

Þriðjudagur 22. febrúar 2005 Fyrstu pensilför Mark Duffield málarameistara úti við í ár, voru framkvæmd í morgun í birtingunni, þessi mynd af var tekin klukkan 11 í morgun er hann var að mála hús Efnalaugarinnar við Aðalgötu. Fyrstu pensilför hans úti við á síðasta ári voru 20 apríl, er hann hóf málningu á húsinu Aðalgata 2-
Eru þetta "gróðurhúsáhrif" eða bara eðlilegt náttúrufyrirbrigði þetta tíðarfar? En í gær um klukkan 16:00 komst hitinn í 15 °C og nær allur snjór farinn,  -- nema í Skarðsdal.

Þriðjudagur 22. febrúar 2005  HJÓL M/HJÁLPARMÓTOR

- VALUR JOHANSEN -

Söfnunin hefur gengið framar öllum vonum!

Að sjálfsögðu vissum við öll að fólk hér í bæ, og víðar kom svo í ljós, myndi taka sig saman þegar eitthvað svona á í hlut, ennnnnnnn.......   Vinsamlega lesið þakkarbréf  frá okkur hér
Og hér hófst söfnunin: Föstudaginn 11. febrúar 2005         Efst á síðu

Þriðjudagur 22. febrúar 2005 Febrúarblað Hellunnar er komið út: Meðal efnis er opnuviðtal við skíðakappann Birgi Guðlaugsson, umfjöllun um útnefningar Kaupmannafélags Siglufjarðar um „Siglfirðinga mánaðarins“, opna með efni frá Grunnskóla Siglufjarðar, fréttir úr bæjarlífinu, myndir frá öskudeginum og fastir þættir í blaðinu, eins og sjávarsíðan og vísnahornið.

Þriðjudagur 22. febrúar 2005  Ein gömul:  "Verðlaunamynd" ? Spurningin er: Er þetta verðalaunamyndin, eða sú sem fyrrverandi verkstjóri minn og vinur, Jóhann G Möller er að taka og  Hólmfríður Magnúsdóttir fylgist svo náið með? - Raunar var Hólmfríður að forðast það að verða fyrir myndasmiðnum, en mér tókst að ná þessu augnabliki. Jóhanni var skemmt er hann sá myndina En Jóhann var þarna að taka myndir fyrir Alþýðublaðið er ný verslun K.F.S. var tekin í notkun ári 1966      Efst á síðu

Mánudagur 21. febrúar 2005 Þau eru nokkuð mörg áhugamálin sem Siglfirðingar stunda, sumir láta sér nægja fingurbjargir og jafnvel minna, aðrir kjósa að hafa það tröllaukið, eins og þessir bílar á þessum myndum. Þessir bílar hafa verið breyttir til torfæru og jöklaaksturs. Eigendur þeirra eru Gunnar Júlíusson útgerðarmaður (b.tv.) og Guðni Sveinsson lögregluþjónn m.fleiru (b.th. ) Þeir hafa unnið að þessum breytingum í frítímum sínum og notið til þess aðstoðar vina og kunningja, auk Jóns Aðalsteins Hinrikssonar sjómanns með fleiru, sem er þarna á myndunum, en hann hefur dvalið þarna á "verkstæðinu" flestum frístundum sínum við bílana. Nú seinni partinn í dag mun hann vara á þeim sexhjólaða, suður til að láta steypa úr trefjaplasti, hjólabretti á bílinn.   Efst á síðu

Mánudagur 21. febrúar 2005  Ein gömul:  Sörbukten við Jan Mayen. Bjargbáturinn á myndinni er af Haferninum, en þeir sem á myndinni eru, fengu að skreppa í land á eynni Jan Mayen. Það var blíðskaparveður og lágdauður sjór þegar lagt var í hann frá borði Hafarnarins, raunar alveg þar til við gerðum okkur klára til að taka land, búið var að drepa á vélinni til að vernda skrúfuna og árarnar teknar fram, þegar skyndilega eins og hendi væri veifað, komu hver stóraldan á fætur annarri og fleytti bátnum þversum langt upp á land með tilheyrandi gusugangi, engum varð meint af nema menn blotnuðu rækilega. Þarna erum við að búa okkur undir að snúa bátnum með stefnið til sjós. Allt tókst að óskum, því þarna voru hraustir strákar: Sigurður Jónsson bátsmaður - Bergsteinn Gíslason loftskeytamaður - Sigurður Ásgrímsson dagmaður í vél - Guðbrandur Sigþórsson háseti og Guðmundur Björnsson dælumaður - Það sést rétt á einn okkar á bak við Sigurð Jónsson, sem mig minnir að sé Sigurjón Kjartansson háseti.- Haförninn flutti síld frá síldarmiðunum.
Timburmaðurinn Steingrímur Kristinsson tók myndina sumarið 1967  Efst á síðu

Sunnudagur 20. febrúar 2005 Þeir trúa á vorið þessir feðgar Björn Jónsson smiður og sonur hans Jón Ingi Björnsson, þar sem þeir voru að mála fjölskyldubátinn í morgun, til að hafa hann ferðbúinn þegar grásleppan kemur.
Þetta er báturinn Ingiborg SI 60
Efst á síðu

Sunnudagur
20. febrúar 2005
Það var nóg að gera hjá vinkonunum í Aðalbúðinni við að afgreiða blóm í tilefni af konudeginum í dag. Greinilegt var að mikill áhugi er á hjá ungum sem gömlum að gleðja "kellu" sína með blómvendi. Mikið úrval var hjá þeim, það mikið að erfitt var að velja - sérstaklega fyrir karla eins og mig sem verð að játa að ég hefi reynt að gleðja konu mína með öðru en blómum hingað til. Það verður opið hjá þeim í Aðalbúðinni til klukkan 15:00  Lestu hér fyrir neðan:    Efst á síðu

Sunnudagur 20. febrúar 2005 Þorrablót Allans var í gærkveldi, þangað skrapp ég og tók nokkrar myndir, áður en blótið sjálft hófst.