Bland dagsetninga 1974
Rúðubrot og ... -- Loðnu landað á Siglufirði. Fréttir og myndir: Steingrímur.
Siglufjörður:
Rúðubrot
og járnfok í fárviðri
Siglufirði 31. janúar. --- SÍÐASTLIÐNA nótt og fyrrihlutann í dag er búið að vera hér brjálað veður og talsvert tjón hefur orðið á eignum af völdum veðurofsans. Þakplötur hafa fokið víða af húsum, gluggar brotnað í mörgum húsum og ljósaútbúnaður á götum fokið og skemmst umvörpum. Mjög slæm færð er vegna hálku og bleytu um götur bæjarins, því þessu fylgdi mikið slyddu og vatnsveður.
Þess má geta, að flugvél frá Vængjum gat ekki lent hér í gær vegna dimmviðris, sem var undanfari þessa veðurs. Sveimaði vélin lengi hér yfir en gat ekki lent og fór hún því á Sauðárkrók. Farþegar héðan, sem ætluðu að ná vélinni þar, urðu að ganga 300--400 m leið yfir ófæru á leiðinni, en þar biðu bílar. Skotfæri er beggja vegna við þennan kafla, sem er í Skriðunum. Farþegarnir misstu þó af vélinni og dúsa á Sauðárkróki, svo og þeir farþegar, sem hingað ætluðu. Þykir hálf hart, að þessi litli kafli á veginum teppi umferð þar sem ekki tæki meira en einn til tvo tíma að ryðja hann.
Mikið annríki er hjá rafmagnsmönnum og trésmiðum við að gera við skemmdir. Hluti af bænum varð rafmagnslaus um tíma því þakplata fauk á rafmagnslínu og sleit hana.
- Steingrímur