Hafðu samband:

  Þriðjudagur 9. mars 1976  

Fréttin Mbl., Ljósmyndir; Steingrímur:   

"Opnaði hurðina og hrópaði á fólkið að koma sér strax út"

- sagði Gestur Halldórsson, bílstjórinn á rútubílnum, sem fór fram af  veginum við Strákagöng.

- ÉG reyndi þvínæst að reka bílinn í bakkgír en það tókst ekki. Þá var ekki annað að gera en  stökkva upp, opna hurðina og hrópa á fólkið að koma sér strax út. Þetta sagði Gestur  Halldórsson í samtali við Morgunblaðið í gær, en Gestur ók 17 manna rútunni, sem fór fram af  veginum Siglufjarðarmegin við Strákagöng aðfararnótt sunnudags en í þessu slysi beið einn  maður bana, Magnús Sævar Viðarsson sjómaður. Gengur kraftaverki næst að takast skyldi að  koma öllum farþegum út úr rútunni stjórnlausri og bremsulausri og er það fyrst og fremst að  þakka snarræði bílstjórans að það tókst.

Þannig var rútan útlítandi, eftir veltuna niður hlíðina, fremst á bakkanum, hengiflug og sjórinn undir.

Þegar ég var rétt að verða komin út úr göngunum, sagði Gestur, fór stýrið úr sambandi. Við  reyndum að þoka bílnum út úr göngunum til þess að ég gæti notað talstöðina og kallað upp rútuna sem var á undan okkur.  Þegar stýrið fór úr sambandi var bremsan í lagi. Hins vegar þegar bíllinn var alveg komin út úr göngunum voru engar  bremsur og ég steig allt í botn.

Ég reyndi því næst að reka bílinn í bakkgír en það tókst ekki.  Þá var ekki annað að gera en að stökkva upp, opna hurðina og hrópa á fólkið að koma sér  strax út. - Fólkið stökk strax á fætur og þegar ég var búinn að hjálpa þeim út sem voru fremst komu  þeir í röð sem voru aftur í. Þegar síðasti maðurinn fór út var bíllinn við það að fara yfir brúnina. Þetta gerðist allt í svo skjótri svipan að Magnús heitinn  komst ekki út, en hann var sofandi í bílnum, sem ég reyndar vissi ekki þá.

Eins og við var að búast greip um sig hræðsla hjá fólkinu en ég get þó ekki sagt annað en  það hafi gengið vel að ná því út úr bílnum. Menn voru svo auðvitað mjög slegnir þegar þetta  var afstaðið og menn höfðu áttað sig á því sem hafði gerst.

Það sem gerðist var það að þrír af fjórum boltum sem héldu loki yfir spindilkúlu brotnuðu og það hékk á fjórða boltanum. Við það fór stýrið úr sambandi. Þegar svo fjórði boltinn gaf sig  gekk lega upp og braut í sundur bremsurörið og við það fóru bremsurnar af bílnum. Þegar  bíllinn var keyptur hingað í janúar var hann nýskoðaður og bifreiðaeftirlitinu fannst þá ekkert  athugavert við hann, sagði Gestur Halldórsson að lokum.

22 ára gamall maður lést þegar rútan féll niður 100 metra hlíð.

Magnús Sævar Viðarsson

Framhjólin komin útaf er sá "síðasti" slapp. 

MAÐURINN, sem beið bana, þegar 17 manna rútan fór útaf Siglufjarðarmegin við Strákagöng  aðfararnótt s.l. sunnudags, hét Magnús Sævar Viðarsson, Suðurgötu 24, Siglufirði. Magnús var  skipverji á skuttogaranum Sigluvík.

Magnús heitinn var sofandi þegar atburðirnir gerðust og var  ýtt við honum og reynt að vekja hann þegar fólkið flýtti sér út. Var ekki vitað betur en hann  hefði vaknað en hið rétta uppgötvaðist ekki fyrr en í þann mund er bifreiðin var að fara útaf  brúninni og var þá um seinan að koma honum til bjargar. Magnús mun hafa fallið út úr rútunni á  miðri leið niður hlíðina og er talið að hann hafi látist samstundis.

Fólkið, sem var i rútunni hafði farið á dansleik á Hofsósi kvöldið áður, en þar sýndu  gagnfræða-skólanemendur frá Siglufirði leikritið "Svefnlausa brúðgumann."  Var farið á tveimur rútum. Rúturnar voru á heimleið þegar slysið gerðist og var rútan sem bilaði  sú seinni.

Efri myndin sýnir op Strákagangna og fjarlægðina fram að brún vegar, en hún mun vera um 35- 40 metrar. Neðri myndin er tekin frá bílflakinu upp hlíðina.

Allt gekk vel þar til að kom í Strákagöng, -að bílstjórinn varð var við bilanirnar. Eins  og kemur fram í samtalinu við bílstjórann, Gest Halldórsson, hér fyrir ofan, þá var ætlunin að ýta bílnum út úr göngunum svo að talstöðvar-samband næðist við fyrri rútuna, en þegar  bremsurnar virkuðu ekki og allar aðrar leiðir til að stöðva bílinn árangurslausar skipaði  Gestur fólkinu að yfirgefa bílinn enda stefndi hann með sívaxandi hraða að vegarbrúninni.  Fjarlægð frá opi ganganna að vegarbrún er 35-40 metrar.

Gekk fólkinu vonum framar að komast úr út bílnum. Sem fyrr segir, var Magnús heitinn  sofandi og á leiðinni út, var ýtt við honum. Var talið að hann hefði vaknað en svo reyndist ekki  vera. Piltur sá, sem síðastur fór út úr rútunni, Valbjörn Steingrímsson, ætlaði einmitt að fara  að athuga með Magnús en varð frá að hverfa því bíllinn var þá kominn með framhjólin útaf  veginum og gat Valbjörn með naumindum forðað sér. Sá fólkið eftir rútunni í myrkrið en hún  staðnæmdist ekki fyrr en tæpum 100 m neðar.

Valbjörn lagði nú af stað niður flughála hlíðina til að svipast um eftir Magnúsi og komst hann  alla leið niður að bílnum þar sem hann hafði stöðvast í slakka, 15 metra fyrir ofan sjó og þótti  það tíðindum sæta miðað við aðstæður. Fann hann ekki Magnús í bílnum.