Lífið í mars 1-5 2005 | Lífið í mars 6-12 2005 | Lífið í mars 13-18 2005 | Lífið í mars 20-26 2005 | Lífið í mars 27-31 2005

>>>>>>>>>>> Lífið í mars 13-18 2005

Laugardagur 19. mars 2005 Héðinsfjarðargöng: Það hefur ekki farið framhjá neinum yfirlýsing  sem samgönguráðherrann Sturla Böðvarsson gaf í Bátahúsinu þennan dag 19. mars síðastliðinn. um Héðinsfjarðargöng. Ég sá í sjónvarpinu að mikið var klappað og glaðst yfir yfirlýsingunum um það flýta örlítið útboði um jarðgöngin. Meir að segja einn harðasti andstæðingurinn Pétur Blöndal virtist þokkalega sáttur, miðað við það sem hann sagði í ríkissjónvarpinu (20.3) þó svo að hann hafi laumað undir rós að þetta hafi verið gert af illri nauðsyn, til að standa við skrifleg fyrirheit. Ég var fjarri góðu gamni eins og lesendur mínir vita og skrifa þetta raunar í dag 21.3. Ég hefði vissulega tekið þátt í lófaklappinu þegar Karlakór Siglufjarðar söng (ekki Vísir eins og RÚV sagði) en ég ætla að geyma lófaklappið vegna Héðinsfjarðargangna, þar til fyrstu sprengingarnar við göngin heyrast.  Vinkona mín Hrönn Einarsdóttir var á staðnum og tók þar nokkrar myndir. Ef þú smellir á   sérðu hvernig henni tókst til.

Laugardagur 19. mars 2005 Unglingameistaramót Íslands var haldið um síðustu helgi, keppt var bæði í alpagreinum og göngu. Nánar um mótið er að finna HÉR

Ljósmynd: Hrönn Einarsdóttir, tekið að morgni laugardags.

Föstudagur 18.. mars 2005 Vinsamlega, athugið, : Áttunda barnabarn mitt Silja Sif Kristinsdóttir, verður fermd nú um helgina. Hún á heima í Reykjavík, þar verð ég viðstaddur og á meðan verður síða mín ekki uppfærð, frá föstudegi 18. klukkan 07:00 til mánudags seinnipartinn ? þann 21.
Veðurmyndir hvers dags verða teknar fyrir mig á meðan- og verða þær allar settar inn væntanlega á mánudagskvöld, sem og annað efni og myndir sem væntanlega kemur til mín í tölvupósti á meðan ég er fjarverandi.

Föstudagur 18.. mars 2005 Ein gömul:
Snjó mokað af mjölhúsþaki S.R.P. í aprílmánuði árið 1976
Á myndinni eru: Jón Sigurðsson frá Skarðdal, Jón Kristjánsson og Njáll Jónasson

Fimmtudagur 17. mars 2005 Katrín Dröfn Haraldsdóttir hefur verið valin ásamt Eyrúnu Ýr Pálsdóttur, frá Fjölbrautaskóla Norðurlands vestra til þátttöku á stórmóti framhaldsskólanema sem haldið verður í reiðhöllinni í Víðdal í Reykjavík 18.-20 mars. Árangur Katrínar verður að teljast mjög góður þar sem aðeins tveir nemendur úr þessum fjölmenn skóla komust áfram úr forkeppninni.
Katrín keppir í fjórgangi á hestinum Ofsa frá Engimýri. Katrín verður í 6. hópi inn á völlinn, þrír keppendur eru inní á vellinum í einu. Þessa frétt er að finna á: http://www.847.is/ Framhaldsskólamótið 2005 ---- 
Hið árlega Framhaldsskólamót í hestum verður haldið í Reiðhöllinni í Víðidal 18. - 20 mars næstkomandi. Keppt verður í fjórgang, fimmgang, tölti og fljúgandi skeiði. Vinningar í ár eru með þeim glæsilegustu sem gefin hafa verið á þessu móti og ýmis aukaverðlaun eru einnig í boði. -- Framhaldsskólamótið er eitt af stærri innanhúsmótum ársins og hvetjum við alla til að koma og sjá spennandi og skemmtilega keppni. Fjölbreyttar veitingar verða seldar á staðnum og kynningarbásar t.d. frá Hólum verða starfræktir á meðan mótinu stendur. Meira um mótið, reglur, dómara og ráslista má finna á www.blog.central.is/frhskolanefndin

Fimmtudagur 17. mars 2005 Allinn-Sportbar:  Ég leit inn á æfingu í gærkvöld hjá hópnum "Frá Óperu til Idol" sem ætla að koma á framfæri "Meiriháttar - Stórkostlegum - frábærum" söng og skemmtiatriðum í Allanum- Sportbar, næstkomandi laugardagskvöld 26. mars. Miðað við góða skapið og stemminguna, sem ríkti þegar ég mætti til að hlusta á þau, þá lofar framhaldið góðu. Myndin sýnir meirihluta skemmtikraftanna sem voru á æfingu.

Fimmtudagur 17. mars 2005 Samgönguráðherra boðar til opins fundar um samgöngumál 19. mars í Bátahúsinu klukkan 14:00 - Með honum kemur Jón Rögnvaldsson vegamálastjóri og Hreinn Haraldsson framkvæmdastjóri Vegagerðarinnar. Þar verða til umræðu jarðgangamál og fleira.

Fimmtudagur 17. mars 2005 Það gefur á bátinn. Þessi mynd var tekin  í gær, þegar báturinn Kristinn Friðrik SI 5 102 sigldi út fjörðinn um 12:30
Ekki veit ég hvert ferðinni var heiti, til fiskjar eða annað.

Fimmtudagur 17. mars 2005 Nýfæddur Siglfirðingur: Drengur fæddur á fæðingardeild Landspítalans Háskólasjúkrahúss, þriðjudaginn 15. mars. 
Foreldrar eru Steindór Birgisson og Guðrún Karlsdóttir

Fimmtudagur 17. mars 2005 Ein gömul: Texti með mynd: Leó R Ólafsson:  Eld-gamla Apótekið. Húsið stóð  á sömu lóð og Bakaríið stendur á í dag. Þetta var upphaflega Aðalgata 28 sem Aage Schiöth keypti og hóf lyfsölu í, en hann lét síðan flytja húsið á baklóð líklega 1929 og taldist það eftir það vera no. 28b. Hann stækkaði það til norðurs að lóðarmörkum og byggði svo hús það sem nú stendur á lóð no 28 sem upphaflega hýsti apótekið, þá rafmagnsverkstæði Ingólfs, svo Diddabúð og síðast bakaríið, en ég keypti húsið árið 1981. Einhverju síðar var svo skúrinn byggður milli húsanna og tengdi þau saman og í honum og gamla húsinu á myndinni var gosverkssmiðjan góða sem við Siglfirðingar munum sumir eftir. Áður en hann hóf að byggja nýja húsið hafði hann makaskipti á lóðum við Lárus Blöndal þannig að hann fékk ræmu af Aðalbúðarlóðinni við Aðalgötu og lét í staðinn mun stærri lóð við Grundargötu og þar er nú meðal annars bílastæði sem tilheyrir Aðalbúðinni. Þetta gerði honum kleift að byggja mun stærra og reisulegra hús sem setur mikinn svip á götumyndina enn þann dag í dag. Ég reif milliskúrinn 1982 og síðan gamla húsið 1983 en þá voru báðir þessir hlutar með öllu orðnir ónýtir og reyndar ekkert annað en stór slysagildra. Myndin frá því um 1929 eða fyrr. Heimildarmenn mínir voru aðalega Ingólfur í Höfn og Birgir Schiöth og hafi eitthvað skolast til í áranna rás og þú telur þig geta leiðrétt mig, þætti mér hið besta mál að það yrði gert.  -
Mínar bestu kveðjur – Leó. -- Ljósmynd: Kristfinnur Guðjónsson. © Steingrímur

Miðvikudagur 16. mars 2005 Strák og stelpu vantar far frá Reykjavík til Siglufjarðar á föstudaginn næstkomandi þau eru að fara í páskafrí. Það gengur erfiðlega að finna far fyrir þau. Það væri frábært ef einhver veit af slíku fari á lausu, og hafi samband í síma 849-8426 - (Ragna Ragnarsdóttir) 
Gunnar Ragnarsson

Miðvikudagur 16. mars 2005  Aðsent: Frétt úr Bæjarins Besta, Vestfjörðum: bb.is | 16.3.2005  08:55:00

Miðvikudagur 16. mars 2005 Aðsent: Hrönn Einarsdóttir sendi mér þessa mynd seint í gærkveldi. Hún hefur greinilega gott auga fyrir myndefninu. Hún notar þarna sólarbirtuna og skugga til að gera mynd sína áhrifameiri.

Miðvikudagur 16. mars 2005 Menningarsjóður Sparisjóðs Siglufjarðar úthlutaði í gærkvöld á Kaffi Torg, úr menningarsjóðnum samtals 1.850.000 krónum. Upphafsorð Ólafs Jónssonar; útskýringar ásamt lista yfir styrkþegana er HÉR    Og slatti af myndum hér: 

Miðvikudagur 16. mars 2005 Ein gömul:
Til samanburðar við myndirnar hér fyrir neðan af hópum Síldarvinnslunnar og SR-Mjöl, er hér mynd af starfsmönnum Síldarverksmiðja Ríkisins um 1930 - "Sami" vinnustaður undir þrem nöfnum.  Ljósmyndari ókunnur.

Þriðjudagur 15. mars 2005  Sviðaveisla hjá Síldarvinnslunni Siglufirði. Mér hlotnaðist sá heiður að vera boðin í veglega sviðaveislu með fyrrverandi vinnufélögum mínum í dag. Þar var   hraustlega tekið á veitingunum enda af nógu að taka. Ég tók auðvitað myndavélina með og smellti á nokkrum myndum. Myndin hér lengra til vinstri er af öllum hópnum, starfsmönnum S.V. í dag,  sem er talsvert minni hópur heldur en árið 2003 þegar myndin hægra megin var tekin. Eitt ber að varast við skoðun myndarinnar sem var tekin í dag, það er að hausinn sem Friðrik heldur á, er EKKI einn af sviðahausunum sem á borðum var. Vinurinn var fjarverandi, en til að sýna hve myndarlegur maðurinn er þá ákvað Friðrik að gera af honum afsteypu. Smelltu á:  

Þriðjudagur 15. mars 2005 Þessi mynd var tekin í morgun og sýnir hafíshrafl í Hvanneyrarkrók. Smelltu ef þú villt skoða myndina stærri. Einnig geturðu smellt HÉR þá sækirðu myndina enn stærri í Pixaround.exe formi.
Öruggt skjal.

Þriðjudagur 15. mars 2005 Úthlutun úr menningarsjóði Sparisjóðs Siglufjarðar fer fram á Kaffi Torg  í kvöld þriðjudaginn 15. mars kl. 20,30. Allir hjartanlega velkomnir, kaffiveitingar í boði Sparisjóðsins.
Stjórn menningarsjóða Sparisjóðs Siglufjarðar

Þriðjudagur 15. mars 2005 Ef þér leiðist, og þig vantar eitthvað spennandi til að skoða, þá skaltu skella þér á þessa síðu. Þessi síða er erlend, og er með aragrúa tegunda mynda, þrauta, skrítnar myndir og helling af tenglum til svipaðra myndefna. Byrjaðu á því að skoða meðfylgjandi mynd og vittu hvort þú getur ekki lesið eitthvað út úr henni, sem ekki sést í fljótu bragði, Þú getur stækkað myndina með því að smella á hana.

Þriðjudagur 15. mars 2005 Ein gömul:
Svo eru menn að kvarta yfir smá éljum í dag, og nokkurra sentímetra snjólagi. Svona var venjulega umhorfs á veturna hér áður fyrr, en þessi mynd er tekin 15. mars árið 1967- Það er fyrir 38 árum, á Hvanneyrarbrautinni.
Séð til norðurs

Mánudagur 14. mars 2005 Aðsend mynd: Alvöru hafísjaki Þessi mynd er víða til á netinu, og þetta er alvöruljósmynd, tekin í einstaklega tærum sjó og góðri birtu. Hún sýnir glöggt hvernig borgarísjaki lítur út, ofansjávar og neðansjávar, þar sem 9/10 hlutar jakans er neðansjávar.   (sent: G.G.S.) Nýjar aðsendar upplýsingar um myndina: Myndin er tekin af kafara sem starfar hjá borpallafyrirtækinu Global Marine Drilling á borpalli sem staðsettur er í St,Johns, Nýfundnalandi. Þeir sjá um að breyta stefnu borgarísjaka, þannig að þeir rekist ekki á olíuborpallana á svæðinu, eða sprengja þá í tætlur stafi hætta af þeim. Við þetta einstaka tækifæri var hafið lygnt og kristaltært og sólin skein beint ofan á ísjakann. Talið er að þessi borgarísjaki sé í kringum 300 miljón tonn að þyngd. Hér eru einnig svipaðar upplýsingar í "PowerPoint" formi. + stór mynd.
Þú getur ráðið hvort þú opnar skjalið beint eða vistar á tölvu þinni. Þetta er öruggt skjal.

Mánudagur 14. mars 2005 Hafíshröngl inni á Siglufirði. Varla er hægt að kalla þetta annað en smáíshröngl, þó innan um séu einstaka í meðaltali stórir jakar sem hættulegir eru sjófarendum. Ég tók nokkrar myndir í morgun svo þeir sem fjarri eru geti áttað sig á ástandinu.

Mánudagur 14. mars 2005  Kaupmannafélag Siglufjarðar tilnefnir Mann mánaðarins Þórarinn Vilbergsson og fyrirtæki mánaðarins DB Fisk ehf

Mánudagur 14. mars 2005 Ekkert ísrek er inn á Siglufjörð, það enginn ís virðist vera norðarlega á Ströndinni. Ísinn sem var að koma inn fjörðinn í gærkveldi virðist fljótt á litið séð frá svölum mínu, allur vera kominn inn í Hvanneyrarkrók og meðfram ströndinni syðst. Þessi mynd var tekin frá svölum mínum klukkan 08:15 í morgun. Þetta eru ekki mjög stórir jakar, samanburðinn má sjá á kollunni sem er þarna rétt fyrir framan.

Mánudagur 14. mars 2005 "Í kartöflugörðunum heima" Var það ekki einhvern tíma þannig sem Árni Jonssen raulaði forðum daga. Nágranni minn Eiður, sendi mér tölvupóst rétt fyrir klukkan 23:00 í gærkveldi og sagði mér að hafísjakar væru að banka á dyrnar hjá okkur. Við eigum heima í tveim norðustu húsunum í bænum, rétt við sjóinn. Viti menn, það var kominn "óslitin" ræma alveg inn í Hvanneyrarkrók að Öldubrjót og út með allri fjöru svo langt sem maður sá fyrir snjókomunni (él). Þegar ég opnaði svaladyrnar heyrðist hávaðinn í jökunum, vegna hreyfingar sjávar, sem bendir til þess að ekki sé þessi hafís mjög þéttur þar sem talsvert brim er. Ég tók að vísu mynd frá svölunum mínum, en áttaði mig á um leið og ég smellt, að slíkt er tilgangslaust þar sem leifturljósið lýsir upp hríðina og myndar "gardínu" sem ekkert sést í gegn um. Það koma myndir þegar birtir.
Klukkan  er 23:30 13.mars, þegar þetta er skrifað, en síðan fer/fór út fyrir miðnættið.

Mánudagur 14. mars 2005 Félag eldri borgara á Siglufirði og í Fljótum, hélt kynningarfund fyrir 60 ára borgara og eldri, með rausnarlegum kaffiveitingum, tertum og góðgæti í boði Kvenfélagsins Von.
Ýmislegt var til skemmtunar, einsöngur, danssýning og fleira, auk almennra fundarstarfa.
Kona mín var þar mætt með myndavélina, smelltu á

Mánudagur 14. mars 2005 Ein gömul:
Jólaskrauti komið fyrir um borð í Haferninum, jólin 1967 - Einhverstaðar undan ströndum Frakklands.(?) Guðmundur Björnsson háseti og Snorri Jónsson rafvirki.

Sunnudagur 13. mars 2005 Ein gömul:
Skíðalandsmótið á Siglufirði  -
Óveður setti svip á mótið ásamt unga fólkinu. Frábær undirbúningur og framkvæmd Siglfirðinga. HIÐ unga skíðafólk sem mestan svip setti á landsmótið á Siglufirði um páskahelgina fékk sannarlega eldskírn veðurguðanna. Mestan hluta keppnistímans var stórhríð og stormur og vægast sagt mjög erfiðar aðstæður.
Svona hófst frétt í Morgunblaðinu 29. mars árið 1967- Ef þú villt lesa frekar, þá smelltu hér hér og lestu um mótið á tveim síðum + myndaseríur.