Hafðu samband:

Skíðalandsmótið á Siglufirði:

Akureyringar sigursælir.

EKKI er hægt að segja að Siglufjörður hafi skartað sínu fegursta nú um páskana, en þar  fór skíðalandsmótið fram að þessu sinni. Loft var þungbúið allan tímann og rigning annað  slagið. Logn var þó mestan mótstímann og hiti í kringum 10 stig. Miklar leysingar hafa  verið á Siglufirði undanfarið og snjó tekið ört upp, þannig stóðu til dæmis hinar tvær  skíðalyftur Siglfirðinga á auðri jörð og ekki reyndist unnt að flytja þær að keppnisstöðnum í  tæka tíð. Þessi vandkvæði voru þó ekki alvarlegs eðlis, þó svo að himininn hafi verið grár,  sást það ekki á mannfólkinu sem undi sér hið besta við keppni og við að fylgjast með því sem  var að gerast.

Siglfirðingar lögðu mikla vinnu í undirbúning skíðalandsmótsins og lögðu margir hönd á plóginn  með óeigingjörnu sjálfboðastarfi. Undirbúningsstarfið hófst í febrúar og jókst alltaf meira og  meira er dró nær móti, alls munu um 100 manns hafa komið við sögu við undirbúninginn, en  aðalstarfið hvíldi þó á herðum landsmótsstjórnarinnar. Hún var skipuð þeim Braga  Magnússyni, Aðalheiði Rögnvaldsdóttur. Frey Sigurðssyni, Sverri Sveinssyni, Guðmundi  Árnasyni og Helga Sveinssyni.

Þegar litið er yfir skíðalandsmót það sem haldið var á Siglufirði nú um páskana er ekki hægt  að segja annað en að það hafi farið hið besta fram og verið Siglfirðingum og keppendum til  mikils sóma. Allt var skipulagt út í ystu æsar og ef snurða hljóp á þráðinn var vandinn leystur  hið snarasta.

Snjóleysi olli nokkrum erfiðleikum, t.d. þurfti að moka talsverðu magni af snjó svo  göngubrautin yrði samfelld, en Siglfirðingar fóru létt með að leysa þann vanda. Íþróttabandalagið  í Siglufirði fékk árið 1968 að gjöf frá Siglufjarðarkaupstað húseignina að Hóli, sem er fyrir innan  bæinn. Þar hefur verið innréttaður góður salur, sem var opinn alla mótsdagana og gátu gestir  fylgst með keppninni inni í heitum salnum yfir kaffibolla og kökum. Úrslit voru komin að Hóli  hálfri mínútu eftir að keppandi kom í mark og stig úr stökkkeppninni voru gerð kunn næstum  jafnskjótt og keppandinn var lentur. Úrsuslit í einstökum greinum lágu svo frammi fjölrituð fyrir  hvern sem hafa vildi, stuttu eftir að keppnisgreininni var lokið.

GANGA EINSTAKLINGA

Trausti Sveinsson hefur verið sterkastur íslenskra göngumanna undanfarin ár, en nú virðast  Halldór Matthíasson frá Akureyri hafa tekið við hlutverki hans. Halldór sigraði bæði í 15 og  30 km göngu og hlaut bestan tímann í boðgöngunni. Halldór stundar nám í Noregi og hefur góða aðstöðu meðal hinna gönguglöðu Norðmanna.

Trausti virðist ekki vera eins skarpur göngumaður og hann hefur verið á liðnum landsmótum,  endaspretturinn, sem verið hefur hans sérgrein, var ekki umtalsverður að þessu sinni. Halldór  Matthíasson er þrekmikill göngumaður, lipur og hefur betri stíl en aðrir, ef til vill er ekki rétt að tala um göngu hjá honum, en það er frekar eins og  hann svífi áfram.

Reynir Sveinsson bar af keppendum í sínum flokki 17-19 ára eins og gull ber af eir. Reynir er  mjög efnilegur og ekki ólíklegt að hann og Halldór eigi eftir að bítast um verðlaunasæti á  næstu landsmótum. Reynir sigraði einnig í göngukeppninni í sínum flokki í fyrra.

Keppendur í flokki fullorðinna voru 19 í 15 kílómetra göngunni og 12 í 30 kílómetrunum. Í  yngri flokknum voru átta keppendur í 10 km göngu. Styttri göngukeppnirnar fóru fram rétt  innan við Hól, fyrsta dag mótsins, þriðjudaginn fyrir viku, en 30 km gangan í Skarðsdal á páskadag .

Göngugarparnir úr Fljótum: Trausti Sveinsson, Magnús Eiríksson og Reynir Sveinsson

BOÐGANGA

Þrisvar sinnum 10  km boðganga fór fram í Hólsdal á  skýrdag og urðu Fljótamenn öruggir sigurvegarar. Þeir urðu rúmri mínútu  á undan sveit númer tvö, sem var a-sveit Ísfirðinga. Siglfirðingar komu  nokkuð á óvart með frammistöðu sinni í boðgöngunni.

Eftir 20 km voru  þeir samsíða Fljótamönnum, en á lokasprettinum stakk Trausti Sveinsson  keppinauta sína af og tryggði sigur Fljótamanna. Kristján Guðmundsson  gekk síðasta sprettinn fyrir Ísfirðinga og gekk mjög rösklega, fór fram úr  Siglfirðingum og færði Ísfirðingum annað sætið, níu sekúndum á undan  Siglfirðingum.

Alls tóku 7 sveitir þátt í göngunni. sem fram fór í sunnan andvara og rigningu. Halldór  Matthíasson frá Akureyri fékk lang bestan tíma keppenda, hann gekk á 25.47 mínútum, en næst maður var Trausti Sveinsson, gekk á  27.49 mínútum.

Rögnvaldur Gottskálksson í skíðastökki

STÖKK

Skíðalandsmótinu sem fram fór í fyrra sigraði Björn Þór Ólafsson í  stökkkeppninni, þó ekki með miklum yfirburðum, því hann hlaut aðeins 0.6 stigum meira en  Steingrímur Garðarsson frá Siglufirði. Nú var líka komið að Steingrími að sigra, gerði hann það  næsta örugglega og virtist vera í mun betri æfingu heldur en Björn Þór.

Steingrímur átti lengstu stökkin, en  lengdin kom nokkuð niður á stílnum, sem hefði mátt vera talsvert betri. Björn Þór hefur oft átt  betri stökk. heldur en að þessu sinni og virtist ekki vera eins öruggur og áður.

Keppnin í  stökkinu fór fram í Hvanneyrarskál og mættu fjórir til leiks í flokki fullorðinna.Í flokki 17-19 ára sigraði Rögnvaldur Gottskálksson örugglega og sýndi bæði bestan stíl  keppenda í sínum flokki og öryggi.

Er ekki vafi á því að Rögnvaldur á eftir að bæta sig mikið í  íþróttinni og verður gaman að fylgjast með honum á næstu skíðalandsmótum. í yngri flokknum  voru keppendur fimm.Það vakti athygli að allir keppendurnir í stökkmeistarakeppninni voru frá Siglufirði  og Ólafasfirði, en því miður eru þetta einu staðirnir sem sýna stökkíþróttinni einhvern áhuga.

NORRÆN TVÍKEPPNI

Í norrænni tvíkeppni er keppt í stökki og göngu og að þessu sinni var Björn Þór Ólafsson  frá, Ólafsfirði kominn með yfirburða stöðu eftir gönguna.Í fyrsta stökki sínu í tvíkeppninni náði  Steingrímur Garðarsson risastökki, stökk 52 metra og vænkaðist hagur hans til muna við  það.Í öðru stökki Björns Þórs hlekktist honum illa. á, missti jafnavægið og snerist í hring í  loftinu. Björn slapp þó furðanlega vel, en engan veginn án meiðsla. Hann lenti á höfðinu í  snjónum, tognaði illa í hálsi og var fluttur á sjúkrahúsið á Siglufirði. Björn var þó óðum að ná  sér og var kominn aftur á ról á föstudaginn langa, tveimur dögum eftir áfallið.

Við þetta óhapp  Björns var einsýnt að Steingrímur sigraði, en eigi að síður náði Björn öðru sætinu. Í flokki 17-19 ára varð Rögnvaldur Gottskálksson hinn öruggi sigurvegari, hann hlaut tæplega  100 stigum meira en næsti maður, sem var Hörður Geirsson. Rögnvaldur virðist vera nokkuð  jafnvígur í stökki og göngu, en segir þó sjálfur að stökkið sé númer eitt hjá sér.

STÓSVIG KARLA

Það var ekki sumarlegt á sumardaginn fyrsta er keppni fór fram í stórsvigi karla og kvenna og  boðgöngu. Hitinn var að vísu 10 stig, en rigningarsuddi og leiðindagjóla gerðu áhorfendum, sem  voru margir, og keppendum lífið leitt. Í stórsvigi karla var búist við því að glíman myndi standa  á milli þeirra félaga Hauks Jóhannssonar og Árna Óðinssonar frá Akureyri. Ísfirðingar voru þó  ekki á sömu bylgjulengd, sögðust þekkja sína heimamenn og voru vissir í sinni sök um sigur  Hafsteins Sigurðssonar. Þegar á hólminn var komið reyndust Vestfirðingarnir hafa rétt fyrir sér,  Hafsteinn sigraði, en Akureyringar urðu að láta sér nægja annað sætið.

Það var ekki mikill munur á fyrsta og öðrum manni í stórsviginu, aðeins munaði 15  hundraðshlutum úr sekúndu á tímum Hafsteins og Hauks. Í þriðja sæti varð Reykvíkingur  Guðjón Ingi Sverrisson og kom frammistaða hans skemmtilega, á óvart. Guðjón keppti í b- flokki í Reykjavíkurmótinu í svigi og stórsvigi, en hlaut eigi að síður bestan tíma allra keppenda  á því móti. Hann sannaði svo rækilega á skíðalandsmótinu að þeir sigrar voru ekki nein  slembilukka. Guðjón er 19 ára að aldri og vonandi á hann eftir að halda merki Reykvískra  skíðamanna hátt á lofti í framtíðinni.Árni Óðinsson var ræstur nr 11 og var brautin þá orðin nokkuð grafin og erfið á köflum.  Árni keyrði samt sem áður á fullu og slakaði ekkert á, en í einni beygjunni, talsvert fyrir neðan  miðja braut, hlekktist honum á og missti við það jafnvægi og allan hraða. Hann hélt þó áfram og  tókst að ná nokkuð góðum tíma og fjórða sætinu. Gunnar Jónsson, Ísafirði var ræstur fyrstur og náði mjög góðum tíma, en hann var svo óheppinn að sleppa úr einu hliði og þrátt fyrir  að hann tapaði tíma á því, var hann eðlilega dæmdur úr leik.Brautin var löng og tók á þrek keppenda, sem margir hverjir voru útkeyrðir er í  markið kom.

Þá grófst brautin er leið á, sérstaklega efst, en þar var blotinn mestur.  Rásmark var í norður hlíð Illviðrishnjúks og lá brautin niður með svonefndum Skarðsdalshryggjum neðst í Skarðsdal.

Þessi mynd var tekin eftir svigkeppnina af hinum sigursælu Akureyrarstúlkum. Frá vinstri: Margrét Vilhelmsdóttir, Margrét Þorvaldsdóttir, Margrét Baldvinsdóttir og Guðrún Frímannsdóttir

STÓRSVIG KVENNA

Stórsvig kvenna fór fram sunnar í hlíðinni fyrir neðan Illviðrahnjúk en stórsvig karla, en markið  var á sama stað. Í stórsvigi kvenna mættu 10 keppendur til leiks, af þeim voru fjórar frá  Akureyri . Akureyrsku stúlkurnar gerðu það ekki enda sleppt í stórsviginu þær unnu þrefalt og  hlutu auk þess fimmta sætið.

Margrét Baldvinsdóttir bar sigur úr býtum og var tími hennar rúmum þremur sekúndum betri  en Margrétar Þorvaldsdóttur, sem varð önnur, á annarri og áttundu manneskju munaði svo  ekki nema tæpum þremur sekúndum og sést á því að baráttan var hörð um hvert einasta sæti.  Þær sem fyrstar voru ræstar höfðu þau hlunnindi að fara ógrafna braut og var það þungt á  metunum.

Sigrún Grímsdóttir frá Ísafirði og Áslaug Sigurðardóttir úr Reykjavík voru taldaar líklegar til  að hljóta verðlaunasæti, en þeim tókst ekki vel upp og urðu að sætta sig við fjórða og sjötta  sætið. Allar eru stúlkurnar, sem efstu sætin skipuðu eru ungar að árum og eiga því að öllum  líkindum eftir að berjast á næstu landsmótum.

Sigursveit Akureyringa í flokkasvigi. Frá vinstri: Haukur Jóhannsson, Árni Óðinsson,  Jónas Sigurbjörnsson og Viðar Garðarsson.

SVIG KARLA 

Akureyringar voru harðir í horn að taka á þessu skíðalandsmóti og þeir sönkuðu að sér  góðmálminum, hlutu alls níu gullverðlaun. Í svigi karla voru þeir Árni Óðinsson  og Haukur  Jóhannsson í sérflokki, eftir fyrri umferðina hafði Haukur tæprar sekúndu forskot. Í síðari  ferðinni keyrði Árni á fullu, greinlega ákveðinn í að verja titil sinn. Það tókst honum ekki, því þó hann minnkaði muninn mjög mikið  munaði 3/100 úr sekúndu á þeim Hauki í vil.

Hafsteinn Sigurðsson skipaði svo þriðja sætið í sviginu og mjög efnilegur Ísfirðingur, Valur  Jónatansson, það fjórða. Það er nokkuð einkennilegt að Akureyringur sigri í svigi, en Ísfirðingur  í stórsvigi, venjan hefur verið sú að Akureyringar væru sterkari í stórsvigi og Ísfirðingar í svigi.

Jóhann Vilbergsson, sá „aldni" skíðakappi stóð sig með miklum sóma á þessu móti, hann  varð fimmti í sviginu og áttundi í stórsviginu. Jóhann hefur nú tekið þátt í 23 skíðalandsmótum í  röð.

Siglfirðingar áttu ekki margar skrautfjaðrir í alpagreinum, en þó kom frammistaða Andrésar Stefánssnar skemmtilega á óvart, hann hefur ekki tekið þátt í neinu punktamóti í vetur og  hafði því lélegt rásnúmer, en stóð sig eigi að síður með ágætum. Svigkeppnin fór fram á  laugardaginn í norðurhlíð Skarðsdals og voru þátttakendur 28 Haukur Jóhannsson fékk bestan  brautartíma í fyrri ferðinni, en Árni Óðinsson í þeirri síðari.

SVIG KVENNA

Í svigi kvenna var eingöngu um innbyrðis keppni Akureyrar stúlknanna að ræða. Eftir fyrri  ferðina hafði Margrét Þorvaldsdóttir bestan tíma, rúmlega hálfri sekúndu betri en nafna hennar  Baldvinsdóttir. Í síðari ferðinni hlekktist Margréti Þorvaldsdóttur á og hætti keppni. Sigraði  Margrét Baldvinsdóttir því nokkuð örugglega fékk tveimur sekúndum betri tíma en þriðja  Margrétin, Vilhelmsdóttir. Það undraði enga á því að tár skyldu blika á kinnum Margrétar  Þorvaldsdóttur þegar hún óskaði stöllum sínum til hamingju.

Þetta skíðalandsmót á örugglega eftir að geymast í huga Sigrúnar Grímsdóttur frá Ísafirði, ekki  vegna glæstra sigra, heldur vegna mikilla óheppni. Undir eðlilegum kringumstæðum hefði hún  átt að geta veitt Akureyrarstúlkunum verðuga keppni, en bæði í flokkasvigi og svigi missti hún af  sér skíðin og tapaði við það mörgum dýrmætum sekúndum. Svig kvenna fór fram neðst í Skarðsdal og voru keppendur 13.

FLOKKASVIG

Akureyingar höfðu yfirburði í flokkasviginu, bæði í karla og kvennaflokki. Í karlaflokki fékk Haukur Jóhannsson besta  brautartímann í báðum ferðum.

Í flokki kvenna voru þátttöku sveitirnar þrjár, frá Akureyri, Siglufirði, og blönduð sveit frá Reykjavík og Ísafirði.  Akureyrarsveitin sigraði með yfirburðum, Siglfirsku stúkurnar urðu aðrar, en blandaða sveitin  var dæmd úr leik, en hún var með sem gestasveit. Áslaug Sigurðardóttir úr Reykjavík sýndi nú  loksins sitt rétta andlit og fékk bestu brautartímana.