fimmtudagur 31 október 1974
Húseiningar hf. hafa nú reist sitt fyrsta einingarhús úr timbri að Fossvegi 23 hér í bæ. Tók það fyrirtækið rétt rúma 2 daga að reisa húsið, það er, gera það fokhelt.
Stærð hússins er 109 fermetrar að flataramáli á tveim hæðum, nánar tiltekið stór stofa, 3 herbergi, eldhús og bað á hæðinni, ásamt bílskúr, geymslu, kyndingu, 2 herbergjum og leikgangi í steyptum kjallara.
Verð timbureininganna, þe. útveggir, þak og innveggir með öllum hurðum er 2,1 milljónir króna, en áætlað heildarverð hússins er tæplega. 5,6 milljónir króna og þá fullbúið að "öllu leyti" og tilbúið til íbúðar. Bjarni Þór Jónsson, bæjarstjóri, mun eiga að búa í þessu húsi og flytur hann í það á næstunni.
Um síðustu helgi voru hér staddir fulltrúar frá Húsnæðismálastjórn og Rannsóknarstofnun byggingariðnaðarins til þess að skoða og "taka út" húsið. Fundu þeir ekkert athugavert við gerð og frágang þess, sem lokið er og telja að fyrirtækið eigi framtíð fyrir sér. Er þess nú loks að vænta, að yfirvöld viðurkenni formlega þá byggingaraðferð, sem hér er viðhöfð.