Lífið í Júlí 1-9 2005 | Lífið í júlí 10-16 2005 | Lífið í júlí 17-23 2005 | Lífið í júlí 24-31 2005

>>>>>>>>>>> Lífið í júlí 24-31 2005

Sunnudagur 31. júlí 2005  Hvanneyrarskál - Síldarævintýrið Fjallahringurinn og byggðin kynnt fyrir gestum : Hreinn Júlíusson - og smá bænastund með séra Sigurði Ægissyni  í morgun klukkan 11:30 - 13:00  Blíðskapur veður, hiti og sól. Það eina sem vantaði var magnarakerfi eins og verið hefur til reiðu undanfarin ár - en af einhverjum sökum hefur stjórnendum Síldarævintýrsins ekki komið búnaðinum á vettvang, sem háði það mjög heyrnadaufum og þeim sem fjærst voru, vegna þess fróðleiks sem sumir misstu af þegar Hreinn Júlíusson miðlaði gestum nöfnum og kennileitum fjallahringsins okkar og fleira bænum tengt. Og einnig háði það bænastund þeirri sem Sigurður Ægisson stjórnaði.
Myndasyrpa hér >>

Sunnudagur 31. júlí 2005 50 ára afmæli  Erla Steinsdóttir hélt upp á 50 ára afmæli sitt í gær. Hún kom á Síldarævintýrið í fyrra og þótti svo gaman þá að hún tók þá ákvörðun um að hér skyldi hún halda upp á afmæli sitt að ári. Hún kom núna með stórt samkomutjald og smalaði með sér vinum og vandamönnum og stóð við orð sín. Erla er þarna með eina af afmælisgjöfum sínum, hænuna Dorid, sem vakti mikla kæti veislugesta sem sjást ásamt fylgdarliði á hinni myndinni

Sunnudagur 31. júlí 2005
Úra og Gullsmíðasafn Hafdísar K Ólafsson. Eyrargötu 16 -- Þangað kom ég við í gær til að skoða hið umfangsmikla safn hennar, sem í raun er aðeins lítið brot af þeim munum sem hún hefur safnað.  En safnið það er staðsett þar sem áður var úrsmíðaverkstæðið og verslunin KR. BJÖRNSSON GULLSMIÐUR  Þarna er ógrynni allskonar úra, klukka, silfur og gullmuna og fleira augnakonfekt.  -- Safnið verður opið um tíma frá klukkan 13 - 16 á daginn. Á myndin til lengst til vinstri er Hafdís að sinna gestum sem jafnframt skrifa í gestabókina á næstu er Júlíus Jónsson að glugga í úrið sitt sem hann fékk í fermingagjöf á sínum tíma, en faðir hans var gullsmiður og vann þarna hjá föður sínum ásamt bróðir Svavari, á næstu mynd er Hafdís inni á gamla smíðaverkstæðinu. Þá er þarna hluti af klukkusafninu og síðan skiltið sem áður var fyrir ofan innganginn.

Sunnudagur 31. júlí 2005  Hlaupið í Skarðið --
Myndasyrpa frá Gunnlaugi  Guðleifssyni frá Skarðshlaupinu í gær

Laugardagur 30. júlí 2005 Í morgun klukkan 10:25 fóru þrír hjólreiðakappar af stað frá Torginu á Siglufirði í hringferð í leiðina út úr bænum í norður, gegn um Strákagöng,  vestur með Strákafjalli að gatnamótunum við Skarðsveg og þaðan upp  og yfir Siglufjarðarskarð og niður Skarðsveginn til Siglufjarðar aftur.
Á myndinni sitja hjólreiðamennirnir á knöpum sínum, en á myndinni eru: Tómas Möller - Baldvin Einarsson (hvatningaaðilinn) - Theódór Sólonsson -  Sigrún, sem fylgdi þeim eftir á bifreið og Pálmi Bjarnason - Ég er ekki viss um hvort nöfnin eru í réttri röð, en allir þekkja Baldvin (á stuttbuxunum) og fylgdarmaðurinn Sigrún fer ekki á milli mála, þó svo ég hafi ekki föðurnafn hennar við höndina.

Laugardagur 30. júlí 2005  Það var rigningarsuddi (úði) í morgun þegar þessi mynd var tekin klukkan 08:45. En nánast logn og 11 °C hiti.

Laugardagur 30. júlí 2005 Myndin hér til hliðar er tekin klukkan 16:30 í gær, og sýnir fólk sem var á Torginu að hlusta á lifandi músík á sviðinu.
Fleiri myndir teknar klukkan 20:30 - 22:00 á svipuðum slóðum um kvöldið koma í ljós ef þú smellir á 

Laugardagur 30. júlí 2005  Gústi guðsmaður: Myndlíkan sem tileinkað er Gústa guðsmanni var afhent í gær sem gjöf til Síldarminjasafnsins, frá listamanninum Aðalheiði Eysteinsdóttur, Siglfirðingi hf, Íslandsbanka og Sparisjóði Siglufjarðar. Þetta listaverk, ásamt fleirum eftir Aðalheiði. hafa verið til sýnis á safninu í sumar.
Myndin sýnir fulltrúa Siglfirðings hf. Sigþóru Gústafsdóttur, Hörð Júlíusson útbússtjóra Íslandsbanka, skúlptúrið "Gústi" - listamanninn Aðalheiði og Örlyg Kristfinnsson safnstjóra við afhendinguna. Fulltrúi Sparisjóðsins var fjarverandi

Laugardagur 30. júlí 2005  Ein gömul:  Frá gömlu góðu síldarárunum.
Ásgrímur Sigurðsson - Friðrik Guðjónsson - Barði Barðason - Björn Sigurðsson og Eyþór Hallsson

Ljósmynd: Júlíus Júlíusson

Föstudagur 29. júlí 2005  Stefnir í "örtröð ?" Gestum Síldarævintýrsins hefur fjölgað óvenju ört miðað við það hversu snemma fólk hefur komið, en strax á miðvikudag fór fólk að koma  húsbílum og tjöldum fyrir á tjaldstæðunum í miðbænum við torgið og fleiri staði. Þessi mynd var tekin í morgun af svæðinu sunnan við Torrið. Nægt pláss er þó á öðrum stæðum inni í bænum sem eru víða ætluð tjöldum og húsbílum - og þá er ótaliðn svæðin inni við Hól og sunnan við Stórabola. En Það er pláss fyrir 10 þúsund gesti á öllu svæðinu svo ekkert þarf að óttast um að ekki verði pláss fyrir alla -- og dagskráin er mjög fjölbreitt 

Föstudagur 29. júlí 2005 Frábærum tónleikum ÓB kvartetts og  gestasöngvara þeirra Helenu Eyjólfsdóttur og Fílapenslum lauk rúmlega eftir miðnættið í gærkveldi. Söngvararnir allir voru margsinnis kallaðir upp til endurtekningar á lögum sínum og var auðheyrt og séð að allir skemmtu sér konunglega. -- Myndasyrpa frá þessu kvöldi er hér: 

Föstudagur 29. júlí 2005  Ein gömul:   Í tilefni af Síldarævintýrinu 2005.
Þessi drungalegi kofi/hús var einn helsti dvalarstaður óeirðaseggja hér áður fyrr á árunum 1940-1955. Til að komast þar inn (fyrir utan óþekktina) þurfti að fara inn í lítið port umlugt hárri girðingu skreyttri með gaddavír, þar fyrir innan voru dyr af einu af hrörlegustu vistaverum þess tíma og kallað var fangelsi lögreglunnar á Siglufirði. Oft var þar þröngt á þingi, svo þröngt að mannréttindapostular okkar tíma hefðu farið úr sambandi ef þeir hefðu verið tiltækir á þessum árum. Neyðarúrræði lögreglunnar þegar ekki var hægt að troða fleirum þar inn, var að keyra þeim fram á fjörð og láta þá ganga í bæinn til að láta renna af þeim ölvímuna. Það kom nokkrum sinnum fyrir að utanaðkomandi skipsfélagar eða vinir, tókst að "frelsa" fangana sem þar voru, þar sem ekki var föst gæsla þrátt fyrir fangafjölda. -
Fangelsið var við Gránugötu, sem næst núverandi austurhluta Ráðhússins.

Fimmtudagur 28. júlí 2005  Sífellt eykst aðsókn að Síldarminjasafninu. Í gær kom hingað danskur ferðahópur og var þá sérstaklega sett á svið fyrir þá síldarsöltun, sem tókst með ágætum eingöngu með starffólki safnsins sem tók að sér hlutverk síldarsaltendanna í stað hinna hefðbundnu þátttakenda, leikara frá Leikfélagi Siglufjarðar. Það eina sem ekki var við hæfi var síldin sem Norðlendingar geta vart kallið síld, frekar hornsíli. En þegar síldin sem pöntuð var frá Austfjörðum í þessum tilgangi, kom þá höfðu þeir sent eitt tonn af mjög smárri úrkastssíld, eða það sem Siglfirðingar myndu frekar kalla síli en síld miðað við "gamla daga".  Skoðaðu nokkrar myndir hér =

Fimmtudagur 28. júlí 2005  Í kvöld mun   -  ÓB kvartett hita upp fyrir Verslunarmannahelgina með söngskemmtun á Kaffi Torg kl 22,00  --  Gestasöngvarar kvöldsins Helena Eyjólfsdóttir og Fílapenslar

Húsið verður opnað kl 20:30 Miðasala við innganginn, aðgangseyrir kr 1500 --- 
Byrjum helgina með stæl og allir að mæta 

Fimmtudagur 28. júlí 2005  Hellan 7. tölublað ársins er komin út . Meðal annars efnis í blaðinu er: Opnuviðtal við Benedikt Sigurðsson kennara og fræðimann-- "Ransý" ekkja Hauks Mortens segir frá rómantískum dögum - Samantekt að lokinni Þjólagahátíðinni - Frjósemi frá Jórunni - Fréttir úr bænum ofl.

Fimmtudagur 28. júlí 2005  Ein gömul:   Tveir upprennandi  tónlistarmenn, þeir  eru:
Sturlaugur Kristjánsson sem spilar á flöskur og Jón Ægisson sem spilar á gítar. (bróðir Sigga prests)
Myndin er tekin 11. apríl 1970 að Hótel Höfn, á árshátíð Gagnfræðaskólans.

Miðvikudagur 27. júlí 2005 VEFMYNDAVÉLIN. -- Til þeirra sem stutt hafa verkefnið sem stefnt var að, að gengið yrði frá núna fyrir Verslunarmannahelgina það er vefmyndavél með útsýn yfir Siglufjörð tengd inn á vef minn Lífið á Sigló. Áætlunin nær því miður ekki settu marki innan þess tíma. En óhapp varð í Danmörku vegna hlífðarhúss (plast hjálms) sem myndavélin átti að vera í, en það brotnaði í flutningi frá Ítalíu þar sem húsið var keypt, svo uppsetningin tefst af þeim sökum. Vélin sjálf hefur verið keypt, en hún verður í Reykjavík þar til hlífðarhúsið kemur til landsins.

Miðvikudagur 27. júlí 2005 Hann kann ýmislegt fleira þessi bankastjóri en að telja peninga. Þetta er Hörður Júlíusson útibússtjóri Íslandsbanka að þvo glugga stofnunarinnar á Siglufirði í morgun. Hann tekur víða til hendinni, ma. sinnir unglingastarfi og öðru félagstarfi auk þess sem hann er einn af hinum frægu Fílapenslum.  Spurningin er hvort kollegar hans fyrir sunnan og víðar þvo einhvern tíma glugga sinna stofnana.  svennith@simnet.is

Miðvikudagur 27. júlí 2005 Þessi mynd var tekin klukkan 03:30 í morgun - til norðurs frá Siglufirði (Veðurstöðinni í Bakka) og synir Siglunes til hægri - þéttan þokubakka fyrir norðan fjörðinn niður við sjóinn og geisla sólarinnar í skýjunum fyrir ofan

Miðvikudagur 27. júlí 2005 Það gengur á mjölbirgðirnar sem Andersen heldur utan um hjá Síldarvinnslunni á Siglufirði, en aðeins rúmlega 500 tonn voru eftir þegar flutningaskipið Haukur hafði lokið við að lesta 476 tonn í gærkveldi.
En Andersen er bjartsýnn maður, og ekki kæmi mér á óvart þó honum yrði að ósk sinni um góða haustvertíð í ár, svona  30 þúsund tonn fyrir áramótin, til að bæta fyrir vonbrigðin með aflýsta sumarvertíð.

Miðvikudagur 27. júlí 2005 Þessi veiðimaður, ásamt fleirum var með stöng í Hólsánni (Fjarðará)  í gærdag.
Ekki veit ég um aflann, en samkvæmt veiðisögu  Gauta í versló þá er lítið eftir í ánni, en hann sagði á bloggsíðu sinni í dag að hann og Tommi Píp hefðu hreinsað ána deginum áður.  - En þið tókuð eftir því að ég undirstrikaði veiðisögu Gauta.

Þriðjudagur 26. júlí 2005
Aron Ingi Steingrímsson
er 10 ára í dag
Systir hans Margrét Selma er með honum á myndinni

Mánudagur 25. júlí 2005   Boltavöllurinn sunnan við Barnaskólann er kominn vel á spöl til fullkomnunar.
Búið er að leggja gervigrasið á völlinn og verið er að ganga frá þeirri vinnu

Mánudagur 25. júlí 2005  Dagskrá Síldarævintýrisins er að finna hér   og á föstum tengli efst á síðunni, þar til hátíðinni líkur í ár

Mánudagur 25. júlí 2005  Frétt um Herhúsið, Janne Laine og fleira tengt listmenningu:
       Meðfylgjandi eru tvær myndir af verkum Finnska listamannsins Janne Lain. -- Hann hefur sýnt verk sín út um allan heim og hefur unnið að list sinni allt frá Herhúsinu á Siglufirði til Japans, Kína, Afríku og víða um Evrópu.  --- Hann var fyrsti gestalistamaðurinn sem dvalið hefur í Herhúsinu. Þeir listamenn sem dvelja og starfa að list sinni í Herhúsinu þurfa að vera með uppákomu fyrir bæjarbúa í lok dvalar sinnar sem kemur án efa til með að gefa skemmtilegt krydd í okkar yndislega bæ sem Siglufjörður er. -- 
       1. ágúst næstkomandi fæ ég afhenta fasteignina að Grundargötu 3. en þangað ætlum við Addi maðurinn minn að flytja þegar við erum búin að gera aðeins upp húsið. Þar sem ég er bæði starfandi myndlistamaður og hönnuður, þarf ég talsvert pláss. (Ég hanna fyrir fyrirtæki fyrir sunnan.) Teiknistofan mín og myndlistarvinnustofan mín koma til með að vera starfrækt hjá mér á fyrstu hæð hússins.
 -- Með bestu kveðju Brynja Baldursdóttir formaður Herhúsfélagsins.

Mánudagur 25. júlí 2005
Kolbrún Ýr Jósefsdóttir
er 8 ára í dag (til vinstri á myndinni).
Með henni á myndinni er frænka hennar Sara Lind Þorsteinsdóttir.

Sunnudagur 24. júlí 2005 
Víðförlir ferðalangar. --
Þessir þrír bílar hér nær á myndinni voru framan við Síldarminjasafnið í hádeginu og farþegarnir að skoða Síldarminjasafnið
svennith@simnet.is 

Sunnudagur 24. júlí 2005 
Herhúsið og starfsemi þess. Húsið var tekið í notkun um síðustu mánaðarmót sem gestavinnustofa fyrir innlenda og erlenda listamenn. Listamennirnir koma til með að dvelja í húsinu í stuttan tíma eða allt frá einum mánuði til að starfa að list sinni. Gestavinnustofur sem þessi eru starfræktar út um allan heim. Óskað er eftir því við listamennina sem dvelja hverju sinni í húsinu, að gefa svolítið af sér í bæinn með því að vera með uppákomu að eigin vali í lok dvalarinnar. Síðastliðinn föstudag (22/7) var komið að lokum dvalar fyrsta gestalistamannsins Finnska myndlistamannsins Janne Laine. Hann var með uppákomu í Herhúsinu á föstudagskvöldið þar sem hann kynnti listsköpun sína. - Ég mætti og skoðaði húsið í leiðinni sem er hið glæsilegasta. Stór og góður sýningasalur ásamt þægilegri aðstöðu er á neðri hæðinni, en eldunaraðstaða og svefnpláss á þeirri efri. Myndin til vinstri er af listamanninum og til hægri við hann er eitt af mörgum verkum hans sem sett voru með myndvarpa á einn (panil)vegg sýningarsalarins -- Hinar myndirnar tvær, eru af vistaverum hússins á efri hæð.

Sunnudagur 24. júlí 2005 Ein gömul + nokkrar í viðbót. Myndasúpa, aðallega frá 1968 og 1969, myndir frá Haferninum, Kabarett Sumarvöku í Nýja Bíó og fleiri myndir. Margar þeirra hafa ekki komið fyrir almenningssjónir áður og sumar munu koma verulega á óvart: Sannkölluð kokteilsúpa.
  Stúlkurnar hér til hliðar eru EKKI frá Holliwood, heldur Siglfirskar skvísur í góðu stuði.