Ráðhústorg 1 | Svínabú | Börnin og brunaliðið | Hlíðarvegur 3c | Sjö brunaútköll | Eldur & Hugleiðing | Þrjár brunasögur | Fimm brunar | Netastöð / Hótel Höfn | Eldur-Myndir (1) | Tunnuverksmiðju-myndir | Eldur Haugasund | Fleiri myndir | Eldur tunnuverksm. | Eldur Vélaverkstæði | Aðalgata 9 | Ýmsar brunasögur

>>>>>>>>>>> Fimm brunar

Mjölnir 21 janúar 1953

Bæjarpósturinn

Eldsvoði.

Laust eftir miðætti aðfaranótt 8. janúar s.l. varð elds vart  í Bíókaffi og Versluninni Bræðraá. Slökkviliðið kom fljótt á vettvang og var  þá orðinn allmikill eldur, bæði í búðinni og uppi í salnum á Bíókaffi.  Slökkviliðinu tókst að buga eldinn  eftir um tveggja tíma viðureign.

Stillilogn var er eldurinn kom upp og  auðveldaði það mjög slökkvistarfið.  Óvíst er nema þarna hefði orðið  stórbruni, ef hvasst hefði verið og  óhægt um slökkvistarf. Ekki er vitað um eldsupptök og hefur málið  verið í rannsókn að undanförnu

Mjölnir 28. október 1953 

Bæjarpósturinn

Eldsvoði.

Aðfaranótt s.l. þriðjudags brann litið reykhús, sem þeir  Þórarinssynir áttu og stóð að húsabaki á lóð þeirra við Lækjargötu.  Var það alelda þegar eftir var tekið  um morguninn og ógerningur að  bjarga nokkru af kjötinu, sem í því  var.

Mikið af kjöti var í húsinu, eign  þeirra bræðra, ca. 10 þúsund kr. virði  og var það og Húsið óvátryggt. Er  þetta tilfinnanlegur skaði og mikill  fyrir þessar fjölskyldur.

Mjölnir 30. desember 1953

Bæjarpósturinn

Bruninn í S.N.'30. - Undanfarið  hefur staðið yfir rannsókn vegna  brunans í gömlu mjölskemmu S.R.'30  þann 16, þ.m. Hefur sannast, að  unglingar hafa um alllangt skeið getað komist inn í kaffistofu skemmunnar og m.a, farið þangað til að  reykja á laun.

Hafa nokkrir unglingar játað að hafa farið inn í kaffistofuna daginn, sem bruninn varð.  og a.m.k. tveir þeirra reyktu þar.Eru taldar líkur á að kviknað hafi  í skemmunni vegna ógætnilegrar meðferðar unglinga með eld í kaffistofunni.Rannsókn málsins var ekki lokið í  gær, þegar blaðið hafði tal af lögreglunni

Mjölnir 21 júlí 1955  (frétt)

HÚSBRUNI

Verkamannafjölskylda missti  heimili sitt.

Um kl. 3 e.h. mánudaginn 11.  þ.m. kom upp eldur í húsi Ólafs  B. Gíslasonar, Túngötu 9. Voru  bæði hjónin og elsta dóttir þeirra  við vinnu úti, en heima var ungbarn og litlar systur þess, sem  gættu þess. Húsið varð fljótt alelda, en  slökkviliðinu, sem kom fljótt á  vettvang tókst eftir h.u.b. hálfa  klukkustund að ráða niðurlögum  eldsins.

Húsið er einlyft timburhús á steinkjallara. Brann það  að mestu leyti að innan, svo og  allir innanstokksmunir fjölskyldunnar, fatnaður og áhöld.

Engum blandast hugur um, að  tjón þessarar fjölskyldu er mikið.  Þótt eigur fátækrar verkamanns fjölskyldu leggi sig ekki á upphæðir, sem um þyki talandi á  fjármálasviði dagsins í dag, þá  eru þær þó það verðmætasta og  besta, sem hún á. Missir þessara  eigna er því þyngri en tölum  taki, þótt þær að einhverju leyti  fáist bættar.

Fyrir nokkrum árum átti þessi  fjölskylda heima í nýrri íbúð í  verkamannabústöðunum við  Hvanneyrarbraut, þar sem hún  undi vel og vildi búa áfram. En  hin óöruggu lífskjör verkamannsins hafa bitnað hvað harðast á  henni. Vanheilsa húsbóndans um  tíma og langvarandi atvinnuleysi  urðu þess valdandi, að hann gat  ekki staðið í skilum með greiðslur vegna íbúðar sinnar og  neyddist til að láta hana af hendi  og fluttist þá í þetta hús, sem nú  varð eldinum að bráð.

Þegar svona vill til, er það  skylda samborgaranna að rétta  hjálparhönd, enda munu margir  hafa gert það þá strax og bruninn hafði skeð. Þá er einnig vitað, að á nokkrum söltunarstöðvum tóku konur sig saman um að  láta eitt merki af söltun eins  dags frá hverri renna til konu  Ólafs. Er þetta til fyrirmyndar  og ættu konur á öllum söltunarstöðvum að gera slíkt hið sama.  Þá hefur skrifstofa Þróttar sent  söfnunarlista á öll plön og stærri  vinnustaði, og er þess vænst, að  verkamenn sýni bróðurhug sinn  með framlögum til styrktar  Ólafi og fjölskyldu hans.

Mjölnir 28. janúar 1956  (frétt)

Eldsvoði

Í vikunni. sl.. sunnudagskvöld kom  upp eldur í kindaskúr, sem Jón Frímannsson verkamaður átti. Stendur  skúr þessi niðri á sjávarbakka,  skammt fyrir utan gömlu sundlaugina.

Eyðilagðist skúrinn að mestu. Tólf kindur voru í skúrnum. Kafnaði  ein, þrjár brenndust nokkuð og var  slátrað. Allt var þetta óvátryggt og  hefur Jón því orðið þarna fyrir tjóni, sem sennilega nemur þúsundum króna.

Ókunnugi mun vera um  upptök eldsins, en sennilegt er talið,  að um sjálfkviknun hafi verið að  ræða í bing af moði og matarúrgangi,.  er var í einu horninu.