Hafðu samband:

Úr Vikublaðinu

 1933

S v a r  við grein þeirri sem rituð var í 6. tölublaði "Einherja" um Siglufjarðar-Bíó

Mér þykir sá, er skrifað hefir greinina, bera nokkuð lítið skynbragð á  kvikmyndasýningar, eftir grein hans að dæma. Til þess að ætla sér að birta fleiri  aðfinnslur opinberlega, þyrfti hann að kynna sér betur aðstöðuna, áður en hann fer að  skrifa meira um slíkt.

Greinarhöfundur segir í grein sinni: "Slitnaði myndin oft og stundum var alger þögn,  þegar heyra átti tal leikendanna".

Viðvíkjandi því að myndin hafi slitnað oft, þá tel ég  greinarhöfund ekki vita hvað hann er að fara með, því myndin slitnaði alls ekki, í eitt  einasta skipti.

Einu sinni þurfti ég að stoppa sýninguna vegna bilunar á vélunum, og svo hafði  ég dálítið hlé eins og vant er. Telji greinarhöfundur þetta vera þessi slit á  filmunni sem hann er að tala um, þá ætti hann að athuga töluna nánar því  "tvisvar" kallast ekki "oft".

En hvað viðkemur þögn þeirri sem var á tali leikendanna, þá orsakaðist hún af bilun á  talmyndatækjunum, en alls ekki af því að filman væri skemmd, en um þessar plötur sem  greinarhöfundur segir að fylgi myndinni get ég ekkert sagt um, því þær eru ekki til.

 Nú  orðið þá eru það örfáar filmur sem hingað koma, sem plötur fylgja. Þær eru flestar  þannig útbúnar að hljóðið er á ræmu sem er áföst við filmuna sjálfa, og er filman  "Presturinn í Vejlby" þannig útbúin svo þar þarf alls engar plötur með. Hvað viðkemur  stundvísi þeirri sem greinarhöf. talar um, þá er hann sjálfur annaðhvort á undan tímanum  eða þá að klukka hans gengur öðruvísi en allar aðrar.

Ef þessi greinarhöfundur, sem ekki þorir að rita nafn sitt undir greinina, skyldi þurfa að  rita fleiri slíkar greinar og vanta nánari upplýsingar um filmurnar og talmyndatækin, þá  skal ég glaður láta honum þær í té svo hann þurfi ekki .að vaða reyk í annað skipti.

Kristinn Guðmundsson.