Óánægja með | Stórtjón, af veðri | Einokun útvarps | Leikur í snjónum | Þið sjáið sjálfir um.. | Söngur Vísir | Ný löndunarbryggja | Bland frétta | Höfnin dýpkuð | Pistill & fréttir | Síld og ufsi | Svartur fáni | Þeir sem hafa... | Með ungu fólki.. | Haförninn kemur | Strákagöng | Það er komið gat | Í gegn um göngin | Skipbrotsmannaskýli | Slys í göngunum | Stutt rabb við .. | Smáfréttir | Síld á Siglufirði | Nýtt sjúkrahús

>>>>>>>>>>> Haförninn kemur

Föstudagur 19. ágúst 1966  Fréttin og viðtal: Stefán Friðbjarnarson, ljósmyndir: Steingrímur

Haförninn til Siglufjarðar með 18-19 þúsund mál.

Haförninn leggst að bryggju í fyrsta sinn á Siglufirði

Siglufjörður, 18. ágúst. Haförninn hið nýja síldarflutningaskip S.R., er  væntanlegur til Siglufjarðar í dag með 18.000 -.19.000 mál síldar, sem fara í  bræðslu hjá; S.R.hér á staðnum.

Magn þetta hefur Haförninn tekið á 4-8 dögum úr síldarskipum á Austfjarðamiðum. Þess má geta að fullhlaðin tekur Haförninn um 22.000 mál  síldar.

Þetta er önnur löndunarferð Hafarnarins til Siglufjarðar og er óhætt að fullyrða, að  bæjarbúum er mikill fengur að þessu skipi. -                                                                                        Stefán.

Haförninn er búinn fljótvirkustu löndunartækjum sem nú þekkjast

Siglfirðingar binda miklar vonir við Haförninn hið nýja síldarflutningaskip Síldarverksmiðja  ríkisins. Ef vel tekst til við síldarflutninga þess, mun að sjálfsögðu leiða af því verulega  atvinnuaukningu fyrir bæjarbúa. Haförninn er hið glæsilegasta skip og hefur þegar komið að  miklum notum. Tíðindamaður blaðsins hitti fyrir skömmu Sigurð þorsteinsson skipstjóra á  Haferninum að máli í því skyni að fræðast um skipið og fá álit Sigurðar á því.

- Hvar og hvenær er skipið smíðað?

- Skipið er byggt í Haugasundi 1957 og þá sérstaklega sem olíuflutningaskip en einnig  .sérstaklega útbúið fyrir flutninga á asfalti, sýrum og ýmsum matarolíum. Það er 2460 tonn  brúttó og 3700 dead weight, 101 metri á lengd og 13 á breidd.

- Hve mikið getur það tekið?

- Með fullfermi tekur það 3200 tonn af síld og með þennan farm myndi skipið vera  léttlestað.

- Hvernig er með móttöku síldarinnar úti á hafi?

- Skipið er með þrjár dælur, tvær amerískar vacuumdælur og eina norska hydrostaldælu.  Hver vacuumdæla afkastar um 60 tonnum á klukkustund, en hydrostaldæluna hefur ekki gefist  tækifæri til þess að reyna enn þá, en hún á að geta afkastað feiknarlega miklu sennilega um 200  tonnum á klukkustund.

- Hvernig hefur skipið reynst í síldarflutningum til þessa?

- Skipið hefur reynst mjög vel og einnig þau tæki, sem við höfum notað til þessa. Skipið er  frekar erfitt til að halda því við í sjó, en ef fiskibátarnir hjálpa til og einhver báturinn, sem bíður  eftir löndun, andæfir upp í með okkar skipi í slefi, þá höfum við fengið þá reynslu, að það er  hægt að halda áfram að minnsta kosti svo lengi, sem fiskibátarnir geta verið að veðurs vegna.

-Mér þykir rétt að taka það fram, að við höfum aðstoðað bátana með vistir og vatn og einnig er ætlunin að geta framkvæmt smáviðgerðir um borð í okkar skipi fyrir  bátana.

 - Búist þið við því að vera í síldarflutningum fram á haust?

- Já, á meðan síld fæst, en annars er hægt að breyta um með litlum fyrirvara og taka upp flutninga á hráolíu eða lýsi. En við  skulum vona, að síldveiðin haldist sem lengst og að þetta skip fullnægi sem best því hlutverki,  sem því er ætlað, þ. e. síldarflutningum.

- Hvernig er vistarverum og aðbúnaði skipverja háttað?

- Hvort tveggja verður að teljast með því besta, sem hér þekkist. Áhöfnin, en hún er 22 menn býr við óvenju góð skilyrði   bæði hvað snertir hreinlæti og annað. Allir búa í eins manns klefum að undanteknum einum  klefanum, þar búa tveir. Hvað snertir búnað skipsins frekar, þá er það að segja, að það er búið  venjulegum siglingatækjum og uppfyllir aðrar slíkar kröfur, sem gerðar eru nú til dags.

- Hvernig er löndunarskilyrðum á síldinni í höfn farið?

- A því sviði er skipið búið full komnustu og fljótvirkustu tækjum sem nú þekkjast og hefur ekkert skip, sem annast hefur  síldarflutninga við Ísland verið búið slíkum tækjum til þessa. Skipið er útbúið þremur svokölluðum dönskum ryksugum sem hver  um sig getur afkastað 100 tonnum á klukkustund.

Skipið færir sjálft síldina frá borði að  færibandi verksmiðjunnar og koma engin flutningatæki svo sem bílar þar nærri. öll þessi tæki eru  knúin með raforku frá skipinu sjálfu. Við fyrstu löndun reyndust þessi tæki í alla staði prýðilega.

Hafnarskilyrði hér á Siglufirði hafa verið stórlega bætt að undanförnu og er nú auðvelt að  leggjast hér að með þetta stóra skip, en svo var ekki áður.

- Og að lokum, Sigurður, er það eitthvað sérstakt, sem þú vildir segja um skip þitt?

- Já, mig langar til þess að taka það fram, að skipið virðist vera mjög skemmtilegt,  gangmikið og gott í sjó og einnig má geta þess, að það er feikilega gaman að komast í snertingu  við fiskimennina og fiskveiðarnar sjálfar, þannig að okkur finnst sem við séum að veiða líka.

Sigurður Þorsteinsson skipstjóri um borð í Haferninum.