|
Úr Vikublaðinu
 1.
mars 1944
Nýtt kvikmyndahús.
Hússtjórn Alþýðuhússins hefur ákveðið að hefja
kvikmyndasýningar í húsinu, og hefur fengið leyfi bæjarstjórnar til þessa
reksturs.
Á bæjarstjórnarfundi í fyrradag var rætt um umsókn
formanna verkalýðsfélaganna um leyfi til bíóreksturs í Alþýðuhúsinu. Út af
þessu máli sneri Mjölnir sér til Gunnars Jóhanns sonar, formanns Þróttar
og spurðist nánar fyrir um þetta mál.
- Svo þið eruð að hugsa um að breyta Alþýðuhúsinu í
kvikmyndahús ?
- Já, við getum nú náð í fullkomnar
(1) nýtísku vélar í
húsið og höfum ákveðið að hefja þar kvikmyndasýningar. Bæjarstjórn hefur
nú veitt leyfi til þessa. .
- Hvernig voru undirtektir bæjarfulltrúanna undir þetta?
- Um það mætti að vísu margt segja, en þó eru aðalatriðin þessi : Málið var rætt
á tveim fundum. Á fyrri fundinum kom það reyndar fram, að 5
bæjarfulltrúar, Sósíalistaflokksins, Alþýðuflokksins og D-listans voru því
fylgjandi, en vegna ákveðinnar andstöðu Framsóknar- og Sjálfstæðismanna
var málinu þó frestað.
Andstaða þessara fulltrúa mæltist ákaflega illa
fyrir í bænum, einkum meðal meðlima verkalýðsfélaganna og höfðu því þessir
fjórir snúist til fylgis við málið, þegar á seinni fundinn kom og var
leyfið samþykkt þar með öllum atkvæðum.
- Með hvaða skilyrðum var leyfið veitt?
- Í fyrsta lagi fellur leyfið niður ef bærinn tekur
að sér kvikmyndahúsrekstur. Í öðru lagi greiði Alþýðuhúsið af þessum
rekstri skatta og skyldur eins og hliðstæður rekstur hér í bænum greiðir,
þar með talið sætagjald, ef það verður lagt á. Í þriðja lagi fellur leyfið
úr gildi, verði það eigi notað næstu þrjú ár.
- Hvenær verður hafist handa um undirbúning að þessum
rekstri ?
- Nú þegar hefur verið hafist handa. Jóhann
Jóhannesson rafvirki er farinn til Reykjavíkur til að taka á móti vélunum og sjá um flutning á þeim norður. Einnig
hefur verið byrjað á breytingum þeim, sem gera þarf á húsinu.
- Hvaða sambönd mun þetta nýja bíó aðallega hafa um
útvegun mynda?
Það mun fá einkaleyfi til að sýna myndir frá Tjarnarbíó
í Reykjavík hér á Siglufirði, Hafa eigendur hússins fullan hug á, að vanda
svo til myndavals sem frekast verður kostur
Mjölnir óskar .verkalýðsfélögunum til hamingju með þessar
fyrirætlanir sínar og vonar að þær verði bæði félögunum og almenningi til
heilla.
(1) Athygli er vakin á annarri umsögn,
hér, á tveim stöðum á sömu síðu.
|
